މޮސްކޯ، ރަޝިއާ (އޯގަސްޓު 26) - އަފްގާނިސްތާނުގެ ވެރިކަމަށް ތާލިބާނުން އައުމާ ގުޅިގެން އަވައްޓެރި ގައުމުތަކުން އިތުރު ހަތިޔާރާއި ހެލިކޮޕްޓަރު ބޭނުންވެގެން ރަޝިއާ އަށް އޯޑަރު ފޮނުވައިފި އެވެ.
ކުރީގެ ސޯވިއެޓް ޔޫނިއަންގެ ބާރު ހިންގި އަދި މިހާރު ވެސް ރަޝިއާއާ ގާތް ގުޅުމެއް އޮންނަ ސެންޓްރަލް އޭޝިއާގެ ގައުމުތަކުން މީގެ ކުރިން ވެސް ވަނީ ތާލިބާނުން ވެރިކަމަށް އައުމުން ކަންބޮޑުވުން ފާޅުކޮށްފަ އެވެ.
ސެންޓްރަލް އޭޝިއާގެ ގައުމުތަކުގައި ރަޝިއާގެ ސިފައިންގެ މަރުކަޒުތައް ހުންނައިރު، ރަޝިއާ އިން ވަނީ އެކި ފަހަރު މަތިން އެ ގައުމުތަކަށް ހަތިޔާރާއި އަސްކަރީ އުޅަނދު ފޯރުކޮށްދީފަ އެވެ.
ރަޝިއާގެ ދައުލަތުގެ ހަތިޔާރު އެކްސްޕޯޓް ކުރާ ކުންފުނީގެ ވެރިޔާ އެލެގްޒޭންޑާ މިހީވް ރިއާ ނޮވޮސްޓީ ނިއުސް އެޖެންސީ އަށް ވިދާޅުވީ ހެލިކޮޕްޓަރާއި ހަތިޔާރު އަދި ބޯޑަރު ބަލަހައްޓާ ޒަމާނީ ސިސްޓަމްތައް ބޭނުންވެގެން އެ ގައުމުތަކުން އާ އޯޑަރުތައް ފޮނުވާފައިވާ ކަމަށެވެ.
ތާލިބާނުންގެ ވެރިކަމާ މެދު ރަޝިއާއިން މިހާތަނަށް މާ ސާފުކޮށް އެއްޗެއް ބުނެފައި ނުވި ނަމަވެސް، ރެފިއުޖީންނަށް ހެދިގެން ހަނގުރާމަވެރިން ބޯޑަރު ހުރަސްކޮށް ކައިރި ގައުމުތަކަށް އެތެރެވުމާ ދެކޮޅަށް ވަނީ އިންޒާރު ދީފަ އެވެ.
މި މަހުގެ ކުރީކޮޅު އުޒްބެކިސްތާނާއި ތަޖިކިސްތާނުން ވަނީ ރަޝިއާއާ ގުޅިގެން އަފްގާނިސްތާނުގެ ބޯޑަރު ކައިރީގައި އަސްކަރީ ހަރަކާތްތަކެއް ކުރިއަށް ގެންގޮސްފަ އެވެ.
ރަޝިއާގެ އަސްކަރީ ގުޅުން، ކަލެކްޓިވް ސެކިއުރިޓީ ޓްރީޓީ އޯގަނައިޒޭޝަން (ސީއެސްޓީއޯ) އިން ރާވާފައި ވަނީ ސެޕްޓެމްބަރު ހަތަކުން ނުވަޔަކަށް ކިރްގިސްތާނާއި އަފްގާނިސްތާނު ގުޅޭ ބޯޑަރުގައި ވެސް އަސްކަރީ ތަމްރީނުތައް ކުރިއަށް ގެންދިޔުމަށެވެ.
ތާލިބާނުން ބުނެފައި ވަނީ އެ މީހުންގެ ހަނގުރާމަވެރިންނަކީ ސެންޓްރަލް އޭޝިއާ ގައުމުތަކަށް ނުރައްކަލެއް ނޫން ކަމަށެވެ. ނަމަވެސް މީގެ ކުރިން ވެސް ތާލިބާން ހަނގުރާމަވެރިންނާއި އެ މީހުންނާ ގުޅުން ހުރި ފަރާތްތަކުން އެ ގައުމުތަކަށް އަމާޒުކޮށް ހަމަލާތައް ދީފައި ވެ އެވެ.
