ކާބުލް، އަފްގާނިސްތާން (އޯގަސްޓު 30) - މިއަދު ހެނދުނު ކާބުލް އެއާޕޯޓަށް ރޮކެޓު ހަމަލާތަކެއް ފޮނުވާފައިވާ ކަމަށް އެމެރިކާ އިން ބުނެފި އެވެ.
އަފްގާނިސްތާނުން މީހުން ފުރުވާލުމުގެ އޮޕަރޭޝަން ނިންމަން 48 ގަޑިއިރަށް ވުރެ ކުޑަ ވަގުތުކޮޅަކަށް ވެފައި ވަނިކޮށް ދިން ހަމަލާގައި އެއާޕޯޓުން ދުން އަރާ މަންޒަރު ފެނިފައި ވެ އެވެ.
މިއަދު ހެނދުނު ކާބުލް މަތިން ރޮކެޓުތައް ދަތުރު ކުރާ އަޑު ނޫސްވެރިންނަށް ވެސް އިވިފައި ވެ އެވެ. ނަމަވެސް ކުރިން ބެލެވިފައި އޮތީ އެއީ އެމެރިކާ އިން އިސްލާމިކް ސްޓޭޓް (އައިއެސް) އަށް ދިން ހަމަލާތަކެއް ކަމަށެވެ.
އެކަމަކު ވައިޓް ހައުސް އިން ވަނީ ކާބުލް އެއާޕޯޓަށް ހަމަލާތަކެއް ދިން ކަން ކަށަވަރުކޮށްދީފަ އެވެ. އެހެން ނަމަވެސް މީހުން ފުރުވާލުމުގެ އޮޕަރޭޝަން ހުއްޓާނުލާ ކަމަށް ބުންޏެވެ.
ސެކިއުރިޓީ އޮފިޝަލަކު ބުނީ ރޮކެޓުތައް ފޮނުވީ ކާބުލްގެ އުތުރުގައި އޮތް ކާރަކުން ކަމަށެވެ. އެއާއެކު މިސައިލް ޑިފެންސް ސިސްޓަމް އެކްޓިވޭޓްވި އަޑު ކާބުލްގައި ފެތުރުނެވެ.
ސޯޝަލް މީޑިއާގައި ދައުރުވަމުންދާ ވީޑިއޯތަކުން ފެންނަނީ ރައްދުގައި އެމެރިކާ އިން ހަމަލާ ދިނުމުން ކާރުގައި ރޯވެފައި އޮތް މަންޒަރެވެ. ނަމަވެސް އެ ވީޑިއޯތަކުގެ ސައްހަކަން ކަށަވަރު ކުރެވިފައެއް ނުވެ އެވެ.
އަފްގާނިސްތާނުގައި ތިބި އެމެރިކާ ސިފައިންނާއި ރައްޔިތުން އަނބުރާ ގައުމަށް ގެންދަން ރައީސް ޖޯ ބައިޑެން ކަނޑައެޅުއްވި ސުންގަޑިއަކީ އޯގަސްޓު 31 އެވެ. ސެޕްޓެމްބަރު 11، 2001 ގެ ހަމަލާއަށް ފަހު އެމެރިކާ ސިފައިން ވަނީ 20 އަހަރު އަފްގާނިސްތާނުގެ ފަސްގަނޑުގައި މަޑުކޮށްފަ އެވެ.
އޭރު އެމެރިކާ އިން އަފްގާނިސްތާނަށް އަރައި ތާލިބާނުންގެ ވެރިކަން ވައްޓާލި އެވެ. ނަމަވެސް މީގެ ދެ ހަފްތާ ކުރިން ތާލިބާނުން ވަނީ ހައިރާން ކުރުވަނިވި ގޮތަކަށް އަލުން ވެރިކަމަށް އައިސްފަ އެވެ. އެއާއެކު އެތައް ހާސް ބަޔަކު ވަނީ ގައުމުން ފުރަން ބޭނުންވެ ކާބުލް އެއާޕޯޓަށް ޖަމާވެފަ އެވެ.
އެމެރިކާގެ ފްލައިޓުތަކުގައި މިހާތަނަށް 114،000 އަށް ވުރެ ގިނަ މީހުން ފުރާފައި ވާއިރު، އޭގެ ތެރޭގައި ގިނައިން ހިމެނެނީ އަފްގާން ރައްޔިތުންނެވެ. އެމެރިކާގެ އެންމެ ފަހު ފްލައިޓު ކާބުލް އެއާޕޯޓުން ފުރާނީ މާދަމާ އެވެ. އޭގެ ފަހުން އެމެރިކާގެ އެހީގައި އަފްގާނިސްތާނުން ފުރުމުގެ ދޮރު ބަންދުވާނެ އެވެ.
ގިނަ އަފްގާން ރައްޔިތުން ފުރަން ބޭނުންވި ނަމަވެސް، އެމެރިކާ އިން މި ވަގުތު އިސްކަން ދެނީ އެ ގައުމުގެ ރައްޔިތުންނަށެވެ. އެގޮތުން އެމެރިކާ ސިފައިންނާއި ޑިޕްލޮމެޓުން ރައްކާތެރިކަމާ އެކު ފުރުވާލެވޭތޯ ދަނީ މަސައްކަތް ކުރަމުންނެވެ.
މީހުން ފުރުވާލުމުގެ އޮޕަރޭޝަނަށް އޮތް އެންމެ ބޮޑު ނުރައްކަލަކީ ތާލިބާނުންނާ ވާދަވެރި އިސްލާމިކް ސްޓޭޓް (އައިއެސް) ގްރޫޕެވެ. މިދިޔަ ބުރާސްފަތި ދުވަހު ކާބުލް އެއާޕޯޓު ބޭރުގައި ބޮން ގޮއްވައިގެން އައިއެސް އިން ވަނީ 100 އަށް ވުރެ ގިނަ މީހުން މަރާލާފަ އެވެ. އޭގެ ތެރޭގައި އެމެރިކާ ސިފައިންގެ 13 މީހުން ހިމެނެ އެވެ.
