އދ.ގެ އާންމު މަޖިލީހުގެ ރިޔާސަތާ ހަވާލުވާން، ފޮރިން މިނިސްޓަރު އަބްދުﷲ ޝާހިދު އެމެރިކާއަށް ވަޑައިގެންފި އެވެ.
އދ.ގެ 76 ވަނަ އާންމު މަޖިލިހުގެ ރިޔާސަތަށް ޝާހިދު ހޮވިވަޑައިގެންނެވީ، މިދިޔަ ޖޫން މަހު ނެގި ވޯޓުގައި އދ. ގެ މެމްބަރު 193 ގައުމުގެ ތެރެއިން 143 ގައުމުގެ ތާއީދާ އެކުގަ އެވެ.
ނިއުޔޯކަށް ވަޑައިގެން، ޝާހިދާއެކު މަސައްކަތްކުރައްވާ އިސް ބޭފުޅުންނާ ބައްދަލުކުރެއްވުމަށް ފަހު ކުރެއްވި ޓްވީޓެއްގައި އޭނާ ވިދާޅުވީ 76 ވަނަ އާންމު މަޖްލިސް އަންނަ މަހުގެ 14 ވަނަ ދުވަހު ހުޅުވަން ތައްޔާރުވަމުން އަންނަ ކަމަށެވެ.
އަދި މަގާމުގެ މަސްއޫލިއްޔަތު ބަދަލުކުރުމަށްޓަކައި މެމްބަރު ގައުމުތަކާއި ސެކްރެޓޭރިއަޓާއި ކަމާ ގުޅޭ އެހެން ފަރާތްތަކާ އެކު ބައްދަލުވުންތައް ބާއްވަން ތައްޔާރުވަމުން އަންނަ ކަމަށް ވެސް ވިދާޅުވި އެވެ.
ޝާހިދު އެމެރިކާއަށް ވަޑައިގެންފައިވަނީ، އާންމު މަޖިލީހުގެ ރައީސްގެ ހައިސިއްޔަތުން ޖަޕާނަށް ކުރެއްވި ރަސްމީ ދަތުރުފުޅަށްފަހު އެ ގައުމުންނެވެ.
އޭނާ ޖަޕާނަށް ކުރެއްވި ދަތުރުގައި އެ ގައުމުގެ ބޮޑުވަޒީރު ޔޮޝިހިޑޭ ސޫގާއާ ބައްދަލުކުރެއްވި އެވެ. އދ.ގެ އާއްމު މަޖިލީހުގެ ރިޔާސަތާ ހަވާލުވެވަޑައިގެން ކުރައްވާނެ މަސައްކަތްތަކާ ބެހޭ ގޮތުން ޖަޕާނުގެ ބޮޑުވަޒީރަށް ޝާހިދު މައުލޫމާތު ދެއްވި އެވެ.
މަގާމާ ހަވާލުވެވަޑައިގެންނެވުމުގެ ކުރިން ޝާހިދު ވަނީ އެ މަގާމުގެ ހައިސިއްޔަތުން ކުރައްވާ ރަސްމީ ދަތުރުފުޅުތަކުގެ ފުރަތަމަ މަންޒިލަކަށް އަވަށްޓެރި އިންޑިއާއަށް ވެސް ވަޑައިގެންފަ އެވެ.
އެ މަގާމުގެ އިންތިހާބުގެ ކެމްޕޭނަށް ވެސް ޝާހިދު ވަނީ ދެ މަހެއްހާ ދުވަހު އެމެރިކާގައި ހޭދަކުރައްވައިފަ އެވެ.
އާންމު މަޖިލީހުގެ އާ ދައުރާއެކު ޝާހިދު ރިޔާސަތާ ހަވާލުވެވަޑައިގަންނަވާއިރު، ގިނަ ވަގުތު އޭނާ އެމެރިކާގައި ހުންނަވަން ޖެހިވަޑައިގަންނަވާނެކަމަށް މިނިސްޓްރީން ބުނެ އެވެ.
އެކަމާ ގުޅިގެން، ވަޒީރު ކަމުގައި ހުންނަވައިގެން، އެހާ ގިނަ ވަގުތު ރާއްޖޭން ބޭރުގައި ހުންނަވަންޖެހުމާ ގުޅިގެން ބައެއް ފާޑުކިޔުންތައް ޝާހިދަށް ވަނީ އަމާޒުވެފަ އެވެ.
ނަމަވެސް، ސަރުކާރުން ބުނަނީ ދެ މަގާމުގައި ޝާހިދު ހުންނެވުމުން ރާއްޖެއަށް ލިބޭނެ ފައިދާތައް ބޮޑުވާނެކަމަށް ބުނާއިރު، އެ މަގާމުގެ ހައިސިއްޔަތުން އިންޑިއާ އާއި ޖަޕާނަށް ކުރެއްވި ރަސްމީ ދަތުރުފުޅުތަކުގައި ވެސް އޭނާ ވަނީ ރާއްޖެއާއެކު އޮންނަ ގުޅުން އިތުރަށް ބަދަހިކުރަން އެ ދެގައުމުގެ އެންމެ އިސް ލިޑަރުންނާ މަޝްވަރާ ކުރައްވައިފަ އެވެ.
