ކާބުލް، އަފްގާނިސްތާން (އޯގަސްޓު 26) - ކާބުލް އެއާޕޯޓު ބޭރުގައި މިރޭ ދިން ދެ ބޮމުގައި ހަމަލާގައި ހަ މީހުން މަރުވެ، ގިނަ ބަޔަކަށް އަނިޔާވެއްޖެ އެވެ.
ހަމަލާތައް ދީފައި ވަނީ ޓެރަރިސްޓު ނުރައްކާ ބޮޑު ކަމަށް ބުނެ، އެއާޕޯޓު ކައިރިން ދުރަށް ދިޔުމަށް ހުޅަނގުގެ ގައުމުތަކުން ގޮވާލާފައި ވަނިކޮށެވެ.
މިދިޔަ ހަފްތާގައި ތާލިބާނުން ވެރިކަމަށް އައުމުން އަފްގާނިސްތާނުގައި ދިރިއުޅެން ބޭނުން ނުވާ އެތައް ހާސް އާއްމުންނެއް ވަނީ ފުރޭތޯ އެއާޕޯޓަށް ޖަމާވެފަ އެވެ.
އެއާޕޯޓު ކައިރީގައި ދިން "ކޮމްޕްލެކްސް ހަމަލާގައި" އެމެރިކާގެ ރައްޔިތުންނަށް ވެސް އަނިޔާވި ކަމަށް ޕެންޓަގަންގެ ތަރުޖަމާން ޖޯން ކާބީ ކުރެއްވި ޓްވީޓެއްގައި ވިދާޅުވި އެވެ.
ކާބުލްގެ މައި އެމެޖެންސީ ހޮސްޕިޓަލުން ބުނި ގޮތުގައި މިހާތަނަށް ހަ މީހަކު މަރުވެފައި ވާއިރު، ގިނަ ބަޔަކަށް ވަނީ އަނިޔާވެފަ އެވެ.
އެމެރިކާގެ ރައީސް ޖޯ ބައިޑެން ކުރިން ވިދާޅުވެފައި ވަނީ ޓެރަރިސްޓް ގްރޫޕް އިސްލާމިކް ސްޓޭޓް (އައިއެސް) ހަމަލާއެއްގެ ނުރައްކާ ބޮޑު ކަމަށެވެ.
ހަމަލާތަކާ ގުޅިގެން އެއާޕޯޓު ބޭރުގައި އިތުރަށް ހަމަނުޖެހުން ބޮޑުވެފައި ވާއިރު، ތާލިބާނުން ވަނީ އެ ސަރަހައްދު ހަމަޔަކަށް އެޅުވުމަށް ވައިގެ ތެރެއަށް ބަޑި ޖަހާފަ އެވެ.
ފުރަން ބޭނުންވާ މީހުން ގެންދިޔުމަށް އެމެރިކާ އިން ކަނޑައެޅި ސުންގަޑި އަކީ އޯގަސްޓު 31 އެވެ. މިހާރު 95،000 އަށް ވުރެ ގިނަ މީހުން ފުރުވާލާފައި ވާއިރު އޭގެ ތެރޭގައި ގިނައީ އަފްގާން ރައްޔިތުންނެވެ.
އެއާޕޯޓު ބޭރުގައި ހަމަލާ ދޭނެ ކަމުގެ އިންޒާރު ހުޅަނގުގެ ގިނަ ގައުމުތަކުން ދިން ނަމަވެސް، ފުރަން ބޭނުންވެފައި ތިބި މީހުން އެ ސަރަހައްދުން ދުރަށް ގޮސްފައެއް ނުވެ އެވެ.
އަފްގާނިސްތާނުގެ އައިއެސް ޖަމާއަތަށް ދީފައިވާ ނަމަކީ އިސްލާމިކް ސްޓޭޓް އިން ހޮރަސާން ނުވަތަ އައިއެސް-ކޭ އެވެ. އެ މީހުން ވަނީ ފަހަކަށް އައިސް ބޮޑެތި ހަމަލާތަކެއް އަފްގާނުގައި ހިންގާފަ އެވެ.
