މެޑްރިޑް (އޮގަސްޓް 30) - ސްޕެނިޝް ލީގުގައި ރޭ މެމްފިސް ޑިޕާއިގެ ގޯލުން 2-1 އިން ގެޓަފޭ އަތުން ބާސެލޯނާ މޮޅުވިއިރު، ފަހު ވަގުތު އެތުލެޓިކޯ މެޑްރިޑުން ގޯލު ޖަހައި ވިޔަރެއާލާ 2-2 އިން އެއްވަރުކޮށްފި އެވެ.
ރޭގެ ނަތީޖާތަކަށް ފަހު އިންޓަނޭޝަނަލް ބްރޭކަށްދާއިރު، ލީގުގެ އެއް ވަނައިގައި އޮތީ ރެއާލް މެޑްރިޑް އެވެ. ރެއާލަށް ވަނީ ތިން މެޗުން ހަތް ޕޮއިންޓް ލިބިފަ އެވެ. ރެއާލް އެކޭ އެއްގޮތަށް ސްޕެނިޝް ލީގުގެ ގަދަ ހަ ޓީމަށް ވެސް ވަނީ ފުރަތަމަ ތިން މެޗުން ހަތް ޕޮއިންޓް ލިބިފަ އެވެ. އެ ޓީމުތައް މަގާމުތަކަށް ބެހިފައި އޮތީ ލަނޑުގެ ތަފާތުންނެވެ.
ދެ ވަނައިގައި ސެވިއްޔާ އޮތްއިރު، ތިން ވަނައިގައި އޮތީ ވެލެންސިއާ އެވެ. ހަތަރު ވަނައިގައި ބާސެލޯނާ އޮތްއިރު، ފަސް ވަނައިގައި އޮތީ އެންމެ ފަހުގެ ޗެމްޕިއަން އެތުލެޓިކޯ އެވެ. އަދި ހަ ވަނައިގައި އޮތީ މަޔޯކާ އެވެ. ހަތް ވަނައިގައި އޮތީ ހަ ޕޮއިންޓާ އެކު ރެއާލް ސޮސިއެޑާޑް އެވެ.
ބާސެލޯނާ ދަނޑުގައި ރޭ ކުޅުނު މެޗު ފަށައިގެން ދެ ވަނަ މިނިޓް ތެރޭ ސާޖީ ރޮބާޓޯ ވަނީ އެ ޓީމަށް ލީޑުނަގައިދީފަ އެވެ. ޖޯޑީ އަލްބާ ނަގައިދިން ހުރަހަކުން ސާޖީ ރޮބާޓޯ ވަނީ ގެޓަފޭ އޭރިއާތެރެއިން ވެއްޓިގެންފައި ބޯޅަ ގޯލުގެ ތެރެއަށް ފޮނުވާލައިފަ އެވެ. ބާސެލޯނާ އަށް ލީޑު ހިފަހައްޓައިލެވުނީ 16 މިނިޓް ވަންދެނެވެ.
މެޗުގެ 18 ވަނަ މިނިޓްގައި ގެޓަފޭގެ މި ގޯލު ޖެހީ ކުރިން ބާސެލޯނާ އަށް ކުޅުނު ސަންޑްރޯ އެވެ. ބާސެލޯނާ އޭރިއާތެރެއިން ސަންޑްރޯ އަށް ލިބުނު ފުރުސަތުން އޭނާ ވަނީ ގޯލުގެ ތެރެއަށް ބޯޅަ ފޮނުވާލައިފަ އެވެ. ސަންޑްރޯ ގޯލު ޖަހަން ފުރުސަތު ތަނަވަސްކޮށްދިން ކާލެސް އަލޭނިއާ އަކީ ވެސް ކުރިން ބާސެލޯނާ އަށް ކުޅުުނު ކުޅުންތެރިއެކެވެ.
ފުރަތަމަ ހާފް ނިމުމުގެ ކުރިން ބާސެލޯނާ އަށް އަލުން ލީޑުނަގައިދިނީ ޑިޕާއި އެވެ. މިއީ ޑިޕާއި ޖެހިޖެހިގެން ގޯލު ޖެހި ދެ ވަނަ މެޗެވެ. ދެ ވަނަ ހާފުގައި އިތުރު ގޯލެއް ޖަހަން ކުރި މަސައްކަތް ކާމިޔާބެއްނުވި އެވެ.
އެތުލެޓިކޯ ދަނޑުގައި ރޭ ކުޅުނު މެޗުގައި ހަތަރު ގޯލު ވެސް ފެނުނީ ދެ ވަނަ ހާފްގަ އެވެ. މެޗުގެ 52 ވަނަ މިނިޓްގައި ވިޔަރެއާލަށް ލީޑުނަގައިދިނީ މަނޫ ޓްރިގޭރޯސް އެވެ. އޭގެ ހަތަރު މިނިޓް ފަހުން އެންހެލް ކޮރޭއާ ދިން ބޯޅައަކުން ލުއިސް ސުއަރޭޒް ވަނީ އެތުލެޓިކޯ އަށް އެއްވަރުކޮށްދީފަ އެވެ. ބަދަލު ކުޅުންތެރިއެއްގެ ގޮތުގައި ކުޅެން އަރައި އާނައުޓް ޑަންޖޫމާ ވަނީ ވިޔަރެއާލަށް މެޗުގައި ދެ ވަނަ ފަަހަރަށް ލީޑުނަގައިދީފަ އެވެ.
ވިޔަރެއާލް މޮޅުވާން ދަނިކޮށް އެތުލެޓިކޯ އިން އެއްވަރުކުރީ މެޗުގެ އިތުރު ވަގުތުގަ އެވެ. މި ގޯލަކީ ވިޔަރެއާލްގެ އަލްޖީރިއާ ޑިފެންޑަރު އައިސާ މަންޑީ އަތުން ބައިކޮޅަށް ވަން ގޯލެކެވެ. ވިޔަރެއާލްގެ ކީޕަރު ޖެރޮނީމޯ ރޫލީ އަށް ދޭން މަންޑީ ބޮލުން ފަހަތަށް ޖައްސާލި ބޯޅަ ވަނީ ބައިކޮޅަށެވެ.
އެތުލެޓިކޯގެ ކޯޗު ޑިއޭގޯ ސިމިއޯނީ ބުނީ މިއީ ހަގީގަތުގައި ނަތީޖާ އަށް ބަލާއިރު ހިތްހަަމަ ނުޖެހުނު ކަމުގައި ވިޔަސް ކުޅުމަށް ބަލާއިރު އެތުލެޓިކޯ އިން އެންމެ ރަނގަޅަށް ކުޅުނު މެޗު ކަމަށެވެ.
