ބައްޕަގެ ނަމުގައި އޮތް ދޯންޏެއް ދަރިފުޅު ގަތުމަށް ހެދި އެއްބަސްވުމެއް ތަންފީޒުނުވެ، ޝަރީއަތަށް ދެބަފައިން ދާން ޖެހުނީ ނުރަނގަޅު ނުފޫޒުތަކެއް ބައްޕަގެ މައްޗަށް ދަރިފުޅު ކުރި ކަމުގެ ތުހުމަތާއެކު އެވެ.
ދެބަފައިން ކޯޓު މަރުހަލާތަކުގައި އެކަކު އަނެކަކަށް ރައްދު ދެމުން ދިޔައީ، ބައްޕަގެ ބަލި ހާލަތުގެ ނާޖާއިޒު ފައިދާ ހޯދީ ކަމަށް ބުނެ އެވެ.
އެ މައްސަލަ އެންމެފަހުން ސުޕްރީމް ކޯޓަށް ގޮސް، އެ ކޯޓުން ވަނީ އެއްބަސްވުން ހެދުމުގައި ނުރަނގަޅު ނުފޫޒު ފޯރުވުމާއި އޭގެ ނަތީޖާތަކާ ގުޅޭ ގޮތުން ތަފްސީލުކޮށްދީ، ހުކުމެއް އިއްޔެ ނެރެފަ އެވެ.
ކޯމަސްދޯނި ދޭން ސޮއި ކުރުމާއި ކޯޓަށް ދިޔަ ގޮތް
މި މައްސަލަ އުފެދިގެން އައީ ހުސެއިން އަބްދުލްގާދިރާއި، އޭނާގެ ދަރިފުޅު ރިފާސް ހުސެއިން "ކޯމަސް" ނަމަކަށް ކިޔާ ދޯންޏެއް ވިއްކުމަށް އެއްބަސްވުމެއް ހެދި ހިސާބުންނެވެ. "ކޯމަސް" ވިއްކުމަށް އެ ދެބަފައިންގެ ދެމެދު އެއްބަސްވުމެއް ހަދާފައިވީ ނަމަވެސް އެއާ އެއްގޮތަށް ރިފާސްއާ ދޯނި ހަވާލުކޮށްފައެއް ނުވެ އެވެ.
އެހެންވެ، އޭނާގެ ހައްގެއް ބައްޕަ ހިފަހައްޓާފައިވާ ކަމަށް ބުނެ ރަށު ކޯޓަށް ރިފާސް މައްސަލަ ހުށަހެޅި އެވެ. އެއާއެކު، ދެބަފައިންގެ ޝަރީއަތް ދަށު ކޯޓުގައި ފެށީ އެވެ.
ދޯނި ހަވާލު ނުކުރުމުގެ ހުއްޖަތެއްގެ ގޮތުގައި ހުސެއިން ކޯޓުގައި ފާހަގަކުރީ އެ އެއްބަސްވުމަކީ އޭނާގެ ދަރިފުޅު، އޭނާއަށް ބިރު ދައްކައި މަޖުބޫރުކޮށްގެން ހެދި އެއްބަސްވުމެއް ކަމެވެ. އޭނާއަކީ އޭރު ބަލި މީހެއް ކަމެވެ. ކުއްލި ގޮތަކަށް ހުސެއިން ބަލި އެނދަށް ވައްޓާލީ ސްޓްރޯކެކެވެ. އެކަމެއް ދިމާވީ ދޯނި މަރާމާތަށް އެހެލާފައި އޮއްވަ އެވެ.
ނުހަނު ބޮޑަށް ވޭން އުފުލަން ޖެހެފައިވާ ހުސެއިން، ސްޓްރޯކަށް ފަރުވާ ހޯދުމަށް ރާއްޖެ އާއި ރާއްޖެއިން ބޭރުގައި ދުވަސްތައް ހޭދަކުރީ ދަރިފުޅު، ރިފާސްގެ ބެލުމުގެ ދަށުންނެވެ.
ރާއްޖެއިން ބޭރުން ހުސެއިން ފަރުވާ ހޯދުމަށްފަހު ދުވަސްތަކެއް ވަންދެން މާލޭގައި، ރިފާސް ކުއްޔަށް ހިފާފައިވާ އެޕާޓްމަންޓެއްގައި މަޑުކުރި އެވެ. ދެބަސްވުން އުފެދިފައި މިއޮތް އެއްބަސްވުމުގައި ދެބަފައިން ސޮއިކުރީ އެ އެޕާޓްމެންޓްގައި އުޅުނު ދުވަސްވަރެވެ.
