ލަންޑަން، އިނގިރޭސިވިލާތް (ސެޕްޓެމްބަރު 1) - އިނގިރޭސިވިލާތުން އޮތީ އަފްގާނިސްތާނުގެ ރެފިއުޖީންނަށް ދަރަނިވެރިވެފައި ކަމަށާއި އިނގިރޭސިވިލާތަށް ދިރިއުޅުން ބަދަލު ކުރާ މީހުންނަށް އެހީވާނެ ކަމަށް ބޮޑު ވަޒީރު ބޮރިސް ޖޯންސަން ވިދާޅުވެއްޖެ އެވެ.
ނަމަވެސް އަފްގާނިސްތާނުން މީހުން ފުރުވާލުމުގެ އޮޕަރޭޝަން ނިމުމަކަށް ގެނައި އިރު، އިނގިރޭސިވިލާތުގެ "ރީލޮކޭޝަންސް އެންޑް އެސިސްޓެންސް ޕޮލިސީ" ގެ ދަށުން އިނގިރޭސިވިލާތަށް ބަދަލުވުމަށް ޝަރުތު ހަމަވާ އެތައް ހާސް ބަޔަކު ގެންގޮސްފައެއް ނުވެ އެވެ.
އެހެންވެ، އިނގިރޭސި ސަރުކާރަށް ދަނީ ބޮޑެތި ފާޑުކިޔުންތަކެއް އަމާޒުވަމުންނެވެ. އިނގިރޭސިވިލާތަށް ދެވިފައި ވަނީ އަފްގާނިސްތާނުގެ 8،000 ރެފިއުޖީންނަށެވެ. އެ މީހުންނަށް މުއްދަތެއް ނެތް ގޮތަށް އިނގިރޭސިވިލާތުގައި ތިބެވޭނެ ކަމަށް ބުދަ ދުވަހު ވަނީ އިއުލާނުކޮށްފަ އެވެ.
އޭގެ އިތުރުން އަފްގާން ރެފިއުޖީންގެ ތައުލީމާއި ސިއްހީ ފަރުވާއަށް ހާއްސަ ބަޖެޓަށް އިތުރު 15 މިލިއަން ޕައުންޑް ވަނީ އިއުލާނުކޮށްފަ އެވެ.
"އަފްގާނިސްތާނުގައި [ނޭޓޯގެ] ސިފައިންނާ އެކު މަސައްކަތް ކުރި އަފްގާން ރައްޔިތުންނަށް މި ތިބީ ދަރަނިވެރިވެފައި. އެ މީހުންނާއި އެ މީހުންގެ އާއިލާތަށް އިނގިރޭސިވިލާތުގައި އަލުން ދިރިއުޅުން ފެށުމަށް ބޭނުންވާ ހުރިހާ އެހީއެއް ފޯރުކޮށްދޭނަން،" ބޮރިސް ވިދާޅުވި އެވެ.
ބޮރިސް ވިދާޅުވީ ސަރުކާރުން އަޅާ ފިޔަވަޅުތަކުގެ ދަށުން އަފްގާން ރައްޔިތުންނަށް ހުރަހެއް ނެތި އިނގިރޭސިވިލާތުގައި ދިރިއުޅެވޭނެ ކަމަށާއި، ވަޒީފާ އަދާ ކުރުމުގެ ހައްގު ފުރިހަމައަށް ލިބިދޭނެ ކަމަށާއި، ކުރިމަގުގައި އިނގިރޭސި ރައްޔިތުކަމަށް އެދި ހުށަހެޅޭނެ ކަމަށެވެ.
