އަންނަ އޮކްޓޫބަރު މަހު މާލޭގައި ކުރިއަށްދާ ދެކުނު އޭޝިއާ ސަރަހައްދުގެ އެންމެ ބޮޑު ފުޓްބޯޅަ މުބާރާތް ކަަމަށްވާ ސާފް ޗެމްޕިއަންޝިޕަށް ތައްޔާރުވުމުގެ ގޮތުން ގައުމީ ފުޓްބޯޅަ ޓީމުން މިރޭ ޕްރެކްޓިސް ފަށާ ގޮތަށް ހަމަޖެހިއްޖެ އެވެ.
ގައުމީ ޓީމުން ޕްރެކްޓިސް ފަށަން އެންމެ ފުރަތަމަ ނިންމީ އިއްޔެ އެވެ. އެކަމަކު އޭއެފްސީ ކަޕްގެ ގްރޫޕް ސްޓޭޖުގައި ވާދަކުރި މާޒިޔާގެ ކުޅުންތެރިން ވެސް ހިމެނޭ ގޮތަށް ޕްރެކްޓިސް ފެށުމުގެ ބޭނުމުގައި މިރޭ ޕްރެކްޓިސް ފަށަން ނިންމީ އެވެ. ގައުމީ ޓީމުގައި އެންމެ ގިނަ ކުޅުންތެރިން ހިމެެނެނީ މާޒިޔާ އިންނެވެ. އެ ޓީމުގެ 11 ކުޅުންތެރިން ވަނީ ގައުމީ ޓީމުގެ 31 ކުޅުންތެރިންގެ ޕްރިލިމިނަރީ ސްކޮޑުގައި ހިމެނިފަ އެވެ.
ސާފް ޗެމްޕިއަންޝިޕާ ދިމާކޮށް ގައުމީ ޓީމުގެ ހެޑް ކޯޗަކަށް ވަނީ ރާއްޖޭގެ އެންމެ ކާމިޔާބު އެއް ކޯޗު އަލީ ސުޒޭން ހަމަޖައްސައިފަ އެވެ. ސުޒޭން އެންމެ ފަހުން ހުރީ ގައުމީ ޓީމުގެ އެސިސްޓަންޓް ކޯޗުގެ މަގާމުގަ އެވެ. ސުޒޭނަށް އެހީތެރިވުމުގެ ގޮތުން އެސިސްޓަންޓް ކޯޗަކަށް ހަމަޖައްސާފައިވަނީ މީގެ ކުރިން ވެސް އެ މަގާމު އަދާކުރި އިސްމާއިލް މަހްފޫޒް (އިންމަ) އެވެ.
މި ފަހަރުގެ މުބާރާތަށް ރާއްޖޭން ކުރިމަތިލާއިރު، ރާއްޖެ އަކީ ސާފްގެ އެންމެ ފަހުގެ ޗެމްޕިއަނެވެ. ރާއްޖޭން މި އަހަރުގެ މުބާރާތަށް މިއަދު ތައްޔާރީތައް ފަށާއިރު، އަންނަ މަސް ތެރޭގައި ޓްރެއިނިން ކޭމްޕެއް ދާ ގޮތަށް ވަނީ ހަމަޖެހިފަ އެވެ. ޓްރެއިނިން ކޭމްޕަށް ދާން ހަމަޖެހިފައި ކުރިން އޮތީ ޔޫއޭއީ އަށެވެ. އެކަމަކު މިހާރު އޮތްގޮތުން ޓްރެއިނިން ކޭމްޕް ދާނީ ގަތަރަށެވެ. ރާއްޖޭން 2018 ވަނަ އަަހަރުގެ ސާފް ޗެމްޕިއަންޝިޕަށް ތައްޔާރުވީ ގަތަރުގައި ޓްރެއިނިން ކޭމްޕެއް ޖަހައިގެންނެވެ.
ފަސް ޓީމާ އެކު މި ފަހަރުގެ ސާފް ޗެމްޕިއަންޝިޕް ކުރިއަށްދާނީ ލީގު އުސޫލުންނެވެ. އެއީ އެންމެ ގިނަ ޕޮއިންޓް ހޯދާ ދެ ޓީމެއް ފައިނަލަށްދާ ގޮތަށެވެ.
