ރާއްޖެޓީވީގައި ރޯކޮށް ގެއްލުން ދިން މައްސަލައިގެ ޝަރީއަތުގެ އަޑުއެހުންތައް ނިމި، އަށް އަހަރު ފަހުން ހުކުމާ ހަމަޔަށް ގޮސްފި އެވެ.
ބީކޭޓީ ބިލްޑިންގައި އޭރު ހިންގަމުންދިޔަ ރާއްޖެޓީވީގެ އިމާރާތުގައި ރޯކޮށްލީ 2013 ވަނަ އަހަރުގެ އޮކްޓޯބަރު މަހުގެ ފަސް ވަނަ ދުވަހުގެ ރޭ ފަތިހު 4:42 އެހާކަންހާއިރު އެވެ.
ދޮރު ހަލާކުކޮށްލައިގެން ވަދެ، ތެޔޮ ޖެހުމަށްފަހު ހުޅުޖެހުމުގެ ސަބަބުން ބިލްޑިންގައި ރާއްޖެޓީވީގެ ހުރިހާ އިކުއިޕްމަންޓެއް ބޭނުން ނުކުރެވޭ ވަރަށް އެނދި އެވެ. އަދި އެ ބިލްޑިންގައި ހުންނަ ކޮމްޕިއުޓާ ޕްލަސްގެ ގުދަނުގައި ހުރި ހުރިހާ ތަކެއްޗެއް ވެސް އެނދި އެވެ.
މައްސަލައިގައި ޓެރަރިޒަމްގެ ދައުވާ އުފުލުމަށް ފުލުހުން ފަސް މީހެއްގެ މައްސަލަ ފޮނުވި ނަމަވެސް، ދައުލަތުން ދައުވާ އުފުލާފައިވަނީ ހ. ގަސްވާ، މުހައްމަދު މީއާދުގެ މައްޗަށް އެކަންޏެވެ. އޭނާގެ ޝަރީއަތް ނުނިމި، އެތައް އަހަރެއް ވެގެން ދިޔުމަށްފަހު، މިއަދު ވަނީ މައްސަލައިގެ ހުލާސާ ބަޔާން އިއްވުމަށް އަޑުއެހުމެއް ބާއްވާފަ އެވެ.
މައްސަލައިގެ އެންމެ ފަހު އަޑުއެހުމުގައި ދައުލަތުގެ ވަކީލް ހުލާސާ ބަޔާން އިއްވަމުން ވިދާޅުވި ގޮތުގައި، މައްސަލައިގައި ދައުލަތުން ހުށަހެޅި ހެކިތަކުން މީއާދުގެ މައްޗަށް އެކަށީގެންވާ ޝައްކެއް ނެތް މިންވަރަށް ކުށް ސާބިތުވެ އެވެ. އަދި، ދިފާއުގައި މީއާދުގެ ފަރާތުން ހުށަހެޅި ހެކިންގެ ހެކި ބަހުގައި ސާފުނުވާ ކަންތައްތަކެއް ހުރި ކަމަށް ވިދާޅުވި އެވެ.
މީއާދު ދިފާއުވާން ހުށަހެޅީ، އޭނާގެ އެކުގައި ދަތުރު ދިޔަ އެކުވެރިންތަކެކެވެ. އެއީ، އޭނާގެ ހަށިގަނޑުގައި ހުރި ނިޝާންތަކަކީ ދަތުރުގައި ލިބުނު އަނިޔާތަކެއްގެ ނިޝާންތަކެއްކަން ސާބިތުކުރުމަށެވެ. މީއާދުގެ ކަނާއަތުން އަނދާފައިވާ ކަމުގެ ނިޝާންތަކެއް އޭރު ހުއްޓެވެ.
މައްސަލާގައި މީއާދާ ދެކޮޅަށް ބޭނުންކުރި އެންމެ ބޮޑު ހެއްކަކީ އަންގި އެވެ. އެ އަންގި، ރާއްޖޭޓީވީގައި ރޯކޮށްލާ މަންޒަރު ފެންނަ ސީސީޓީވީ ފްޓޭޖުން ފެނެ އެވެ. ފަހުން، އެ ސަރަހައްދު މަގުމަތިން ފުލުހުން ވަނީ އަންގީގެ އެއް ކިބަ ހޯދައިފަ އެވެ.
