ކާބުލް، އަފްގާނިސްތާން (ސެޕްޓެމްބަރު 2) - ވަޒީފާ އަދާ ކުރުމުގެ ހައްގު ހޯދުމަށާއި އާ ސަރުކާރުގައި އަންހެނުންގެ ބައިވެރިވުން ނެތް މައްސަލައިގައި އަފްގާނިސްތާނުގެ އަންހެނުންތަކެއް ހުޅަނގު ހިރާތު ސިޓީގައި މުޒާހަރާކޮށްފި އެވެ.
އޭއެފްޕީން ބުނި ގޮތުގައި މުޒާހަރާގައި 50 އަންހެނުން ބައިވެރިވި އެވެ. މިފަދަ ގޮތަކަށް ތާލިބާން ވެރިކަމުގައި އަންހެނުން މަގުމައްޗަށް ނިކުމެ އަޑު އުފުލުމަކީ އާދަޔާ ހިލާފު ކަމެކެވެ. ތާލިބާނުންނަކީ އަންހެނުން ހައްގުތަކާ މެދު ހަރުކަށި ވިސްނުމެއް ގެންގުޅޭ ބަޔެކެވެ.
"ތައުލީމް ލިބިގަނެ، ވަޒީފާއަށް ގޮސް، ރައްކާތެރިކަމާއެކު ދިރިއުޅުމަކީ އަހަރުމެންގެ ހައްގެއް،" މުޒާހަރާގައި ބައިވެރިވި އަންހެނުން ގޮވަމުން ދިޔަ އެވެ.
"އަހަރުމެން ބިރެއް ނުގަނޭ. އަހަރުމެން މި ތިބީ އެއްބައިވަންތަކަމާއެކު."
ހިރާތަކީ އަފްގާނިސްތާނުގެ ސިޓީތަކުގެ ތެރެއިން އެންމެ ބޮޑަށް ތަރައްގީ ވެފައިވާ އެއް ސިޓީ އެވެ. ތާލިބާނުން ވެރިކަމަށް އައި ނަމަވެސް އެ ސިޓީގެ އަންހެން ކުދިން މިހާރު ވަނީ އަލުން ސްކޫލަށް ވެސް ދާން ފަށާފަ އެވެ.
މުޒާހަރާގެ ބައިވެރިވި ބަސީރާ ތަހޭރީ ނަމަކަށް ކިޔާ އަންހެނަކު އޭއެފްޕީއަށް ބުނީ ތާލިބާނުން އެކުލަވާލާ އާ ސަރުކާރުގައި އަންހެނުން ހިމަނަން ގޮވާލާ ކަމަށެވެ.
"އަހަރުމެން އެދެނީ ތާލިބާނުން އަހަރުމެންނާ ވެސް މަޝްވަރާ ކުރުން. އެ މީހުން އެއްވުންތަކާއި ބައްދަލުވުންތަކުން އެންމެ އަންހެނަކު ވެސް ނުފެނޭ".
ތާލިބާނުން ވެރިކަމަށް އައުމާއެކު ހުޅަނގުގެ ގައުމުތަކުގެ އެހީތެރިކަމުގައި ދިހަ ވަރަކަށް ދުވަސް ތެރޭ 122،000 އަށް ވުރެ ގިނަ އަފްގާން ރައްޔިތުން ވަނީ ގައުމު ދޫކޮށް ގޮސްފަ އެވެ.
