ކާބުލް، އަފްގާނިސްތާން (އޯގަސްޓް 26) - އެމެރިކާ އިން އިއުލާނު ކުރި ސުންގަޑި ހަމަވުމުން ވެސް އަފްގާނިސްތާނުގެ ބައެއް މީހުން ފުރުމުގެ ހުއްދަ ދޭނެ ކަމުގެ ޔަގީންކަން ތާލިބާނުން ދީފި އެވެ.
މީހުން ފުރުވާލުމަށް ކަނޑައެޅި ސުންގަޑި ހަމަވާނީ އޯގަސްޓު 31 ގަ އެވެ. މީގެ ކުރިން ތާލިބާނުން ބުނީ އެ ދުވަހަށް ފަހު ބޭރުގެ ސިފައިން އަފްގާން ފަސްގަނޑުގައި ތިބޭ ނަމަ ފިޔަވަޅު އަޅާނެ ކަމަށެވެ.
މިދިޔަ ހަފްތާގައި ތާލިބާނުން ވެރިކަމަށް އައުމުން ކާބުލް އެއާޕޯޓަށް އެތައް ހާސް ބަޔަކު ޖަމާވެފައި ވާއިރު، މިހާތަނަށް 80،000 އަށް ވުރެ ގިނަ މީހުން ވަނީ އެކި ފްލައިޓުތަކުގައި ފުރުވާލާފަ އެވެ.
އެމެރިކާގެ ސެކެޓްރީ އޮފް ސްޓޭޓް އެންޓޮނީ ބްލިންކެން ވިދާޅުވީ ސުންގަޑި ހަމަވުމުން ވެސް އެމެރިކާ ރައްޔިތުންނާއި، އެހެން ގައުމުތަކުގެ ރައްޔިތުން އަދި "ނުރައްކާ އޮތް" އަފްގާން ރައްޔިތުން ފުރަން ހުއްދަ ދޭނެ ކަމަށް ތާލިބާނުން ބުނެފައިވާ ކަމަށެވެ.
"އެ ވައުދާ އެއް ގޮތަށް އަމަލު ކުރުމަކީ އެ މީހުންގެ ޒިންމާއެއް. ގައުމު ދޫކޮށް ދާން ބޭނުންވާ ހުރިހާ އެންމެންގެ ރައްކާތެރިކަން އެ މީހުން ކަށަވަރުކޮށްދޭން ޖެހޭނެ،" ބްލިންކެން ވިދާޅުވި އެވެ.
އަފްގާނިސްތާނުގައި ތިބި އެމެރިކާ ރައްޔިތުންގެ ތެރެއިން އެ ގައުމު ދޫކޮށް ދާން ބޭނުންވާ ކަމަށް ބުނީ 6،000 މީހުންނެވެ. މިހާތަނަށް ފުރާފައި ވަނީ އޭގެ ތެރެއިން 4،500 މީހުންނެވެ.
ގިނަ އަދަދެއްގެ އަފްގާން ރައްޔިތުން ފުރަން ބޭނުން ވަނީ ތާލިބާނު ވެރިކަމެއްގައި އެ މީހުންގެ ދިރިއުޅުމަށް ހުރަސް އެޅި ނުރައްކާ އޮތް ކަމަށް ގަބޫލުކުރެވޭތީ އެވެ.
މިހާރު ވެސް ވަކިވަކި ތާލިބާން ހަނގުރާމަވެރިން ދަނީ ކުރީގެ ސަރުކާރާ ގުޅުން ހުރި މީހުންނާއި، ނޫސްވެރިންނާއި، ބޭރު ގައުމުތަކަށް މަސައްކަތްކޮށް ދިން މީހުންނަށް ހަމަލާ އަމާޒު ކުރަމުންނެވެ.
ދޮރުން ދޮރަށް ހިނގަމުން، އެފަދަ މީހުންގެ ކިބައިން ބަދަލު ހިފުމަށް ހަނގުރާމަވެރިން މަސައްކަތް ކުރާއިރު، ތާލިބާނުންގެ ލީޑަރުން ބުނީ ވަކިވަކި ހަނގުރާމަވެރިންގެ އެ އަމަލުތަކާ މެދު ލަދުގަންނަ ކަމަށެވެ.
މީގެ ކުރިން 1990 ގެ އަހަރުތަކުގައި ތާލިބާނުން ވެރިކަން ކުރިއިރު، އަންހެނުން ވަޒީފާ އަށް ދިޔުން މަނާކޮށް، އަންހެން ކުދިންގެ ސްކޫލުތައް ބަންދު ކުރި އެވެ.
ނަމަވެސް އާ ތާލިބާން ވެރިކަމުގައި އަންހެނުންގެ ހައްގުތައް ނުހިފަހައްޓާނެ ކަމަށް ތާލިބާނުން ވަނީ ބުނެފަ އެވެ. އެކަމަކު އެއީ ގައުމު ދޫކޮށް ދާން ބޭނުންވާ ރައްޔިތުން ގަބޫލުކުރާ ވާހަކައެއް ނޫނެވެ.
