މާލޭ ސިޓީ ކައުންސިލްގެ އެންގުމާ އެއްގޮތަށް މަގުތައް ހުޅުވައިފި ނަމަ ކަރަންޓް ދޭން ދަތިތަކެއް ކުރިމަތިވާނެތީ އެކަން ކުރެވެން ނެތް ކަމަށް ސްޓެލްކޯ އިން މިއަދު ބުނެފި އެވެ.
ސިޓީ ކައުންސިލުން ހުޅުވާލަން އަންގާފައިވަނީ ސްޓެލްކޯއިން ބަންދުކޮށްފައިވާ ތިން މަގަކާއި އެމްޑަބްލިއެެސްސީން ބަންދުކޮށްފައިވާ ދެ މަގެއްގެ ބައެކެވެ. އެއީ ސްޓެލްކޯގެ ހެޑް އޮފީހާއި ކުޑަކުދިންގެ ޕާކާ ދެމެދު އޮންނަ ކުޑަ ގޯޅި އާއި ހެޑް އޮފީހާއި ޕާކްގެ ފަހަތަށް އޮންނަ މަގެވެ.
އެ މަގުތައް ހުޅުވާލައި އާއްމުންނަށް ބޭނުން ކުރެވޭނެ ގޮތް ހެދުމަށް ސިޓީ ކައުންސިލުން އެ ދެ ކުންފުންޏަށް މުހުލަތެއް ދިނެވެ. އެކަމަކު އިއްޔެއާ ހަމައަށް ވެސް މަގު ހުޅުވާފައި ނުވާތީ ސިޓީ ކައުންސިލުން ވަނީ ގާނޫނީ ފިވަޅު އަޅާނެ ކަމަށް ބުނެފަ އެވެ.
އެ މައްސަލައާ ގުޅިގެން ސްޓެލްކޯގެ އޮފިޝަލަކު "އަދަދު" އަށް ވިދާޅުވީ ރައްޔިތުންނަށް ދޭން ޖެހޭ އަސާސީ އެއްވެސް ހިދުމަތެއް ދިނުމަށް ހުރަހަކަށް ވެދާނެ އެއްވެސް ކަމެއް އެ ކުންފުނިން ނުކުރާނެ ކަމަށެވެ. އަދި އެ މަގުތައް ހުޅުވައިފިނަމަ މާލޭގައި ކަރަނޓު ދިނުމަށް ހުރަސްތަކެއް އެޅޭނެ ކަމަށެވެ.
"ރައްޔިތުންނަށް ދޭން ޖެހޭ އަސާސީ ހަދުމަތެއް ދޭން މި ކުންފުންޏަށް ލާޒިމް ކޮށްފައިވާއިރު އެ ހިދުމަތް ދިނުމަށް ކުރަން ޖެހޭ ހުރިހާ ކަމެއް ކުރަމުން ގެންދާނެ،" ކަމަށް އޭނާ ވިދާޅުވި އެވެ.
އެމްޑަބްލިޔުއެސްސީން ބަންދު ކޮށްފައިވާ މަގުތައް ހުޅުވާލުމާ ގުޅޭގޮތުން އެ ކުންފުނީގެ ބަހެއް އަދި ނުލިބެ އެވެ.
މާލެ ސިޓީ ކައުންސިލުން އިއްޔެ ބޭއްވި ނޫސްވެރިންގެ ބައްދަލުވުމެއްގައި މާލެ ސިޓީ ކައުންސިލްގެ މޭޔަރު ޑރ. މުހައްމަދު މުއިއްޒު ވިދާޅުވެފައި ވަނީ އެ މަގުތައް ސްޓެލްކޯއާ ހަވާލުކުރީ ވަގުތީ ގޮތުން ކަމަށެވެ.
"އެހެންވީމާ ގާނޫނީ ގޮތުން އަޅަން ޖެހޭ ހުރިހާ ފިޔަވަޅެއް ކައުންސިލްގެ ފަރާތުން އަޅާނަން އެ ގޯޅިތައް ހުޅުވުމަށްޓަކައި. އޭގެ ތެރޭގައި ކޯޓަށް ދިއުންވެސް ހިމެނޭ ގޮތަށް އެ ގޯޅިތަކާއި މަގުތައް ގާނޫނުގެ ތެރެއިން ކުރެވެން އޮތް ހުރިހާ ކަމެއް ކުރާނަން." މުއިއްޒު ވިދާޅުވި އެވެ.