ދެބަސްވުން އުފެދިފައިވާ އެއްބަސްވުމާއެކު، ދަށު ކޯޓުގައި ހުސެއިން ބުނަމުން ދިޔައީ ސްޓްރޯކް ޖެހި، ރިފާސްގެ ބެލުމުގެ ދަށަށް ހުސެއިން ދިޔުން މަޖުބޫރުވެފައިވަނިކޮށް ހެދި އެއްބަސްވުމުގެ ފަހަތުގައި ވަނީ ބިރާއި ނުފޫޒު ކަމަށެވެ. އެކަން ދަށު ކޯޓުގައި ސާބިތެއް ނުކުރެވުނެވެ. ނަމަވެސް، ހައިކޯޓުން ހުސެއިންއާ އެއްކޮޅަށް ހުކުމް ކުރި އެވެ.
އެ ހުކުމުގައި ލިޔެފައިވާ ގޮތުގައި، މި މައްސަލާގައި އެއްބަސްވުން ހެދީ ހުސެއިން ސްޓްރޯކަށް ފަރުވާ ހޯދަމުންދިޔައިރުކަން އެނގެން އޮތް ކަމާއި އެއީ ބައްޕައަށް ދަރިފުޅު ނުފޫޒު ފޯރުވޭނެ ހާލަތެއް ކަމެވެ. އެ ހުކުމާމެދު ހިތްހަމަނުޖެހިގެން ރިފާސް، ބައްޕަ ގޮވައިގެން އެންމެ މަތީ ކޯޓަށް ދިޔައީ އެވެ.
އިއްޔެ ވަނީ ދެބަފައިންގެ މެދުގައި އޮތް ހިޔާލު ތަފާތުވުމަށް ސުޕްރީމް ކޯޓުން ހުކުމް އިއްވާފަ އެވެ.
މައްސަލާގައި ސުޕްރީމް ކޯޓުގެ ކުރިމަތީ އޮތް ސުވާލަކީ، ކޯމަސް ދޯނި ވިއްކުމާ ބެހޭ އެއްބަސްވުން ހެދީ ހުސެއިން ގާދިރުގެ ރުހުން އޮވެގެންތޯ ނުވަތަ ނޫންތޯގެ މައްޗަށް ކަމެވެ.
titledesc
ނުރަނގަޅު ނުފޫޒާއި އޭގެ ނަތީޖާ
ސުޕްރީމް ކޯޓުން މާނަކުރި ގޮތުގައި ނުރަނގަޅު ނުފޫޒަކީ މީހަކު ހުރި މަގާމެއްގެ ސަބަބުން ނުވަތަ ދެފަރާތުގެ ދެމެދުގައި އުފެދިފައިވާ އިތުބާރެއް ނަހަމަ ގޮތުގައި ހިފާ، އަނެއްކާގެ މައްޗަށް ނުފޫޒު ފޯރުވައި އެ ފަރާތުގެ ރުހުމެއް ނެތި ކަންކަން ކުރުމެވެ.
އަމިއްލަ އިހްތިޔާރެއް ނެތި މިގޮތަށް ވެވޭ އެއްވެސްވުން ބާތިލްވާނެ އެވެ.
ސުޕްރީމް ކޯޓުން ފާހަގަކުރި ގޮތުގައި ނުރަނގަޅު ނުފޫޒެއް ފޯރުވިދާނެ މަގާމެއްތޯ ނުވަތަ ގުޅުމެއްތޯ ދެނެގަތުމަށް ބެލިދާނެ ތިން ހާލަތެއް ވެ އެވެ.
- ތިމާގެ ކަމުގެ ސަބަބުން ނުވަތަ އެ ނޫން ގޮތަކުން ވެސް މީހަކު އެހެން މީހެއްގެ މައްޗަށް ވަކި ބާރެއް ލިބިފައިވޭތޯ ބެލުން.
- އެމީހާ އާއި އަނެކާއާ ދެމެދު ބަދެވިފައިވާ ގުޅުމަކީ އިތުބާރުގެ މައްޗަށް އޮތް ގުޅުމެއްތޯ ބެލުން.
- އެމީހާއަކީ އުމުރުގެ ގޮތުންނާއި ޖިސްމާނީ ނުވަތަ ނަފްސާނީ ގޮތުން އަނެއްކާގެ މައްޗަށް ދިރިއުޅުން ބަރޯސާވެފައިވާ މީހެއްތޯ ބެލުން.
