ރައްޔިތުންގެ މަޖިލީހުގެ ކެނދިކުޅުދޫ ދާއިރާގެ މެންބަރު އަހުމަދު އީސަ، އޭނާގެ ކުރީގެ އަނބިކަނބަލުންނަށް އަނިޔާ ކުރި ކަމުގެ ތުހުމަތުވާ މައްސަލައިގައި ޝަރީއަތް ފެށުމަށް ތާވަލުކުރި އަޑުއެހުން މިއަދު ވެސް ކެންސަލްކޮށްފި އެވެ.
މިދިޔަ ޖޫން މަހު ވެސް މި މައްސަލާގައި ޝަރީއަތް ފެށުމަށް އަޑުއެހުމެއް ތާވަލުކުރި އެވެ. އެކަމަކު އެ އަޑުއެހުން ވެސް މައްސަލަ ބައްލަވާ ގާޒީ ސިއްހީ ސަބަބަކާހުރެ ސަލާމްގައި އެ ދުވަހު ހުންނެވުމުން ކެންސަލްކުރީ އެވެ.
މި މައްސަލަ ބައްލަވާ ގޮތަށް ހަމަޖެހިފައިވަނީ ގާޒީ ހުސެއިން ފާއިޒު ރަޝީދެވެ.
މިއަދު ހެނދުނަށް ތާވަލުކުރި އަޑުއެހުން ވެސް ކެންސަލްކުރީ، ކުރިމިނަލް ކޯޓުން ބުނި ގޮތުގައި ގާޒީ ފާއިޒު އާލާސްކަންފުޅާ އުޅުއްވާތީ ސަލާމްގައި ހުންނެވުމުންނެވެ.
ގާޒީ ފާއިޒު، މިއަދު ސަލާމް ނަންގަވާފައިވާއިރު، އިއްޔެ ވެސް މަސައްކަތުގައި އުޅުއްވި އެވެ.
އީސަގެ ޝަރީއަތް ނުފެށި ލަސްވެފައިވާއިރު، ގާޒީ ފާއިޒު ކަމަށް ބެލެވޭ މީހެއްގެ އޯޑިއޯ ލީކްވެ އޭނާއަށް ވަރަށް ބޮޑަށް ވަނީ ފާޑުކިޔުން އަމާޒުވެފަ އެވެ. އެ މައްސަލާގައި ޖޭއެސްސީއަށް ގާޒީ ހާޒިރުކޮށް، މައްސަލަ ބަލަން ވެސް ވަނީ ފަށާފަ އެވެ.
ކުރީގެ ރައީސް އަބްދުﷲ ޔާމީންގެ މައްޗަށް އިއްވި ހުކުމް އިއްވީ ނުފޫޒުކަމަށް ދޭހަވާ ގޮތަށް އެ އޯޑިއޯގައި ވާހަކަ ދައްކާފައިވާއިރު، އެއީ ސައްހަ އޯޑިއޯއެއް ނޫން ކަމަށް ޖޭއެސްސީގައި ގާޒީ ފާއިޒު ވަނީ ވިދާޅުވެފަ އެވެ.
އެ އޯޑިއޯގައި ގާޒީ ފާއިޒު ކަމަށް ބެލެވޭ މީހާ ބުނާ ގޮތުގައި ސިޔާސީ މީހެއްގެ މައްސަލަ ބަލަން ޖެހުމަކީ ވަރަށް އުނދަގޫވާ ކަމެކެވެ. ޝަރީއަތް ހިންގުމަށްފަހު ނުވެސް ނިދޭ ކަމަށް ބުނެ އެވެ.
މެންބަރު އީސައަށް ތުހުމަތުވާ މައްސަލައަކީ، އޭނާގެ އަނބިކަނބަލުން އަސްރާ ނަސީމްގެ ގައިގައި ތަޅައި މާރާމާރީ ހިންގައި، ދަރިފުޅު އަސްރާގެ އަތުން ގަދަކަމުން އަތުލައި ގޭގެ ބެލްކަނިން ބޭރަށް، މަގު މައްޗަށް އެ ކުއްޖާ ދިއްކޮށް ވައްޓާލައި މަރާލާނެ ކަމުގެ އިންޒާރު ދިން މައްސަލައެކެވެ.
އީސަގެ މައްޗަށް އުފުލި ދައުވާގެ ކުށަކީ ޖުނަހްގެ ދެ ވަނަ ދަރަޖައިގެ ކުށެކެވެ. ކުށުގެ އަދަބަކީ، ހަ މަސް ދުވަހަށް ވުރެ ދިގުނޫން މުއްދަތަކަށް ޖަލަށްލުމެވެ. ޖޫރިމަނާގެ އަދަބު ކަނޑައަޅާނަަމަ، އަދަބަކީ 24،000 ރުފިޔާއިން ޖޫރިމަނާ ކުރުމެވެ.
ގާނޫނު އަސާސީގައި ބުނެފައިވާ ގޮތުން މެންބަރެއްގެ ގޮނޑި ގެއްލޭނީ އެމީހެއްގެ މައްޗަށް 12 މަހަށްވުރެ ދިގު މުއްދަތެއްގެ ޖަލު ހުކުމެއް އައިސްފިނަމަ އެވެ. އެހެންކަމުން، މި މައްސަލަ އީސަގެ މައްޗަށް ސާބިތުވި ނަމަވެސް، ގޮނޑިއެއް ނުގެއްލޭނެ އެވެ.
އީސަގެ މައްޗަށް ކުރެވުނު ތުހުމަތުތަކާއެކު، އޭނާ ހައްޔަރުކުރަން ޕްރޮސިކިއުޓަ ޖެނެރަލް މެދުވެރިކޮށް ފުލުހުން ކޯޓު އަމުރަކަށް ވެސް އެދުނެވެ. އެކަމަކު އެ އަމުރު ނެރެދޭނެ ގާނޫނީ ސަބަބެއް ނެތް ކަމަށް ބުނެ ކުރިމިނަލް ކޯޓުން ނުރެނުދިނެވެ.
އެ މައްސަލައާ ގުޅިގެން އެމްޑީޕީގެ މަގާމުތަކުން ވެސް އީސަ ވަނީ ސަސްޕެންޑް ކޮށްފަ އެވެ. އަދި އިޖުތިމާއީ ކޮމެޓީގެ މުގައްރިރުކަމުން އީސަ ވަކިކުރަން މަސައްކަތް ފެށުމުން، އޭނާ ވަނީ އެ މަގާމުން އިސްތިއުފާ ދެއްވައިފަ އެވެ.
އީސަގެ މައްޗަށް ކުރެވޭ ގެވެށި އަނިޔާގެ ތުހުމަތުތައް ދޮގު ކުރައްވައި، ވިދާޅުވެފައިވަނީ ގާނޫނުތަކާއި ގަވާއިދުތަކާ ހިލާފު އެއްވެސް އަމަލެއް ކޮށްފައި ނުވާނެ ކަމަށެވެ.
