ޖިންސީ ފުރައްސާރައިގެ ދައުވާތަކެއް އުފުލާފައިވާ ކުރީގެ ޓޫރިޒަމް މިނިސްޓަރު އަލީ ވަހީދު ކުރިމިނަލް ކޯޓަށް ހާޒިރު ނުވުމުން ޝަރީއަތް ކުރިއަށް ނުގެންދެވި، ކެންސަލް ކުރަން ޖެހިއްޖެ އެވެ.
މިއަދު ހެނދުނު 9:00 އަށް އަލީ ވަހީދަށް ކުރާ ދައުވާތަކުގެ އަޑުއެހުމެއް ތާވަލުކުރި އެވެ.
އެ އަޑުއެހުމަށް ހާޒިރުވުމަށް ކުރިމިނަލް ކޯޓުން، ޗިޓް ފޮނުވީ އަލީ ވަހީދަށެވެ. ނަމަވެސް، އޭގެ ފަހުން އިނގިރޭސިވިލާތުގެ ފުލުހުން ވަނީ ވިސާ މައްސަލައެއްގައި އަލީ ވަހީދު ހައްޔަރުކޮށްފަ އެވެ. މައުލޫމާތު ލިބިފައިވާ ގޮތުގައި އޭނާ މިވަގުތު ހުރީ ޑިޓެންޝަން ސެންޓަރެއްގަ އެވެ.
ވިސާ މައްސަލައެއްގައި އަލީ ވަހީދު ހައްޔަރުކުރީ ސުޕްރީމް ކޯޓުން ދެ މަހުގެ ޖަލު ހުކުމެއް އޭނާގެ މައްޗަށް އިއްވާފައިވާތީ، ޖަލަށް ގެންދިޔުމަށް ދިވެހި ފުލުހުން އިނގިރޭސިވިލާތުގެ ފުލުހުންނާއެކު މަސައްކަތް ކުރަމުން ދަނިކޮށެވެ.
ކުށްވެރިން ހާޒިރުކުރުމަށް އަންގައި، އާންމުކޮށް ކޯޓުން ޗިޓް ފޮނުވަމުން ދަނީ އެމީހަކު ބަންދުގައި ހުންނަ އިދާރާއަކަށެވެ. އެއީ ފުލުހުންނަށް ނުވަތަ ކަރެކްޝަނަލް ސާވިސްއަށެވެ.
ކުރިމިނަލް ކޯޓުގެ އޮފިޝަލަކު މިއަދު ވިދާޅުވި ގޮތުގައި، އަލީ ވަހީދަށް ފޮނުވި ޗިޓާ އެއްގޮތަށް އޭނާ ކޯޓަށް ހާޒިރުވެފައިނުވާތީ، އަޑުއެހުން ކެންސަލްކޮށްފައިވާ ކަމަށެވެ.
ކޯޓަށް ހާޒިރުވުމަށް އަލީ ވަހީދަށް ޗިޓް ފޮނުވަނީ އޮންލައިންކޮށް އިނގިރޭސިވިލާތުގައި ހުރެގެން ޝަރީއަތްގައި ބައިވެރިވެވޭ ގޮތަށެވެ.
އެކަމަށް ދައުލަތުން އިއުތިރާޒުކުރި ނަމަވެސް، އިނގިރޭސިވި ލާތުގައި ހުންނަ ހައިކޮމިޝަނަށް އަލީ ވަހީދު ހާޒިރުވެގެން ދެ އަޑުއެހުމެއްގައި މީގެކުރިން ބައިވެރިވި އެވެ. އެހެންވެ، އެ ނިންމުން ދައުލަތުން ހައިކޯޓުގައި އިސްތިއުނާފުކުރި އެވެ. ނަމަވެސް، އެއީ އިސްތިއުނާފު ކުރެވޭނެ ނިންމުމެއް ނޫން ކަމަށް ހައިކޯޓުން ވަނީ ނިންމާފަ އެވެ.
އެހެންވެ، އެ މައްސަލަ ދައުލަތުން ސުޕްރީމް ކޯޓާ ހަމައަށް ގެންދިޔަ އެވެ. އެ މައްސަލާގެ އަޑުއެހުމަށް ހާޒިރުވުމަށް އީމެއިލް މެދުވެރިކޮށް ސުޕްރީމް ކޯޓުން އަލީ ވަހީދަށް ޗިޓް ފޮނުވި އެވެ. އެ ޗިޓް އަލީ ވަހީދަށް ރައްދުވެފައިވީ ނަމަވެސް، ސުޕްރީމް ކޯޓާ އޭނާ އެއްވެސް މުއާމަލާތެއްކޮށްފައެއް ނުވެ އެވެ. އަދި ތާވަލުކުރި އަޑުއެހުމަށް އަލީ ވަހީދު ރާއްޖެ ވަޑައިގެންފައެއް ވެސް ނުވެ އެވެ.
އެހެންވެ، ސުޕްރީމް ކޯޓުން ނިންމާފައިވަނީ އެއީ އެ ކޯޓުގެ ހުރުމަތް ކެނޑުން ކަމަށެވެ. އެ ކުށުގެ އަދަބެއްގެ ގޮތުން ގާނޫނުލްއުގޫބާތުގެ ދަށުން އަލީ ވަހީދު ދެ މަހާއި 12 ދުވަހަށް ޖަލަށްލުމަށް ހުކުމްކޮށް، އެ ހުކުމް ތަންފީޒުކުރުމަށް ދައުލަތުގެ މައްޗަށް އަމުރު ކުރެއްވި އެވެ.
އަލީ ވަހީދަށް ޖަލު އަދަބެއް ކަނޑައެޅި ހުކުމްގައި ސުޕްރީމް ކޯޓުން ބުނެފައިވަނީ އަލީ ވަހީދުގެ މައްޗަށް ޝަރީއަތް ކުރަން ޖެހުމުން ކޯޓުތަކަކީ ކުޅޭކުޅޭ އަދި ހަރުދަނާ ކަމެއް ނެތް ތަންތަން ކަމަށް ދޭހަވާ ގޮތަށް ގާނޫނާއި ގަވައިދުތައް މާނަކޮށް އިޖުރާއީ ބާގަނޑުތައް ފޭކޮށްގެން ނުވާނެ ކަމަށެވެ.
"އަލީ ވަހީދު ކޯޓަށް ހާޒިރުނުވުމުން ފިޔަވަޅު ނޭޅި ކޯޓުތަކަށް މިކަމުގައި ކަމެއް ނުކުރެވި ޝަރީއަތް ހިންގޭ ގޮތް ނުވެ އަލީ ވަހީދުގެ ކުރިމަތީ ކޯޓުތައް އަމާންދީ ކުޑަކަކޫ ޖަހާތަން ރައްޔިތުންނަށް ފެނުމަކީ ރާއްޖޭގެ ދުސްތޫރީ ނިޒާމް ކިލަނބުވެ ކޯޓުތަކުގެ އަމުރުތަކުގެ ހުރުމަތް ކެނޑި ގާނޫނީ ވެރިކަން ނުހިނގޭ ކަމުގެ ތަސައްވުރު އުފެދޭ ކަމެއް،" ހުކުމްގައިވެ އެވެ.