ނުރަނގަޅު ނުފޫޒެއް ފޯރުވައިގެން ކޮންޓްރެކްޓެއް ބާތިލްކުރުމުގެ އިހްތިޔާރު އެ ނުފޫޒެއް އޮތް ބައިވެރިޔާއަށް އޮންނާނެ އެވެ. ނަމަވެސް، ކޮންޓްރެކްޓަކަށް އަމަލު ކުރަން ފެށުމަށްފަހު އެ ކޮންޓްރެެކްޓު ބާތިލްކުރަން އޭނާ ބޭނުންވި ކަމުގައި ވިޔަސް، އެ ސަބަބަށްޓަކައި ކޮންޓްރެކްްޓް ބާތިލް ކުރުމުގެ އިހްތިޔާރު އޭނާއަށް ގެއްލޭނެ އެވެ.
ކޯމަސް ދޯންޏާ ގުޅިފައި އޮތް ނުރަނގަޅު ނުފޫޒު
ސުޕްރީމް ކޯޓުގެ ހުކުމްގައިވާ ގޮތުން ހުސެއިންގެ ދިރިއުޅުން ރިފާސްގެ މައްޗަށް ބަރޯސާވެ އެއީ ބަލި މީހެއްކަން ދެ މީހުން ދެއްކި ވާހަކަތަކުން ވެސް އެނގެ އެވެ.
އަދި އެއްބަސްވުމުގައި ސޮއިކުރިއިރު ހުސެއިންއަކީ ހާއްސަ އެހީއަށް ބޭނުންވާ މީހެއްކަން ވެސް އެނގެން އެބަ އޮތް ކަމެވެ.
އެއީ، ރިފާސްއަކީ އޭނާގެ ބައްޕައަށް ނުފޫޒު ފޯރުވިދާނެ މަގާމެއްގައި ހުރި މީހެއްކަން ސާބިތުވާ ކަންތައްތަކެއްކަން ސުޕްރީމް ކޯޓުން ފާހަގަކުރި އެވެ. އެ ނޫން ގޮތަކަށް އެކަން ޝަރީއަތަށް ސާބިތުކޮށްދިނުމުގެ ބުރަ އޮތީ ރިފާސްގެ މައްޗަށް ކަމަށެވެ.
ނަމަވެސް، ހުސެއިންގެ މައްޗަށް ނުރަނގަޅު ނުފޫޒެއް ފޯރުވާފައިނުވާ ކަމަށް ރިފާސްއަށް ޝަރީއަތަށް ސާބިތުކޮށްދެވިފައި ނެތްކަން ހުކުމްގައި ފާހަގަކުރި އެވެ.
"ކޯމަސް ދޯނި ވިއްކުމާ ގުޅޭ އެއްބަސްވުމުގައި ހުސެއިން ސޮއިކުރީ ކޮންޓްރެކްޓާ ބެހޭ ގާނޫނުގެ 15 ވަނަ މާއްދާގައި ބުނާ ނުރަނގަޅު ނުފޫޒެއް އޮވެގެންކަން ސާބިތުވާ ކަމަށް އަހުރެން ދެކެމެވެ." ފަނޑިޔާރު މުހައްމަދު އިބްރާހިމް ނެރުއްވި ހުކުމްގައިވެ އެވެ.
އެހެންވެ، ސުޕްރީމް ކޯޓުން ނިންމީ، ދެބައިފައިންގެ ދެމެދު އޮތް އެއްބަސްވުމަކީ ތަންފީޒު ކުރެވޭނެ އެއްބަސްވުމެއް ނޫން ކަމާއި ބައްޕައާ އެއްކޮޅަށް ހައިކޯޓުން ނިންމާފައި އޮތް ނިންމުން ދަމަހައްޓަން ޖެހޭ ކަމެވެ.
ފަނޑިޔާރު މުހައްމަދު އިބްރާހިމްގެ ރައުޔަށް ދެން ތިއްބެވި ފަނޑިޔާރުން ކަމަށްވާ އާއިޝާ ޝުޖޫން މުހައްމަދާއި އަލީ ރަޝީދު ހުސެއިން ވަނީ ތާއިދު ކުރައްވާފަ އެވެ.
ދެބަފައިންގެ މެދުގައި ދޯންޏާ ގުޅިގެން އުފެދުނު މަދަނީ ދެބަސްވުން އެންމެ މަތީ ކޯޓާ ހަމައިން ބައްޕައަށް ކާމިޔާބު ވެގެން ނިމުނީ އެވެ!
