ސްރީނަގަރް، އިންޑިއާ (ސެޕްޓެމްބަރު 5) - މިދިޔަ ބުރާސްފަތި ދުވަހު މަރުވި ކަޝްމީރުގެ އެކްޓިވިސްޓުގެ އާއިލާއަށް ޓެރަރިޒަމްގެ ތުހުމަތުކޮށް އިންޑިއާ ފުލުހުން ތަހުގީގު ފަށައިފި އެވެ.
ސަޔިދު އަލީ ގީލަނީގެ އާއިލާގެ މައްސަލަ ބަލަން ފެށީ ޕާކިސްތާނުގެ ދިދަޔަކުން އޭނާގެ ހަށިގަނޑު ނިވާކޮށް، އިންޑިއާ ސަރުކާރާ ދެކޮޅު ގޮވުންތައް ގޮވުމުންނެވެ.
އުމުރުން 92 އަހަރުގެ ގީލަނީ މަރުވުމާއެކު އިންޑިއާއިން ކޮންޓްރޯލް ކުރާ ކަޝްމީރުގައި ވަނީ ހަމަނުޖެހުން ބޮޑުވެފަ އެވެ.
ޝަރީއަތް ކުރުމެއް ނެތި މީހުން ބަންދު ކުރުމުގެ ބާރު ފުލުހުންނަށް ލިބިދޭ ގާނޫނެއްގެ ދަށުން ގީލަނީގެ އާއިލާއާ މެދު އަމަލު ކުރަމުންދާ ކަމަށް ފުލުހުން ވަނީ ބުނެފަ އެވެ.
ނަމަވެސް މިހާތަނަށް އެ އާއިލާގެ އެއްވެސް މީހަކު ހައްޔަރުކޮށްފައެއް ނުވެ އެވެ.
ގީލަނީގެ ދަރިފުޅު، ނަސީމް ބުނެފައި ވަނީ ބައްޕަ މަރުވުމާއެކު ދަންވަރުގެ ވަގުތުގައި ފުލުހުން ގެޔަށް އައިސް ހަށިގަނޑު ގެންގޮސް، އާއިލާ ބައިވެރި ކުރުމެއް ނެތި ޖަނާޒާ ނިންމާލި ކަމަށެވެ.
އެކަމަކު ފުލުހުން އެ ވާހަކަ ދޮގުކުރެ އެވެ.
ސޯޝަލް މީޑިއާގައި ދައުރުވަމުންދާ ވީޑިއޯއަކުން ފެންނަނީ ގީލަނީގެ ހަށިގަނޑު ގެންދިޔުމުގެ ކުރިން ފުލުހުންނާއި އޭނާގެ އާއިލާއާ ދެމެދު ކުރިމަތިލުމެއް ހިނގާ މަންޒަރެވެ. ހަށިގަނޑު ގެންދިޔައިރު އޮތީ ޕާކިސްތާނުގެ ދިދައިން ފޮރުވާލާފަ އެވެ.
"އަހަރުމެން ބޭނުން ވަނީ މިނިވަންކަން" ކަމަށް ގޮވާ އަޑު ވީޑިއޯއިން އިވެ އެވެ.
ގީލަނީގެ މަރަށް ފަހު, ކަޝްމީރުގައި އަޅާފައިވާ ހަރުކަށި ފިޔަވަޅުތަކަށް އާދީއްތަ ދުވަހު ވަނީ ލުއި ދީފަ އެވެ. އިންޓަނެޓާއި މޮބައިލް ފޯނުގެ ހިދުމަތް ވެސް މިހާރު ކޮންމެވެސް ވަރަކަށް ލިބެ އެވެ.
އިންޑިއާ އާއި ޕާކިސްތާނުން ދައުވާ ކުރާ ކަޝްމީރު 1947 ވަނަ އަހަރުން ފެށިގެން އޮންނަނީ ދެ ފަޅިކޮށްފަ އެވެ.
އިންޑިއާ އިން ކޮންޓްރޯލް ކުރާ ފަޅީގައި ދިރިއުޅުނު ގީލަނީ ގޭ ބަންދުގައި ހުންނަތާ 11 އަހަރުވެއްޖެ އެވެ. ފާއިތުވި ދުވަސްތަކުގައި އޭނާގެ ސިއްހީ ހާލަތު ދިޔައީ ގޯސްވަމުންނެވެ.
ގީލަނީ އަކީ 1960 ގެ އަހަރުތަކުން ފެށިގެން ކަޝްމީރުގައި އިންޑިއާގެ ބާރު ހިންގުމާ ދެކޮޅަށް ތެދުވި މީހެކެވެ. އޭނާ މަސައްކަތް ކުރީ މުޅި ކަޝްމީރަކީ ޕާކިސްތާނުގެ ބަޔެއްގެ ގޮތުގައި ހެދުމަށެވެ.
ކަޝްމީރުގެ ގާނޫނު ހަދާ މަޖިލީހުގެ މެމްބަރެއްގެ ގޮތުގައި ހުރެ ވެސް، އޭނާ އެކަމަށް ބާރު އެޅި އެވެ. ނަވާރަ ސަތޭކަ ފަސްދޮޅަސް ދެ ވަނަ އަހަރު އޭނާ އަށް 10 އަހަރުގެ ޖަލު ހުކުމެއް އިއްވި އެވެ. އޭގެ ފަހުން ވެސް ގިނަ އަހަރުތަކެއް ހޭދަކުރީ ގޭ ބަންދުގަ އެވެ.
ޒުވާން އުމުރުން ފެށިގެން ގީލަނީ އަކީ ޖަމާއަތީ އިސްލާމީގެ މެމްބަރެކެވެ. އެ ޖަމާއަތަކީ އިންޑިއާ އިން ކޮންޓްރޯލް ކުރާ ކަޝްމީރުގައި އޮތް އެންމެ ބޮޑު ސިޔާސީ އަދި ދީނީ ގްރޫޕެވެ. ބޮޑު ވަޒީރު ނަރެންދްރަ މޯދީގެ ސަރުކާރުން ވަނީ އެ ޖަމާއަތް ހިންގުން މަނާކޮށްފަ އެވެ.
ކަޝްމީރު މައްސަލާގައި އިންޑިއާ އާއި ޕާކިސްތާނުން ދެ ފަހަރު ހަނގުރާމަ ކުރި އެވެ. ގީލަނީގެ މަރާ ގުޅިގެން ބުރާސްފަތި ދުވަހު ޕާކިސްތާނުގައި ވަނީ ގައުމީ ހިތާމަ ފާޅުކުރުމުގެ ދުވަހެއް ފާހަގަކޮށްފަ އެވެ.
އޭގެ އިތުރުން ޕާކިސްތާނާއި ތުރުކީގައި ވެސް ގީލަނީގެ ގައިބުގައި ކަށު ނަމާދުކޮށްފައި ވެ އެވެ.
