ކޮލަމްބޯ، ސްރީ ލަންކާ (ސެޕްޓެމްބަރު 3) - ސްރީ ލަންކާ އަށް ދިމާވެފައިވާ ކާބޯތަކެތީގެ ދަތިކަން ހައްލު ކުރުމަށް އަޅާ ފިޔަވަޅެއްގެ ގޮތުން ހުކުރު ދުވަހުން ފެށިގެން ޒަރޫރީ ބާވަތްތަކުގެ އަގު ކޮންޓްރޯލް ކުރަން ފަށައިފި އެވެ.
ހުކުރު ދުވަހު ހެނދުނު ސުޕަމާކެޓުތައް ހުޅުވުމުގެ އެތައް ގަޑިއިރެއް ކުރިން އާއްމުން ވަނީ ކިޔު ހަދަން ފަށާފަ އެވެ. މިއަދު ތަކެތި ވިއްކަމުން ދަނީ ބުރާސްފަތި ދުވަހާ އަޅާ ބަލާއިރު ދެ ގުނަ އަގުހެޔޮކޮށެވެ.
"އެހެން އެއްވެސް ތަނަކުން ހަކުރު ލިބޭކަށް ނެތް،" ކޮލަމްބޯގެ މަލިގަވައްޓެ ސަރަހައްދުގެ ސަތޯސާ ސްޓޯރު ބޭރުގައި ހުރި އުމުރުން 62 އަހަރުގެ ކޭ ޕެރުމަލް އޭއެފްޕީ އަށް ބުންޏެވެ.
"އަޅުގަނޑުގެ އާއިލާގައި ކުޑަކުދިން އެބަ ތިބި. ގޭގެ އެންމެންނަށް މަހަކު ގާތްގަނޑަކަށް ހަ ކިލޯގެ ހަކުރު ބޭނުންވޭ. އެއްވެސް ތަނަކުން އަދި ކިރު ލިބޭ ގޮތެއް ނުވޭ،" ހަކުރު ވިއްކަން ސަރުކާރުން ކަނޑައަޅާފައިވާ ދެ ކިލޯގެ ކޯޓާ ލިބޭނެ އިރެއްގެ އިންތިޒާރުގައި ކިޔުގައި ހުރެގެން އޭނާ ބުންޏެވެ.
އެން ވިޖެރަތުނެ ނަމަކަށް ކިޔާ އިތުރު މީހަކު ބުނީ ދެ ކިލޯއަކީ ވަރަށް މަދު ކަމަށާއި ނަމަވެސް ރޭޝަންކޮށްގެން ވިއްކުމުން ގިނަ މީހުންނަށް ތަކެތި ލިބޭނެތީ އެކަން ބަލައިގަންނަ ކަމަށެވެ.
ކާބޯތަކެތީގެ ދަތިކަމާ ހެދި މި ހަފުތާގެ ލަންކާގައި ވަނީ ކުއްލި ހާލަތު އިއުލާނުކޮށްފަ އެވެ. ސަރުކާރުން ކަނޑައަޅާފައިވާ ގޮތުގައި އެއް ކިލޯގެ ހަކުރު ވިއްކޭނީ އެންމެ އަގުބޮޑުވެގެން 125 ރުޕީޒް އަށެވެ. އަދި އެއް ކިލޯގެ ހުދު ހަނޑޫ ވިއްކޭނީ 95 ރުޕީޒް އަށެވެ.
އޭގެ އިތުރުން ފިޔާ އަދި އަލުވި ފަދަ ތަކެތީގެ އަގު ވެސް ވަނީ ބޮޑުތަނުން އުފުލިފަ އެވެ. ހިކި ކިރާއި ކަރާސީން ތެޔޮ އަދި ކައްކާ ގޭސް ގަންނަން ވެސް ފިހާރަތަކުގެ ބޭރުގައި ބޮޑެތި ކިޔުތައް ހަދާފައި ވެ އެވެ.
ކޮވިޑާ ހެދި މުޅި ގައުމު ލޮކްޑައުންކޮށްފައި ވާތީ ހަމައެކަނި ހުޅުވަމުން ދަނީ ސަރުކާރުން ހިންގާ ފިހާރަތަކެވެ. އަމިއްލަ ފަރާތްތަކުގެ ވިޔަފާރި ކުރިއަށް ގެންދަނީ އޮންލައިންކޮށެވެ.
ތަޖުރިބާކާރުން ބުނާ ގޮތުގައި ލަންކާ އަށް ކާބޯތަކެތީގެ ދަތިކަމާ ކުރިމަތިވެފައި ވަނީ ބޭރު ފައިސާ ނުލިބި، ތަކެތި އިމްޕޯޓު ކުރެވޭނެ ގޮތެއް ނެތް އިރު، ސަޕްލައި މެއިންޓެއިން ނުކުރެވުމުންނެވެ.
އެކަމަކު ސަރުކާރުން ބުނާ ގޮތުގައި ކާބޯތަކެތީގެ ދަތިކަމާ ދިމާވީ ބަލިމަޑުކަމާ ގުޅިގެން އަޅާފައިވާ ފިޔަވަޅުތަކުގެ ނާޖައިޒު ބޭނުންކޮށްގެން ވިޔަފާރިތައް ފައިދާ އިތުރު ކުރަން އުޅުމުންނެވެ.
"ބައެއް ވިޔަފާރިވެރިން ވަނީ ހަނޑޫ، ހަކުރު، ފުށް ފަދަ ޒަރޫރީ ތަކެތީގެ ސްޓޮކް ހިފަހައްޓާފައި. އޭގެ ބޭނުމަކީ ބޮޑު އަގުގައި ފަހުން ވިއްކާލުން،" ސަރުކާރުގެ ބަޔާނެއްގައި ބުންޏެވެ.
ކާބޯތަކެތީގެ ސްޓޮކްތައް މެއިންޓެއިން ކުރުމުގެ މަސައްކަތް ހަވާލުކޮށްފައިވާ އަސްކަރީ އޮފިސަރު ބުނީ ބުދަ އަދި ބުރާސްފަތި ދުވަހު އަމިއްލަ މީހުންގެ ގުދަންތައް ބަލައި ފާސްކުރިއިރު، ފޮރުވާފައި ހުރި 32،000 ޓަނުގެ ހަކުރު ފެނުނު ކަމަށެވެ.
ކޮވިޑު ބަލިމަޑުކަމުގެ ނުރަނގަޅު އަސަރު ލަންކާގެ ފަތުރުވެރިކަމުގެ ސިނާއަތަށް ވަރަށް ބޮޑަށް ކޮށްފައި ވާއިރު، 2020 ވަނަ އަހަރު އެ ގައުމުގެ އިގްތިސާދު 3.6 ޕަސެންޓު ކުޑަވި އެވެ.
ބޭރު ފައިސާގެ ރިޒާވް ހިފެހެއްޓުމަށްޓަކައި މިދިޔަ އަހަރު ސަރުކާރުން ވަނީ އުޅަނދު ފަހަރާއި ބައެއް އެހެން ސާމާނު އިމްޕޯޓު ކުރުން މަނާކޮށްފަ އެވެ.
ތަކެތި އިމްޕޯޓު ކުރާ ފަރާތްތަކުން ބުނެފައި ވަނީ އިތުރު ކާބޯތަކެއްޗާއި ބޭސް ސަޕްލައި އެތެރެ ކުރަން ބޭނުންވާ ޑޮލަރު އަދިވެސް ނުލިބޭ ކަމަށެވެ.
