ނިއު ދިއްލީ، އިންޑިއާ (އޯގަސްޓު 28) - އެއް ދުވަސް ތެރޭ 10 މިލިއަން މީހުންނަށް ކޮވިޑް ވެކްސިން ދީގެން އިންޑިއާ އިން މިދިޔަ ހުކުރު ދުވަހު ރިކޯޑެއް ހަދައިފި އެވެ.
އޭގެ ކުރިން އެއް ދުވަސް ތެރޭ އެންމެ ގިނަ އަދަދަކަށް ވެކްސިން ދިނީ 9.2 މިލިއަން މީހުންނަށެވެ.
މިދިޔަ އޭޕްރިލް އަދި މޭ މަހު ޑެލްޓާ ވޭރިއެންޓާ އެކު އިންޑިއާގައި 200،000 އަށް ވުރެ ގިނަ މީހުން މަރުވިއިރު، ވެކްސިންގެ ދަތިކަން ވެސް ދިމާވުމުން ފާޑުކިޔުން އަމާޒުވި އެވެ.
ބޮޑު ވަޒީރު ނަރެންދްރަ މޯދީ ވިދާޅުވީ 1.3 ބިލިއަން މީހުން ދިރިއުޅޭ އިންޑިއާ އަށް ހުކުރު ދުވަހު ހޯދުނީ ބޮޑު ކާމިޔާބެއް ކަމަށާއި ވެކްސިން ޕްރޮގްރާމުގައި އުޅޭ ފަރާތްތަކަށް ޝުކުރުއަދާ ކުރާ ކަމަށެވެ.
ސަރުކާރުން ކުރިން އަމާޒު ކުރީ މި އަހަރު ނިމުމުގެ ކުރިން 1.1 ބިލިއަން މީހުންނަށް ވެކްސިން ދިނުމަށެވެ. ނަމަވެސް ވެކްސިން ހުސްވުމާއި އިދާރީ މައްސަލަތަކާ ހެދި ކުރިއަށް ދަނީ މަޑު ދުވެއްޔެއްގަ އެވެ.
މިދިޔަ ޖެނުއަރީ މަހު ފެށި ވެކްސިން ޕްރޮގްރާމުގައި މިހާތަނަށް ދެ ޑޯޒް ފުރިހަމަކޮށްފައި ވަނީ އެންމެ 15 ޕަސެންޓު މީހުންނެވެ. މި ވަގުތު ދުވާލެއްގެ މައްޗަށް ފެންނަ ކޭސްތައް ވަނީ ވަރަށް ބޮޑަށް ދަށްވެފަ އެވެ.
ބޮޑެތި ލުއިތަކެއް ދީފައި ވާއިރު، ވަރަށް އަވަހަށް ބަލީގެ އާ ރާޅެއް ކުރިމަތިވުމުގެ ބިރު އެބަ އޮތް ކަމަށް ތަޖުރިބާކާރުން ބުނެ އެވެ. މިހާރު މަޑުމަޑުން ދަނީ ކޭސްތައް އިތުރުވަމުންނެވެ.
އެގޮތުން މިދިޔަ ހޮނިހިރު ދުވަހު 500 މީހުން މަރުވެ، 46،000 މީހުން ޕޮޒިޓިވްވި އެވެ. އެއީ ދެ މަހަށް ފަހު އަދަދުތައް އެހާ މައްޗަށް ދިޔަ ފުރަތަމަ ފަހަރެވެ.
