ސްރީނަގަރް، އިންޑިއާ (ސެޕްޓެމްބަރު 2) - ކަޝްމީރުގައި އިންޑިއާގެ ބާރު ހިންގުމާ ދެކޮޅަށް މަސައްކަތް ކުރި އެކްޓިވިސްޓު ސަޔިދު އަލީ ގީލަނީ އުމުރުން 92 އަހަރުގައި މަރުވުމާއެކު އިންޑިއާ އިން ކަޝްމީރުގެ ސެކިއުރިޓީ ވަރުގަދަކޮށްފި އެވެ.
އޭނާ މަރުވިކަން އާއިލާއިން އިއުލާނު ކުރުމާއެކު ސްރީނަގަރް ސިޓީގައި ގީލަނީގެ ގެޔަށް ދާން އޮންނަ މަގުތައް ބަންދުކޮށް ބެރިކޭޑާއި ވަޔަރު ބަހައްޓާފައިވާ ކަމަށް ކަޝްމީރުގެ އާއްމުން ބުނެ އެވެ.
ކަޝްމީރުގައި ތިބި އިންޑިއާގެ ސިފައިންގެ އަދަދު އިތުރުކޮށްފައި ވާއިރު، މީޑިއާ ރިޕޯޓުތައް ބުނާ ގޮތުން ކާފިއު ތަންފީޒުކޮށް، އިންޓަނެޓުގެ ހިދުމަތް ކަނޑާލާނެ ކަމަށް ބެލެވެ އެވެ.
ސަޕޯޓަރުން ގީލަނީގެ ގެ ކައިރިއަށް ޖަމާވުމަށް އެ ސަރަހައްދުގައި ހުންނަ ބޮޑު މިސްކިތުގެ ސްޕީކަރު ބޭނުންކޮށް ވަނީ ގޮވާފަ އެވެ. ނަމަވެސް ބޮޑެތި އަސްކަރީ އުޅަނދާއި ޓްރަކުތައް ވަނީ މަގު ބަންދުކޮށްފަ އެވެ. ފުލުހުން އާއްމުންނަށް އަންގާފައި ވަނީ މަގުމައްޗަށް ނުނިކުތުމަށެވެ.
އިންޑިއާ އާއި ޕާކިސްތާނުން ދައުވާ ކުރާ ކަޝްމީރު 1947 ވަނަ އަހަރުން ފެށިގެން އޮންނަނީ ދެ ފަޅިކޮށްފަ އެވެ.
އިންޑިއާ އިން ކޮންޓްރޯލް ކުރާ ފަޅީގައި ދިރިއުޅުނު ގީލަނީ ގޭ ބަންދުގައި ހުންނަތާ 11 އަހަރުވެއްޖެ އެވެ. ފާއިތުވި ދުވަސްތަކުގައި އޭނާގެ ސިއްހީ ހާލަތު ދިޔައީ ގޯސްވަމުންނެވެ.
ގީލަނީ އަކީ 1960 ގެ އަހަރުތަކުން ފެށިގެން ކަޝްމީރުގައި އިންޑިއާގެ ބާރު ހިންގުމާ ދެކޮޅަށް ތެދުވި މީހެކެވެ. އޭނާ މަސައްކަތް ކުރީ މުޅި ކަޝްމީރަކީ ޕާކިސްތާނުގެ ބަޔެއްގެ ގޮތުގައި ހެދުމަށެވެ.
ކަޝްމީރުގެ ގާނޫނު ހަދާ މަޖިލީހުގެ މެމްބަރެއްގެ ގޮތުގައި ހުރެ ވެސް، އޭނާ އެކަމަށް ބާރު އެޅި އެވެ. ނަވާރަ ސަތޭކަ ފަސްދޮޅަސް ދެ ވަނަ އަހަރު އޭނާ އަށް 10 އަހަރުގެ ޖަލު ހުކުމެއް އިއްވި އެވެ. އޭގެ ފަހުން ވެސް ގިނަ އަހަރުތަކެއް ހޭދަކުރީ ގޭ ބަންދުގަ އެވެ.
ޒުވާން އުމުރުން ފެށިގެން ގީލަނީ އަކީ ޖަމާއަތީ އިސްލާމީގެ މެމްބަރެކެވެ. އެ ޖަމާއަތަކީ އިންޑިއާ އިން ކޮންޓްރޯލް ކުރާ ކަޝްމީރުގައި އޮތް އެންމެ ބޮޑު ސިޔާސީ އަދި ދީނީ ގްރޫޕެވެ. ބޮޑު ވަޒީރު ނަރެންދްރަ މޯދީގެ ސަރުކާރުން ވަނީ 2019 ވަނަ އަހަރު އެ ޖަމާއަތް ހިންގުން މަނާކޮށްފަ އެވެ.
