ކޮލޮމްބޯ، ސްރީ ލަންކާ (އޯގަސްޓު 27) - ކޮވިޑް ޖެހިގެން މަރުވި މީހުންގެ އަދަދު ރިކޯޑް މިންވަރަށް މައްޗަށް ދިޔުމާއެކު ސްރީ ލަންކާގައި އިއުލާނުކޮށްފައިވާ ލޮކްޑައުން އިތުރު އެއް ހަފްތާއަށް ދަމަހައްޓަން ނިންމައިފި އެވެ.
ހުކުރު ދުވަހު އާއްމުކުރި ތަފާސްހިސާބުން ދެއްކި ގޮތުގައި 24 ގަޑިއިރު ތެރޭ 200 އަށް ވުރެ ގިނަ މީހުން މަރުވެފައި ވެ އެވެ. އެއީ އަދަދުތައް 200 އަށް ވުރެ މަތިވި ފުރަތަމަ ފަހަރެވެ.
ހެލްތު މިނިސްޓަރު ކެހެލިޔާ ރަމްބުކްވެލާ ވިދާޅުވީ އަންނަ އަންގާރަ ދުވަހު ލޮކްޑައުން ނިންމަން ހަމަޖެހިފައި އޮތް ނަމަވެސް، ސެޕްޓެމްބަރު ހަޔަކާ ހަމައަށް ދިގުދަންމާލާފައިވާ ކަމަށެވެ.
ދުނިޔޭގެ ސިއްހަތު ޖަމިއްޔާ (ޑަބްލިއުއެޗްއޯ) ހިމެނޭ ގޮތަށް 33 ޖަމިއްޔާއަކުން ވަނީ މިހާރު އަޅާފައިވާ ފިޔަވަޅުތައް އިތުރަށް ވަރުގަދަ ކުރުމަށް ލަންކާ ސަރުކާރަށް ގޮވާލާފަ އެވެ.
މީގެ ކުރިން ވެސް ލޮކްޑައުނަށް ޕްރެޝަރު ކުރުމުގެ ރައީސް ގޮތަބަޔާ ރާޖަޕަކްސަ ވަނީ އެކަމަށް ދެކޮޅު ހައްދަވާފަ އެވެ. އެންމެ ފަހުން 10 ދުވަހަށް ލޮކްޑައުން ކުރީ އޯގަސްޓު 20 ވަނަ ދުވަހު ހޮސްޕިޓަލްތައް ފުރި، ގަބުރުތައް ފުނި ޖެހެން ފެށުމުންނެވެ.
ލަންކާގައި މިހާތަނަށް ޖުމްލަ 8،000 އަށް ވުރެ ގިނަ މީހުން ކޮވިޑް ޖެހިގެން މަރުވެފައި ވާއިރު، 412،370 މީހުން ވަނީ ޕޮޒިޓިވްވެފަ އެވެ.
ސިއްހީ ތަޖުރިބާކާރުން ވަނީ ލޮކްޑައުންގެ މުއްދަތު އިތުރު ކުރަން ގޮވާލާ ރިޕޯޓެއް ތައްޔާރުކޮށްފަ އެވެ. އޭގައިވާ ގޮތުން އޮކްޓޯބަރު ދެ ވަނަ ދުވަހާ ހަމައަށް ލޮކްޑައުންކޮށްގެން 10،000 މީހުންގެ ފުރާނަ ސަލާމަތް ކުރެވޭނެ އެވެ.
