ބިލަބޮން ސްކޫލް ތެރޭ ކުއްޖަކާމެދު މާރާމާރީ ހިންގި މައްސަލައެއްގައި ޓެރަރިޒަމްގެ ދައުވާއިން ސަލާމަތްވި ބައެއްގެ އިސްތިއުނާފު މައްސަލަ ޕްރޮސިކިއުޓާ ޖެނަރަލްގެ އޮފީހުން ހެއްކަކާމެދު ޔަގީންކަން ނެތުމުން އަނބުރާ ގެންގޮސްފި އެވެ.
މީގެ ހަތް އަހަރު ކުރިން ހިނގި މި ހާދިސާގައި ޓެރަރިޒަމްގެ ދައުވާ އުފުލި ހަތް މީހުން ވަނީ ދައުލަތުން ތުހުމަތު ކުރާ ގޮތުގައި ސްކޫލް ތެރޭ ކުއްޖާއަށް ބޮޑެތި އަނިޔާތަކެއް ދީފަ އެވެ. އެގޮތުން ޓްރޮފީއަކުން އޭނާގެ ގައިގާ ތަޅާފައިވެ އެވެ.
ކުރިމިނަލް ކޯޓުގައި ޝަރީއަތް ހިންގުމަށްފަހު ހުކުމް ކޮށްފައިވަނީ އޭގެ ތެރެއިން އެކެއްގެ މައްޗަށް ކުށް ސާބިތުވާ ކަމަށެވެ. އެހެންވެ، އޭނާގެ މައްޗަށް 10 އަހަރުގެ ޖަލު ހުކުމެއް އިއްވި އެވެ. ނަމަވެސް، ދެން ތިބި ތިން މީހުން މައްސަލައިން ސަލާމަތްވި އެވެ.
ކޯޓުގެ ހުކުމްގައިވާ ގޮތުން އެ ތިން މީހުންގެ މައްޗަށް ދައުލަތުން ދައުވާ ސާބިތު ކުރެވޭ މިންވަރަށް ހެކި ހުށަހަޅާފައެއް ނުވެ އެވެ.
އެ ހުކުމާމެދު ހިތްހަމަނުޖެހޭތީ، ދައުލަތުން ތިން މީހުންގެ މައްޗަށް ކުށް ސާބިތު ނުވި ބައި ހައިކޯޓުގައި އިސްތިއުނާފުކުރި އެވެ. ނަމަވެސް، 2019 ވަނަ އަހަރު ތެރޭ ކޯޓުން މައްސަލަ ބޭރުކޮށްލި އެވެ.
އެނގިފައިވާ ގޮތުގައި ހައިކޯޓުން އޭރު މައްސަލަ ބޭރުކޮށްލީ ތާވަލުކުރި އަޑުއެހުމަކަށް ޕްރޮސިކިއުޓާ ޖެނަރަލްގެ ވަކީލުން ހާޒިރު ނުވެގެންނެވެ. ހައިކޯޓުގެ ޝަރީއަތަށް ދައުވާ ކުރާ ފަރާތުން ހާޒިރު ނުވެއްޖެނަމަ، މައްސަލަ ބޭރުކޮށްލަ އެވެ.
ހައިކޯޓުން މައްސަލަ ބޭރުކޮށްލުމުން ޕްރޮސިކިއުޓާ ޖެނަރަލްގެ އޮފީހުން ދެވަނަ ފަހަރަށް އެ މައްސަލަ ވެއްދި އެވެ. އެކަމަކު، އިއްޔެ މައްސަލާގައި ހައިކޯޓުން އަޑުއެހުމެއް ތާވަލުކޮށްފައިވަނިކޮށް، މައްސަލަ އިތުރަށް ކުރިއަށް ގެންދަން ބޭނުން ނުވާ ކަމަށް ބުނެ ޕްރޮސިކިއުޓާ ޖެނަރަލްގެ އޮފީހުން ސިޓީއެއް ފޮނުވި އެވެ.
އެހެންވެ، އިއްޔެ ހައިކޯޓުން ވަނީ މައްސަލާގެ ދައުވާ ފޯމް ބާތިލްކޮށްފަ އެވެ.
މައްސަލަ އަނބުރާ ގެންދިޔަ ސަބަބާ ގުޅޭ ގޮތުން ސުވާލު ކުރުމުން، ޕްރޮސިކިއުޓާ ޖެނަރަލް އޮފީހުގެ މީޑިއާ އޮފިޝަލް އަހުމަދު ޝަފީއު ވިދާޅުވި ގޮތުގައި، އެ މައްސަލާގެ އިސްތިއުފީ މައިގަނޑު ނުކުތާއަކީ ދަށު ކޯޓުގެ ހެއްކެއްގެ ހެކި ބަހާ ގުޅޭ ގޮތުން ނިންމި ނިންމުމެކެވެ. އެހެންވެ، ހައިކޯޓުން މައްސަލާގައި ދައުލަތަށް ކާމިޔާބުވިޔަސް، ހުކުމް ކުރާނީ ދަށު ކޯޓުން މައްސަލަ އަލުން ބެލުމަށް ކަމަށެވެ.
އަލުން ބެލިޔަސް، މިހާރު އެ ހެކިވެރިޔާގެ ހެކިބަސް ލިބިދާނެ ކަމަށް ނުފެންނާތީ މައްސަލަ އަނބުރާ ގެންދަން ނިންމީ ކަމަށް ޕަބްލިކް ޕްރޮސިކިއުޓާ ޝަފީއު ވިދާޅުވި އެވެ.
މިފަހުން ޕްރޮސިކިއުޓާ ޖެނަރަލް ހުސެއިން ޝަމީމް ވިދާޅުވެފައިވާ ގޮތުގައި ދައުލަތުން މައްސަލަތައް އިސްތިއުނާފު ކުރުން މިހާރު ވަނީ މަދުކޮށްފަ އެވެ. ދައުލަތުގެ ފަރާތުން ކޮންމެ ކޮންމެ މައްސަލައެއް ކުރިއަށް އޮތް ދުވަސްތަކުގައި އިސްތިއުނާފު ނުކުރާނެ ކަމަށް ވިދާޅުވި އެވެ.
އޭނާ ވިދާޅުވި ގޮތުގައި ދެން މައްސަލަތައް މަތީ ކޯޓުތަކުގައި އިސްތިއުނާފު ކުރާނީ ގާނޫނު މާނަކުރެވޭ ގޮތާއި މެދު ސުވާލު އުފެދޭ މައްސަލަތަކުގަ އެވެ.
