ޕެރިސް، ފްރާންސް (އޯގަސްޓު 31) - ކޮވިޑް ޖެހިގެން މުޅި ދުނިޔެއިން މަރުވި މީހުންގެ އަދަދު 4.5 މިލިއަނަށް އަރާފައިވާ ކަމަށް އޭއެފްޕީގެ ތަފާސްހިސާބުން ދައްކައިފި އެވެ.
ޑިސެމްބަރު 2019 ގައި ޗައިނާ އިން ފެތުރެން ފެށި މި ބަލީގައި މިހާރު ދުވާލެއްގެ މައްޗަށް މުޅި ދުނިޔެއިން މަރުވަމުން ދަނީ 10،000 އެއްހާ މީހުންނެވެ. މިއީ މިދިޔަ ޖެނުއަރީ މަހާ އަޅާ ބަލާއިރު މަދު އަދަދެކެވެ. އޭރު ކޮންމެ ދުވަހަކު ވެސް 14،800 މީހުން މަރުވަމުން ދިޔަ އެވެ.
މި ވަގުތު އެންމެ ގިނަ މީހުން މަރުވަމުން ދަނީ އެމެރިކާ ގަ އެވެ. މިދިޔަ ހަފްތާގައި ދުވާލަކު އެވްރެޖުކޮށް 1،290 މީހުން އެމެރިކާގައި ކޮވިޑް ޖެހިގެން މަރުވި އެވެ. މިދިޔަ ޖެނުއަރީ މަހު އެމެރިކާ އިން ދުވާލަކު މަރުވީ 3،800 މީހުންނެވެ. ނަމަވެސް ޖުލައި މަހާ ހަމައަށް ދިޔައިރު އެ އަދަދު ހުރީ 200 އިން ތިރީގަ އެވެ.
އެމެރިކާގައި އަނެއްކާވެސް ކޭސްތަކާއި މަރުތައް އިތުރުވެފައި މި ވަނީ ޑެލްޓާ ވޭރިއެންޓުގެ އަސަރު ގިނަ ގައުމުތަކަކަށް ކުރަމުންދާ ދަނޑިވަޅެއްގަ އެވެ. ޑެލްޓާ ވޭރިއެންޓު ފެނުނީ މިދިޔަ އޭޕްރިލް މަހު އިންޑިއާ އިންނެވެ.
ކޮވިޑުގައި މި އަހަރު މިހާތަނަށް މަރުވި މީހުންގެ އަދަދު ވަނީ 2020 ވަނަ އަހަރަށް ވުރެ އިތުރުވެފަ އެވެ. މި އަހަރުގެ އޯގަސްޓު މަހުގެ ނިޔަލަށް 2.6 މިލިއަން މީހުން މަރުވެފައި ވާއިރު މިދިޔަ އަހަރު މަރުވި މީހުންގެ ޖުމްލަ އަދަދަކީ 1.9 މިލިއަނެވެ.
ގައުމުތަކުން އުއްމީދު ކުރަނީ ވެކްސިން ދީގެން ވައިރަސް ފެތުރުން ކޮންޓްރޯލް ކުރުމަށެވެ. ނަމަވެސް ވެކްސިން ލިބުމުގައި މުއްސަނދި ގައުމުތަކާއި ފަގީރު ގައުމުތަކުގެ މެދުގައި ބޮޑު ފަރަގެއް އެބަ އޮތެވެ.
އެފްރިކާގައި ކޮންމެ 100 މީހެއްގެ ތެރެއިން މިހާތަަށް ވެކްސިންގެ އެއް ޑޯޒް ޖަހާފައި ވަނީ ހަތް މީހުންނެވެ. އެއާ ހިލާފަށް ޔޫރަޕުގައި ކޮންމެ 100 މީހަކުން 99 މީހުން ވަނީ އެއް ޑޯޒް ޖަހާފަ އެވެ.
އޭގެ އިތުރުން ޑެލްޓާ ވޭރިއެންޓާ ދެކޮޅަށް ވެކްސިނުން ލިބޭ ރައްކާތެރިކަން ވެސް ކުޑަ އެވެ. ނަމަވެސް ވެކްސިން ޖެހުމުން ބަލީގައި ހާލު ދެރަވާ މިންވަރު ކުޑަ އެވެ.
