ކާބުލް، އަފްގާނިސްތާން (އޯގަސްޓު 31) - ބޭރުގެ ނުފޫޒު ނެތް އިސްލާމީ ސަރުކާރެއް ހިނގާ މަންޒަރު ފެނުމުން އިސްލާމިކް ސްޓޭޓް (އައިއެސް) ހަރަކާތްތެރިވުން ހުއްޓާލާނެ ކަމަށް ތާލިބާނުން ބުނެފި އެވެ.
"އުއްމީދަކީ އައިއެސްގެ ނުފޫޒު ފޯރާފައި ތިބި އަފްގާން ރައްޔިތުންނަށް އެ މަންޒަރު ފެނި، އެ މީހުންގެ އޮޕަރޭޝަންތައް ހުއްޓާލުން،" ތާލިބާނުންގެ ތަރުޖަމާނު ޒަބީހުﷲ މުޖާހިދު އޭއެފްޕީ އަށް ދިން އިންޓަވިއުއެއްގައި ބުންޏެވެ.
"ހަނގުރާމަ އުފައްދާ، އޮޕަރޭޝަންތައް ކުރިއަށް ގެންދަން މަސައްކަތް ކުރާ ނަމަ، [ތާލިބާނުންގެ] އިސްލާމީ ސަރުކާރުން އަޅަން ޖެހޭ ފިޔަވަޅު އަޅަމުން ދާނެ".
މިދިޔަ ބުރާސްފަތި ދުވަހު އައިއެސް އިން ވަނީ ކާބުލް އެއާޕޯޓުގެ ބޭރުގައި ނުރައްކާތެރި ހަމަލާއެއް ދީ 100 އަށް ވުރެ ގިނަ މީހުން މަރާލާފަ އެވެ. އޭގެ ތެރޭގައި އެމެރިކާ ސިފައިންގެ 13 މީހަކު ވެސް ހިމެނެ އެވެ.
ރައްދުގައި އެމެރިކާ އިން އައިއެސްގެ ޓާގެޓުތަކަށް ވައިގެ ހަމަލާތައް ދީފައި ވާތީ ތާލިބާނުން ވަނީ ހިތްހަމަނުޖެހުން ފާޅުކޮށްފަ އެވެ. މިދިޔަ އާދީއްތަ ދުވަހު ބޮން ހަރުކޮށްފައި އޮތް ކާރަކަށް ފޮނުވި ވައިގެ ހަމަލާއެއްގައި ކައިރީގައި ހުރި ގެޔެއް ބިމާ ހަމަވެ، އާއިލާއެއްގެ މެމްބަރުން އެއްކޮށް މަރުވެފައިވާ ކަމަށް ރިޕޯޓުތައް ބުނެ އެވެ.
"އެފަދަ އޮޕަރޭޝަންތައް ހިންގަން [އެމެރިކާއަށް] ހުއްދައެއް ނެތް. އަފްގާނިސްތާނުގެ މިނިވަންކަމަށް އިހްތިރާމް ކުރަން ޖެހޭނެ،" ޒަބީހުﷲ މުޖާހިދު ބުންޏޭވެ.
އެމެރިކާ އިން އަފްގާނިސްތާނު ފަސްގަނޑު ދޫކޮށް ދިޔުމަށް ކަނޑައެޅު ސުންގަޑިއަކީ އޯގަސްޓު 31 އެވެ. ނަމަވެސް އޭގެ އެތައް ގަޑިއިރެއް ކުރިން އެންމެ ފަހު ފައުޖު ވަނީ ފުރާފަ އެވެ. އެއާއެކު ތާލިބާނުން ވަނީ ކާބުލް އެއާޕޯޓު ތެރޭގައި އުފާ ފާޅުކޮށްފަ އެވެ.
