ސްރީނަގަރް، އިންޑިއާ (ސެޕްޓެމްބަރު 3) - އެކްޓިވިސްޓަކު މަރުވުމުން ހިނގި ހަމަނުޖެހުންތަކަށް ފަހު އެތައް ހާސް އިންޑިއާ ސިފައިންގެ މީހުން ކަޝްމީރު ލޮކްޑައުންކޮށްފި އެވެ.
އިންޑިއާގެ ބާރު ކަޝްމީރުގައި ހިންގުމާ ދެކޮޅު އެކްޓިވިސްޓު ސަޔިދު އަލީ ގީލަނީ އުމުރުން 92 އަހަރުގައި މަރުވީ ބުރާސްފަތި ދުވަހު އެވެ. އާއްމުންނަށް ބައިވެރިވެވޭ ފަދަ ޖަނާޒާއަކަށް ހުއްދަ ނުދިނުމުން ވަނީ ހަމަނުޖެހުން ހިނގާފަ އެވެ.
އިންޑިއާއިން ކޮންޓްރޯލް ކުރާ ކަޝްމީރު ފަޅީގައި އިންޓަނެޓާއި މޮބައިލް ފޯނުގެ ހިދުމަތް މިދިޔަ ބުދަ ދުވަހުން ފެށިގެން ވަނީ މެދުކަނޑާލާފަ އެވެ.
ބޮޑެތި މިސްކިތްތައް ބަންދުކޮށްފައި ހުރިއިރު، އެ ސަރަހައްދުތަކުގައި ގިނަ ސިފައިން ސެކިއުރިޓީ ބަލަހައްޓަމުން ދެ އެވެ. ހުއްދަ ނުދިން ނަމަވެސް، ބައެއް ކުދި މިސްކިތްތަކަށް މީހުން ޖަމާވެ ވަނީ ގައިބުގައި ކަށު ނަމާދުކޮށްފަ އެވެ.
އިންޑިއާއިން ބާރު ހިންގާ ކަޝްމީރު ފަޅީގެ އެންމެ ބޮޑު ސިޓީ، ސްރީނަގަރްގައި އާއްމުންނާއި ސަރުކާރުގެ ފައުޖާ ދެމެދު ބުރާސްފަތި ދުވަހު ހިނގި ކުރިމަތިލުމަށް ފަހު ސިފައިން ދަނީ މަގުތައް ޕެޓްރޯލްކޮށް، ގެއިން ބޭރަށް ނުކުތުން މަނާ ކުރަމުންނެވެ.
ނަމަވެސް ހުކުރު ދުވަހު ވެސް ގިނަ އަދަދެއްގެ ބަޔަކު ވަނީ އާއްމު ޖަނާޒާއަކަށް ހުއްދަ ނުދިނުމުން މަގުތަކަށް ނުކުމެ ސިފައިންނާ ދިމާލަށް ގާ އުކާފަ އެވެ. ރައްދުގައި ސިފައިން ވަނީ މުގުރުބުރިން އަނިޔާކޮށްފަ އެވެ.
ގީލަނީ ދަރިފުޅު ފުލުހުންނަށް ތުހުމަތު ކުރި ގޮތުގައި މަރުވިތާ މާ ގިނައިރުތަކެއް ނުވަނީސް، ފުލުހުން އައިސް ވަނީ ބައްޕަގެ ހަށިގަނޑު ގެންގޮސް ދަންވަރުގެ ވަގުތުގައި އަވަސް އަވަހަށް ވަޅުލާފަ އެވެ.
ޖަނާޒާގައި އާއިލާގެ އެއްވެސް މީހަކަށް ބައިވެރިނުވެވުނު ކަމަށް އޭނާ ބުނި ނަމަވެސް އެއީ ދޮގު ޕްރޮޕެގެންޑާ ކަމަށް ފުލުހުން ބުނެ އެވެ.
