މުޒައްފަރުނަގަރް، އިންޑިއާ (ސެޕްޓެމްބަރު 5) - ދަނޑުވެރިކަމާ ގުޅޭ ގާނޫނުތަކުގެ ސަބަބުން ދަނޑުވެރިންނަށް ގެއްލުން ވާނެ ކަމަށް ބުނެ އިންޑިއާގެ ވެރި ރަށް ނިއު ދިއްލީ ކައިރީގައި އެތައް ހާސް ބަޔަކު މުޒަހާރަކޮށްފި އެވެ.
ދަނޑުވެރިކަމާއި އެއްބައިވަންތަކަން ރަމްޒުކޮށްދޭ ގޮވުންތައް ގޮވަމުން، ދަނޑުވެރި އަންހެނުންނާއި، ފިރިހެނުން އަދި ކުޑަކުދިން މަގުތަކަށް ނުކުތީ އެ މީހުންގެ މަސައްކަތް ރަމްޒުކޮށްދޭ ރީނދޫ އަދި ފެހި ކުލައިގެ ސްކާފް އަޅައިގެންނެވެ.
އުއްތަރް ޕްރަދޭޝް ސްޓޭޓުގެ މުޒައްފަރްނަގަރް ޑިސްޓްރިކްޓުގައި އޮތް މުޒާހަރާގެ ބައިވެރިން ތިބީ ގައުމީ ދިދައިގެ އިތުރުން ދަނޑުވެރިންގެ ޔޫނިއަންތަކުގެ ދިދަ ވެސް ހިފައިގެންނެވެ.
މިދިޔަ އަހަރުގެ ނޮވެމްބަރު މަހުން ފެށިގެން ގިނަ އަދަދެއްގެ ދަނޑުވެރިން ދިރިއުޅެމުން ދަނީ ދިއްލީގެ ބޯޑަރު ސަރަހައްދުގައި ކޭމްޕު ޖަހައިގެންނެވެ. ހުއްޓުމެއް ނެތި އެ މީހުން ކުރާ މުޒާހަރާއަކީ ބޮޑު ވަޒީރު ނަރެންދްރަ މޯދީގެ ސަރުކާރަށް އޮތް އެންމެ ބޮޑު އެއް ގޮންޖެހުމެވެ.
ދަނޑުވެރިންނާއި ޔޫނިއަންތަކުގެ ލީޑަރުން ބުނަމުން ދަނީ އެ މީހުންގެ ހައްގުތައް ހޯދަން ކުރާ މަސައްކަތް ހުއްޓާ ނުލާނެ ކަމަށާއި ދިއްލީ ކައިރީގައި ކުރާ މުޒާހަރާ ހުއްޓާލާނީ ގާނޫނު އަނބުރާ ގެންދިޔުމުން ކަމަށެވެ.
އޭގެ އިތުރުން ސެޕްޓެމްބަރު 27 ވަނަ ދުވަހު އިންޑިއާގެ އެކި ކަންކޮޅުތަކުގައި ތިބި ދަނޑުވެރިން ވެސް ބޮޑު މުޒާހަރާއަކަށް ނުކުތުމަށް ގޮވާލި އެވެ.
މުޒާހަރާ ބޭއްވި ސައިޓުގައި ހުރި އޭއެފްޕީގެ ފޮޓޯގްރާފަރަކު ބުނީ މަދުވެގެން 50،000 ދަނޑުވެރިންނާއި އެ މީހުންނަށް ތާއީދު ކުރާ މީހުން އެ ތަނުގައި ތިބި ކަމަށެވެ.
ދަނޑުވެރިންގެ ޔޫނިއަންތައް ރަމްޒުކޮށްދޭ ޖަމިއްޔާއަކުން ބުނީ 15 ސްޓޭޓެއްގެ ދަނޑުވެރިން މުޒާހަރާގައި ބައިވެރިވި ކަމަށެވެ.
މޯދީގެ ސަރުކާރުން ބުނާ ގޮތުގައި ދަނޑުވެރިކަމުގެ ސިނާއަތުން އެކަށީގެންވާ ފައިދާއެއް ނުލިބެ އެވެ. އަދި އެ ސިނާއަތް އޮތީ އިސްލާހު ކުރަން ޖެހިފައި ކަމަށް ސަރުކާރުން ބުނެ އެވެ.
އެ ވާހަކަތަކުގެ ތެރެއިން ހެދި ދަނޑުވެރިކަމާ ގުޅޭ ގާނޫނުތަކުގެ ސަބަބުން ދަނޑުވެރިންނަށް ގެއްލުން ވާނެ ކަމަށާއި ދަނޑުވެރިން ކޮންޓްރޯލް ކުރާނީ ބޮޑެތި ކުންފުނިތަކުން ކަމަށް މުޒާހަރާގެ ބައިވެރިން ގަބޫލުކުރެ އެވެ.
ހުއްޓުމެއް ނެތި މުޒާހަރާ ކުރަމުން ދާއިރު، މި މައްސަލަ ހައްލު ކުރަން ސަރުކާރުން އެތައް ފަހަރެއްގެ މަތިން މަޝްވަރާތައް ބޭއްވި ނަމަވެސް އަދި ހައްލެއް ފެނިފައެއް ނުވެ އެވެ.