ދައުލަތުން ހުށަހެޅި ހެކިން އެނގޭ ގޮތުގައި އެ އަންގި ކިބައިން މީއާދުގެ ޑީއެންއޭ ވަނީ ފެނިފަ އެވެ. އަދި، ސީސީޓީވީ ފްޓޭޖުން ފެންނަ އަންގި އާއި ފުލުހުން ހޯދި އަންގިއާ އެއްގޮތް ސިފަތަކެއް ފާހަގަ ކުރެވުނެވެ. އެހެންވެ، އެ އަންގިއާ މީއާދާ ވަނީ ދައުލަތުން ގުޅުވާފަ އެވެ.
ނަމަވެސް، މީއާދުގެ ވަކީލް އަހުމަދު ޝާފިއު ދިފާއުގައި ހުލާސާ ބަޔާން އިއްވަމުން، އެ ހެއްކާ ގުޅޭ މައްސަލަތަކެއް ވަނީ ފާހަގަ ކުރެއްވި އެވެ. އެގޮތުން އަންގިން ޑީއެންއޭ ހޯދީ ކޮން އެއްޗަކުން ސާފުކޮށް ދެވިފައި ނެތް ކަމެވެ. އެ އަންގި މަގުމަތިން ހޯދިިއިރު އެއަށް އެހެން މީހެއްގެ އިސްތައްޓެއް ފަދަ އެއްޗެއް ވެއްޓުމުގެ ފުރުސަތު އޮންނާނެ ކަމަށް ވިދާޅުވި އެވެ.
އޭގެ އިތުރުން ވީޑިއޯއަށް ބަލައިގެން އަންގީގެ ދެ ސިފަ އެއްގޮތް ކޮށްފައިވާއިރު، އެއީ ގިނަ އަންގިތައް ހުންނާނެ ގޮތްކަން ވަކީލް ފާހަގަ ކުރެއްވި އެވެ. އަދި، އަންގީގެ ރިޕޯޓް ހެދި ފަރާތުން އެއީ ކަޅު އަންގިއެއް ކަމަށް ބުނާއިރު އެ ނެގި ފުލުހުން އެއީ ހުދު ނޫނީ އަޅި އަންގިއެއް ކަމަށް ބުނެފައިވާކަން ވަކީލް ފާހަގަ ކުރެއްވި އެވެ.
ވަކީލް ފާހަގަ ކުރެއްވި ގޮތުގައި، ދައުލަތުން ހުށަހެޅި ހެކިންގެ ހެކި ބަހުގައި ތެދު ބަސް ބުނަނީ ކާކުކަން ނޭނގޭ މިންވަރަށް ފުށުއެރުންތައް އެބަ ހުއްޓެވެ. އެހެންވެ، އޭގެ ފައިދާ މީއާދަށް ލިބިދީ، މައްސަލަ ނިންމާއިރު އޭނާގެ ފަރާތުން ދިފާއުގައި ހުށަހެޅި ހެކިންނަށް ރިއާޔަތްކޮށްދިނުމަށް ވަކީލް ޝާފިއު އެދުނެވެ.
ދެ ފަރާތުން ހުލާސާ ބަޔާން އިއްވުމުން މައްސަލަ ބައްލަވާ ގާޒީ އަލީ އާދަމް ވަނީ މައްސަލައިގެ އަޑުއެހުންތައް ނިންމަވާލައްވާފަ އެވެ. އަދި، ދެން އޮންނާނީ ހުކުމް އިއްވުމުގެ މަޖިލީސް ކަމަށް ވިދާޅުވި އެވެ. ނަމަވެސް، އެ މަޖިލިސް ތާވަލު ކުރެއްވި ދުވަހެއް ގާޒީ އިއުލާނެއް ނުކުރައްވަ އެވެ.
