ކޮލޮމްބޯ، ސްރީލަންކާ (އޯގަސްޓު 31) - ސްރީ ލަންކާ އަށް ދިމާވެފައިވާ ބޭރު ފައިސާގެ ދަތިކަމާ ހެދި ތަކެތި އިމްޕޯޓު ކުރެވޭނެ ގޮތެއް ނެތުމުން ކާބޯތަކެތީގެ އެމެޖެންސީ އިއުލާނުކޮށްފި އެވެ.
ކާބޯތަކެތި އިމްޕޯޓު ކުރަން ބޭނުންވާ ބޭރު ފައިސާ އަމިއްލަ ބޭންކުތަކުން ވަނީ ހުސްވެފަ އެވެ. އެއާއެކު ކާބޯތަކެތީގެ ދަތިކަން ލަންކާ އަށް މިހާރު ދަނީ ކުރިމަތިވަމުންނެވެ.
އިގްތިސާދީ ކާރިސާއަކާ ކުރިމަތިވެފައިވާ ލަންކާގައި ހަކުރު، ހަނޑޫ އަދި ޒަރޫރީ އެހެން ބާވަތްތަކުގެ ތަކެތި ގިނައިން ފޮރުވާފައި ބެހެއްޓުން ހުއްޓުވުމަށް ރައީސް ގޮތަބަޔަ ރާޖަޕަކްސަ ވަނީ ހާއްސަ ފިޔަވަޅުތަކެއް އިއުލާނު ކުރައްވާފަ އެވެ.
އެ މަސައްކަތް ބެލެހެއްޓުމަށް ކަނޑައެޅުއްވީ ސިފައިންގެ އިސް އޮފިސަރެކެވެ. ހަކުރު، ހަނޑޫ، ފިޔާ އަދި އަލުވި ފަދަ ތަކެތީގެ އަގު ވަނީ ވަރަށް ބޮޑަށް އުފުލިފަ އެވެ. އޭގެ އިތުރުން ކިރާ، ކަރާސީން ތެޔޮ އަދި ކައްކާ ގޭސް ވެސް ލިބުން ދަތިވެފައި ވާތީ ފިހާރަތަކުގެ ބޭރުގައި މީހުން އަންނަނީ ކިޔު ހަދަމުންނެވެ.
ސަރުކާރުން ވަނީ މި ދަނޑިވަޅުގައި ގިނައިން ކާބޯތަކެތި ފޮރުވާފައި ބަހައްޓާ ނަމަ ހަރުކަށި ފިޔަވަޅު އަޅާނެ ކަމަށް ބުނެފަ އެވެ. ކާބޯތަކެތީގެ ދަތިކަން ކުރިމަތިވެފައި މި ވަނީ ކޮވިޑުގެ ހާލަތު ވަރަށް ބޮޑަށް ގޯސްވެ، ރިކޯޑް އަދަދަށް މީހުން މަރުވަމުން ދަނިކޮށެވެ. އެގޮތުން މިހާރު ކޮންމެ ދުވަހަކު 200 އަށް ވުރެ ގިނަ މީހުން މަރުވެ އެވެ.
ކޮވިޑު ބަލިމަޑުކަމާ ހެދި މިދިޔަ އަހަރު ލަންކާގެ އިގްތިސާދު ވަނީ ރިކޯޑު އަދަދުން 3.6 ޕަސެންޓު ފަހަތަށް ވެއްޓިފަ އެވެ. ބޭރު ފައިސާގެ ރިޒާވް ހުސްވަމުން ދާތީ، މިދިޔަ އަހަރުގެ މާޗް މަހުން ފެށިގެން ސަރުކާރުން ވަނީ ބައެއް ތަކެތި އިމްޕޯޓު ކުރުން ވެސް މަނާކޮށްފަ އެވެ.