ރާއްޖެ ކުޅޭ ފުރަތަމަ މެޗުގައި އޮކްޓޫބަރު މަހު އެއް ވަނަ ދުވަހު ކުޅޭނީ ނޭޕާލްއާ އެވެ. ދެ ވަނަ މެޗުގައި އޮކްޓޫބަރު މަހު ހަތް ވަނަ ދުވަހު ބަންގްލަދޭޝްއާ ބައްދަލުކުރާނެ އެވެ. ތިން ވަނަ މެޗުގައި އޮކްޓޫބަރު 10 ވަނަ ދުވަހު ސްރީލަންކާއާ ބައްދަލުކުރުމަށް ފަހު ލީގު ބުރުގެ ފަހު މެޗުގައި އިންޑިއާއާ ކުޅޭނީ އޮކްޓޫބަރު 13 ވަނަ ދުވަހު އެވެ. ފައިނަލް މެޗު އޮންނާނީ އޮކްޓޫބަރު 16 ވަނަ ދުވަހުގެ ރޭގަ އެވެ.
ސާފް ޗެމްޕިއަންޝިޕްގައި ވާދަކުރަން ނެގި ސްކޮޑުން ވަނީ އަލުން ކުޅުންތެރިންތަކަކަށް ފުރުސަތު ދީފަ އެވެ. އެ ގޮތުން 2018 ވަނަ އަހަރު ކުއްލި ގޮތަކަށް ގައުމީ ޓީމުން ރިޓަޔާކުރި އަސްހަދު އަލީ (އަޑޭ) އަށް ފުރުސަތު ލިބުނުއިރު، ފަސް ވަރަކަށް އަހަރު ފަހުން މޫސާ ޔާމީން (ޔާމްބެ) އަށް ވަނީ ފުރުސަތު ލިބިފަ އެވެ. އެންމެ ފަހުން ވޯލްޑް ކަޕް ކޮލިފައިން މެޗުތަކަށް ނެގި ސްކޮޑުން ފުރުސަތު ލިބުނު އަލީ ހައިޝަމް (ޗުމްޕު) އާއި އަލީ ޝަމާލް (ޝަންމު) އަދި މިދިޔަ އަހަރުތަކުގައި ގައުމީ ޓީމުން ގަވާއިދުން ފުރުސަތު ހޯދަމުން އައި އަބްދުﷲ ޔާމީން (ޔާން) މި ފަހަރުގެ ސްކޮޑުގައި ނުހިމެނެ އެވެ.
ސާފް ޗެމްޕިއަންޝިޕްގެ ޕްރިލިމިނަރީ ސްކޮޑު
މާޒިޔާ: ހުސެއިން ޝަރީފް (ހުސެން)، މޫސާ ޔާމީން (ޔާމްބެ)، މުހައްމަދު އިރުފާން (އިރޭ)، އިބްރާހިމް މަހުދީ (ފޭދޫ އިއްބެ)، ހަމްޒާ މުހައްމަދު (ހަމްޕު)، މުހައްމަދު އުމެއިރު، އިބްރާހިމް އައިސަމް، ސަމޫހު އަލީ، ހުސެއިން ނިހާން (ނިހާޓް)، ނާއިޒު ހަސަން (ދާދު)، އަސަދުﷲ އަބްދުﷲ (އަސަކޮ)
އީގަލްސް: ހަސަން ރާއިފް އަހުމަދު (ހަންނަ)، ހައިޝަމް ހަސަން (ބިޑި)، ހުސެއިން ޝިފާއު (ކުރޯ)، މުހައްމަދު ނާއިމް، އަސްހަދު އަލީ (އަޑޭ)، އިމްރާން ނަޝީދު (އިންމަ)، އަހުމަދު ނޫމާން (ހެލްމެޓް)
ވެލެންސިއާ: އަލީ އަޝްފާގު (ދަގަނޑޭ)، މުހައްމަދު ފައިސަލް، އަކުރަމް އަބްދުލް ގަނީ (އަކޫ)، އަލީ ފާސިރު (ސެންޓޭ)، މުހައްމަދު ޝަފީއު (ޗެކް)
ޔުނައިޓެޑް ވިކްޓްރީ (ޔޫވީ): މުހައްމަދު އާރިފް (ބަކާ)، އިސްމާއިލް އީސާ (މެސީ)، އަލީ ނާޖިހު
ގްރީން ސްޓްރީޓްސް: ހަސަން ނަޒީމް (ޗޯޓު)، މުހައްމަދު ސާއިފު
ޓީސީ: އަލީ ޝާމިސް (ތޮއްޕޭ)، މުހައްމަދު އަޖުފާން
ދަ ގްރާންޑޭ: ޔަސްފާދު ހަބީބު (މުލަކޭ)
