މިނިވަން މުއައްސަސާތަކަށް އައްޔަނުކުރާ ބޭފުޅުންނަށް ރައްޔިތުންގެ މަޖިލީހުގެ ކޮމިޓީ މަރުހަލާގައި ވޯޓު ދިނުމުގައި މަޖިލީހުގެ ގަވައިދުގައި އޮތް ބޮޑު ބާގަނޑެއްގެ މައްސަލަ ހައްލުނުވެ ދިގުލައިގެންދާތީ، އެކަމުގެ ޝަކުވާ ކޮމިޓީގެ މުގައްރިރު އަދި އައްޑޫ މީދޫ ދާއިރާގެ މެމްބަރު ރޮޒައިނާ އާދަމް އަނެއްކާވެސް ކުރައްވައިފި އެވެ.
މަޖިލީހުގެ ގަވައިދު ބުނާ ގޮތުން، ކޮމިޓީއަށް ހުށަހެޅޭ ނަމެއް ތަޅުމަށް ފޮނުވޭނީ ކޮމިޓީގައި ތިއްބަވާ މެމްބަރުންގެ ތިން ބައި ކުޅަ ދެ ބައި ވޯޓު ދެއްވައިފި ނަމަ އެވެ.
ގާނޫނުގައި މުޅި މަޖިލީހުގެ އަގުލަބިއްޔަތުން ފާސްކުރަންޖެހޭ ގޮތަށް އޮންނަ އިރު، މަޖިލީހުގެ ގަވައިދު އުޅެނީ އެއަށް ވުރެ އެއް ދަރަޖަ ކުރީގަ އެވެ.
އޭގެ މާނައަކީ ނަމެއް ތަޅުމަށް ފޮނުވަން ޖުމްލަ 12 މެމްބަރުން ތިއްބަވާ ކޮމިޓީގެ އަށް މެމްބަރުންގެ ވޯޓު ލިބެންޖެހެ އެވެ.
މިފަހުން އެ މައްސަލަ ފެންމަތިވެފައިވަނީ މިދިޔަ ޖޫން މަހުގެ ތެރޭގައި އިންފޮމޭޝަން ކޮމިޝަނަރުގެ މަގާމަށް ބޭފުޅަކު އައްޔަނުކުރަން ރައީސް އިބްރާހިމް މުހައްމަދު ސޯލިހު ފޮނުއްވި ހަތަރު ނަމެއް، ބޭނުންވާ އަދަދަށް ވޯޓު ނުލިބިގެން، އެކަން ދިގުލައިގެން ދިޔުމާ ގުޅިގެންނެވެ.
މައުލޫމާތު ހޯދާއި ލިބިގަތުމުގެ ހައްގުގެ ގާނޫނު ބުނާގޮތުން، ކޮމިޝަނަރުގެ މަގާމު ހުސްވާތާ ލަސްވެގެން 60 ދުވަހުގެ ތެރޭގައި އެ މަގާމަށް މީހަކު އައްޔަނުކުރަންޖެހޭ ގޮތަށް އޮތް ނަމަވެސް، އެކަން އަދިވެސް އޮތީ ނުވެ އެވެ.
އިންފޮމޭޝަން ކޮމިޝަނަރުގެ އިތުރުން އިލެކްޝަންސް ކޮމިޝަނުގެ ހުސްވެފައިވާ މެމްބަރުކަމަށް ބޭފުޅަކު އައްޔަނުކުރަން ކޮމިޓީން ނިންމާފައިވާ ގޮތުގެ ރިޕޯޓު މަޖިލީހުގެ މިއަދުގެ ޖަލްސާއަށް ހުށަހަޅުއްވަމުން ރޮޒައިނާ ވިދާޅުވީ އިންޓަވިއު މަރުހަލާ ކުރިއަށް ގެންދިއުމުގައި ބޮޑެތި ދަތިތައް ކުރިމަތިވަމުންދާ ކަމަށެވެ.
އެގޮތުން، ބައެއް ހާލަތްތަކުގައި ކޮމިޓީގައި އަށް މެމްބަރުން ތިބެގެން އެ މަރުހަލާ ކުރިއަށް ގެންދަންޖެހޭއިރު، އެންމެ މެމްބަރަކު ވޯޓު ނުދިނުމުން، ކިތަންމެ ގާބިލު ކެނޑިޑޭޓަކަށް ވިޔަސް، އެ ނަމެއް ތަޅުމަށް ނުފޮނުވޭކަން އޭނާ ފާހަގަކުރެއްވި އެވެ.
އޭގެ އިތުރުން، މާކްސް ދިނުމެއް ނެތި ހަމައެކަނި އަތް ނަގައިގެން ކެނޑިޑޭޓުންނަށް ވޯޓު ދޭއިރު، އަތް ނުނަގައި މެމްބަރަކަށް، ވޯޓު ނުދިން ސަބަބު ސާފުކޮށްދޭން ވެސް ނުޖެހޭކަމަށް ވިދާޅުވި އެވެ.
"އާންމުންނަކަށް ވެސް ޖަސްޓިފައިކޮށް ނުދެވޭ އެ ބޭފުޅެއްގެ ވޯޓު އެ ކެންޑިޑޭޓަކަށް ނުލިބުނީ ކޮން ސަބަބަކާ ހެދި ކަމެއް،" ރޮޒައިނާ ވިދާޅުވި އެވެ.
އޭނާ ވިދާޅުވި ގޮތުގައި، އެ މައްސަލަ ހައްލުކުރަން، ކޮމިޓީގެ އިއްތިފާގުން ފާސްކޮށް، ގަވައިދު އިސްލާހުކުރަން މަޖިލީހުގެ އާންމު ކޮމިޓީއަށް ފޮނުވިތާ ތިން އަހަރު ވެގެންދާއިރު، އެކަން އަދި މިހާތަނަށް އެޖެންޑާ ވެސް ކޮށްފައެއް ނުވެ އެވެ.
"މިފަހަރު ވެސް ވަރަށް ރަނގަޅު ކެނޑިޑޭޓުން އެބަތިބި ތަޅުމާ ހަމައަށް ނުފޮނުވި. މިއީ މަޖިލީހުގެ މެމްބަރުންނަށް ވެސް ރަނގަޅު ކެނޑިޑޭޓަކު ހޮވުމަށް ގެއްލިގެންދާ ފުރުސަތެއް،" ރޮޒައިނާ ވިދާޅުވި އެވެ.
އިތުރަށް ވިދާޅުވީ ކޮމިޓީން ކުރަނީ ޓެކްނިކަލް މަސައްކަތެއް ކަމަށް ވިޔަސް، ކެނޑިޑޭޓެއްގެ ގާބިލުކަން ވަޒަން ނުކުރެވޭ ކަމަށެވެ.
