ކޮލޮމްބޯ، ސްރީލަންކާ (ސެޕްޓެމްބަރު 4) - ސްރީލަންކާގެ ރައްޔިތަކުން ނިއުޒީލެންޑުގައި ދިން ވަޅީގެ ހަމަލާގެ ތަހުގީގަށް ސްރީލަންކާއިން އެހީވާނެ ކަމަށް ބުނެފި އެވެ.
އުމުރުން 32 އަހަރުގެ ލަންކާ ރައްޔިތަކު ވަނީ މިދިޔަ ހުކުރު ދުވަހު އޯކްލޭންޑުގެ ސުޕަމާކެޓެއް ތެރޭގައި ހަތް މީހަކަށް ވަޅިން ހަމަލާ ދީފަ އެވެ. އޭނާ ހުއްޓުވަން ފުލުހުން ބަޑި ޖެހުމުން ވަނީ މަރުވެފަ އެވެ.
ދެހާސް އެގާރަ ވަނަ އަހަރުން ފެށިގެން ނިއުޒީލެންޑުގައި ދިރިއުޅެމުން ދިޔަ އެ މީހާ ހަމަލާ ދިނީ އިސްލާމިކް ސްޓޭޓް (އައިއެސް) ގެ ފަރާތުން ހިތްވަރު ލިބިގެން ކަމަށް ރިޕޯޓުތައް ބުނެ އެވެ.
ލަންކާ ފޮރިން މިނިސްޓްރީގެ ތަރުޖަމާނު ކޮހުލަރަންގަން ރަތުނަސިންގަމް ވިދާޅުވީ އެ ހަމަލާ ލަންކާ ސަރުކާރުން ކުށްވެރި ކުރާ ކަމަށާއި، ތަހުގީގަށް ފޯރުކޮށްދޭން ޖެހޭ ހުރިހާ އެއްބާރުލުމެއް ލިބޭނެ ކަމަށެވެ.
ހަމަލާ ދިން މީހާ ހުއްޓުވަން ނިއުޒީލެންޑު ފުލުހުން އަމަލު ކުރި ގޮތަށް އޭނާ ތައުރީފު ކުރެއްވި އެވެ. ލަންކާ ފުލުހުން ބުނީ ހަމަލާ ދިން މީހާގެ ބޭބެއާ ކޮލޮމްބޯގައި ސުވާލުކޮށްފައިވާ ކަމަށެވެ.
"އަޅުގަނޑުމެން މި ދަނީ ހަމަލާ ދިން މީހާގެ ބޭބެއާ ގުޅޭ މައުލޫމާތު އެއް ކުރަމުން. ހަމަލާ ދިން މީހާއާ ގުޅުން އޮތް ކަމަށް ބެލެވޭ އެހެން މީހުންގެ މައުލޫމާތު ވެސް ހޯދަމުން ދާނެ،" ފުލުހުންގެ އޮފިޝަލަކު ވިދާޅުވި އެވެ.
ސްރީލަންކާގެ މުސްލިމް ކައުންސިލުން ވެސް ވަނީ ހުކުރު ދުވަހު ހިންގި "އަނިޔާވެރި ޓެރަރިޒަމްގެ އަމަލު" ކުށްވެރިކޮށް، ނިއުޒީލެންޑުގެ ފުލުހުންނަށް ޝުކުރު އަދާކޮށްފަ އެވެ.
"މި ހާދިސާއަކީ އެންމެން އެއްބައިވެ ޓެރަރިޒަމާ ދެކޮޅަށް ލަންކާ އާއި ލަންކާއިން ބޭރުގައި އެކުގައި މަސައްކަތް ކުރަން ލިބުނު އިތުރު ހިތްވަރެއް،" އެ ކައުންސިލްގެ މެމްބަރު މުހައްމަދު ހިޝާމް އޭއެފްޕީ އަށް ވިދާޅުވި އެވެ.
