ކާބުލް، އަފްގާނިސްތާން (އޯގަސްޓު 29) - މީގެ ކުރިން ދުވަހަކު ވެސް އާއްމުކޮށް ފެނިފައި ނުވާ އަދި އުޅޭ ނޫޅޭ ތަނެއް އެނގިފައި ނުވާ ތާލިބާނުންގެ އެންމެ އިސް ލީޑަރު ހުރީ އަފްގާނިސްތާނުގައި ކަމަށް ތާލިބާނުން ކަށަވަރުކޮށްދީފި އެވެ.
"އޭނާ ހުރީ ކަންދަހާރުގައި. ފެށުނީއްސުރެ ވެސް ދިރިއުޅެމުން ދަނީ އެ ތަނުގައި،" ތާލިބާނުންގެ ތަރުޖަމާނު ޒަބީހުﷲ މުޖާހިދު އާދީއްތަ ދުވަހު ބުންޏެވެ.
"އޭނާ ވަރަށް އަވަހަށް އާއްމުކޮށް ފެންނާނެ،" ޑެޕިއުޓީ ތަރުޖަމާނު ބިލާލް ކަރީމީ ބުންޏެވެ.
ތާލިބާނުންގެ އެންމެ އިސް ލީޑަރުކަމަށް ހިބާތުﷲ އަހުންދްޒާދާ އައީ 2016 ވަނަ އަހަރު އެވެ.
ތާލިބާނުން ހިންގުމުގައި އަހުންދްޒާދާ އަދާ ކުރާ ދައުރާބެހޭ މާ ބޮޑު މައުލޫމާތެއް އެނގިފައެއް ނުވެ އެވެ. ނަމަވެސް މުސްލިމުން ފާހަގަކުރާ އީދުތަކާއި ހާއްސަ ދުވަސްތަކާ ދިމާކޮށް އޭނާގެ މެސެޖުތައް ގަވާއިދުން ނެރެ އެވެ.
މީގެ ދެ ހަފްތާ ކުރިން ހައިރާން ކުރުވަނިވި ގޮތަކަށް ތާލިބާނުން ވެރިކަމަށް އައުމާ ގުޅިގެން މިހާތަނަށް އޭނާ ބަޔާނެއް ވެސް ނެރެފައެއް ނުވެ އެވެ.
ތާލިބާނުންނަކީ ފެށުނީއްސުރެ ވެސް އެ މީހުންގެ އެންމެ އިސް ލީޑަރު "ފޮރުވައިގެން" އުޅޭ ބަޔެކެވެ. އެ މީހުންގެ ފައުންޑަރު މުއްލާ އުމަރަކީ ވެސް އާއްމުކޮށް ފެނުނު މީހެއް ނޫނެވެ.
ރަށްފުށުގެ ހިސާބުގަނޑުގައި ދިރިއުޅެން އޭނާ ހިޔާރު ކުރި އެވެ. ނަވާރަ ސަތޭކަ ނުވަދިހައިގެ އަހަރުތަކުގައި ތާލިބާނުން ވެރިކަން ކުރިއިރު ވެރިރަށް ކާބުލް އަށް އޭނާ ދަތުރުކުރީ ވެސް މަދު ފަހަރަކު ކަމަށް ވެ އެވެ. އޭގެ ބަދަލުގައި އޭނާ ގިނަ ވަގުތު ހޭދަކުރީ ކަންދަހާރުގައި ހަދާފައި ހުރި ސެކިއުރިޓީ ވަރުގަދަ ކޮމްޕައުންޑެއްގަ އެވެ.
ތާލިބާނުންނާ ބައްދަލުކުރަން ދިޔަ ވަފުދުތަކާ ބައްދަލުކުރުމަކީ ވެސް ވަރަށް މަދުން ނޫނީ އޭނާ ކުރި ކަމެއް ނޫނެވެ. އެކަމަކު ވެސް އޭނާގެ ބަހަކީ ތާލިބާނުންގެ އެންމެ އިސް ބަހެވެ. އަދި މުއްލާ އުމަރަށް ވުރެ ބޮޑަށް އިހްތިރާމް ލިބިފައިވާ ތާލިބާން ވެރިއަކު މިހާތަނަށް އައިސްފައެއް ނުވެ އެވެ.
ތާލިބާނުން އުފެދުނީ ކަންދަހާރުގަ އެވެ. އެ މީހުންގެ ފުރަތަމަ ވެރިކަމުގައި މައި މަރުކަޒެއްގެ ގޮތުގައި އޮތީ ވެސް ކަންދަހާރެވެ.