ސޯޝަލް މީޑިއާގައި ދައުރުވަމުންދާ ވީޑިއޯއަކުން ފެންނަނީ ގީލަނީގެ ހަށިގަނޑު ގެންދިޔުމުގެ ކުރިން ފުލުހުންނާއި އޭނާގެ އާއިލާއާ ދެމެދު ކުރިމަތިލުމެއް ހިނގާ މަންޒަރެވެ. ހަށިގަނޑު ގެންދިޔައިރު އޮތީ ޕާކިސްތާނުގެ ދިދައިން ފޮރުވާލާފަ އެވެ.
އިންޑިއާ އާއި ޕާކިސްތާނުން ދައުވާ ކުރާ ކަޝްމީރު 1947 ވަނަ އަހަރުން ފެށިގެން އޮންނަނީ ދެ ފަޅިކޮށްފަ އެވެ.
އިންޑިއާ އިން ކޮންޓްރޯލް ކުރާ ފަޅީގައި ދިރިއުޅުނު ގީލަނީ ގޭ ބަންދުގައި ހުންނަތާ 11 އަހަރުވެއްޖެ އެވެ. ފާއިތުވި ދުވަސްތަކުގައި އޭނާގެ ސިއްހީ ހާލަތު ދިޔައީ ގޯސްވަމުންނެވެ.
ގީލަނީ އަކީ 1960 ގެ އަހަރުތަކުން ފެށިގެން ކަޝްމީރުގައި އިންޑިއާގެ ބާރު ހިންގުމާ ދެކޮޅަށް ތެދުވި މީހެކެވެ. އޭނާ މަސައްކަތް ކުރީ މުޅި ކަޝްމީރަކީ ޕާކިސްތާނުގެ ބަޔެއްގެ ގޮތުގައި ހެދުމަށެވެ.
ކަޝްމީރުގެ ގާނޫނު ހަދާ މަޖިލީހުގެ މެމްބަރެއްގެ ގޮތުގައި ހުރެ ވެސް، އޭނާ އެކަމަށް ބާރު އެޅި އެވެ. ނަވާރަ ސަތޭކަ ފަސްދޮޅަސް ދެ ވަނަ އަހަރު އޭނާ އަށް 10 އަހަރުގެ ޖަލު ހުކުމެއް އިއްވި އެވެ. އޭގެ ފަހުން ވެސް ގިނަ އަހަރުތަކެއް ހޭދަކުރީ ގޭ ބަންދުގަ އެވެ.
ޒުވާން އުމުރުން ފެށިގެން ގީލަނީ އަކީ ޖަމާއަތީ އިސްލާމީގެ މެމްބަރެކެވެ. އެ ޖަމާއަތަކީ އިންޑިއާ އިން ކޮންޓްރޯލް ކުރާ ކަޝްމީރުގައި އޮތް އެންމެ ބޮޑު ސިޔާސީ އަދި ދީނީ ގްރޫޕެވެ. ބޮޑު ވަޒީރު ނަރެންދްރަ މޯދީގެ ސަރުކާރުން ވަނީ 2019 ވަނަ އަހަރު އެ ޖަމާއަތް ހިންގުން މަނާކޮށްފަ އެވެ.
ކަޝްމީރު މައްސަލާގައި އިންޑިއާ އާއި ޕާކިސްތާނުން ދެ ފަހަރު ހަނގުރާމަ ކުރި އެވެ. ގީލަނީގެ މަރާ ގުޅިގެން ބުރާސްފަތި ދުވަހު ޕާކިސްތާނުގައި ވަނީގައުމީ ހިތާމަ ފާޅުކުރުމުގެ ދުވަހެއް ފާހަގަކޮށްފަ އެވެ.
ކަޝްމީރުގެ އިސް މުދިމު އަދި ގީލަނީގެ އެކުވެރި މިރްވައިޒް އުމަރު ފާރޫގް ނެރުނު ބަޔާނެއްގައި ބުނީ އިންޑިއާ ސަރުކާރުގެ ވިސްނުމާއި އަމަލުތަކަކީ ލަދުވެތި އަދި ހުދުމުހުތާރު ފިކުރު ދައްކުވައިދޭ ކަންކަން ކަމަށެވެ.
