ވޮޝިންޓަން، އެމެރިކާ (އޯގަސްޓު 26) - ކާބުލް އެއާޕޯޓަށް ޓެރަރިސްޓު ހަމަލާއެއް ދިނުމުގެ ފުރުސަތު ބޮޑު ކަމަށް ބުނެ، އެ ސަރަހައްދަށް ޖަމާވަމުންދާ އާއްމުން އަވަހަށް ދިޔުމަށް އެމެރިކާ އިން އަންގައިފި އެވެ.
އިނގިރޭސި ވިލާތާއި އޮސްޓްރޭލިއާ އިން ވެސް ބުނެފައި ވަނީ ކާބުލް އެއާޕޯޓަށް ޓެރަރިސްޓު ހަމަލާއެއް ދިނުމުގެ "ފުރުސަތު ބޮޑު" ކަމަށެވެ. އެހެންވެ، އެމެރިކާގެ އިތުރުން އެ ދެ ގައުމުން ވެސް ވަނީ އެއާޕޯޓަށް ނުދިޔުމަށް އިންޒާރު ދީފަ އެވެ.
ގައުމުތަކުން ނެރުނު އިންޒާރުގައި ބުނީ އެއާޕޯޓުގެ ގޭޓުތައް ކައިރިއަށް ޖަމާވެފައިވާ މީހުން ވީ އެންމެ އަވަހަކަށް ރައްކާތެރި ސަރަހައްދަކަށް ދިޔުމަށް އެދޭ ކަމަށެވެ. މިދިޔަ ހަފްތާގައި ތާލިބާނުން ވެރިކަމަށް އައުމުން ގައުމުން ފުރަން ބޭނުންވާ އެތައް ހާސް ބަޔަކު ވަނީ އެއާޕޯޓު ކައިރިއަށް ޖަމާވެފަ އެވެ.
"[އެއާޕޯޓުގެ] އެބީ ގޭޓާއި، އިރުމަތީ ގޭޓާއި، އުތުރު ގޭޓް ކައިރީގައި ތިބި މީހުން ވަގުތުން ދިޔުމަށް ގޮވާލަން،" އެމެރިކާގެ ސްޓޭޓް ޑިޕާޓްމަންޓުން ބުންޏެވެ.
އޮސްޓްރޭލިއާގެ ފޮރިން އެފެއާޒް ޑިޕާޓްމަންޓުން ބުނީ "ޓެރަރިސްޓު ހަމަލާއެއްގެ ނުރައްކާ މެދުނުކެނޑި އެބަ އޮތް" ކަމަށެވެ.
"ކާބުލްގެ ހާމިދު ކަރްޒާއީ އިންޓަނޭޝަނަލް އެއާޕޯޓަށް ދަތުރު ނުކުރަން ގޮވާލަން. އެ ސަރަހައްދުގައި ތިބި މީހުން، އަވަހަށް ރައްކާތެރި ހިސާބަކަށް ބަދަލުވެ، އިތުރު އެންގުންތައް އަންގަން ދެން އެ ތަނެއްގައި މަޑު ކުރަން އެދެން،" އިނގިރޭސި ވިލާތުން ބުންޏެވެ.
އެމެރިކާ އާއި ގުޅިފައިވާ ގައުމުތަކުން ކޮންމެ ދުވަހަކު ވެސް ދަނީ އެތައް ހާސް ބަޔަކު ފުރުވާލަމުންނެވެ. ނަމަވެސް ތާލިބާނުންނާއެކު އެއްބަސްވެފައިވާ އޯގަސްޓު 31 ވަނަ ދުވަހުގެ ސުންގަޑި ހަމަވުމުގެ ކުރިން ފުރަން ބޭނުންވާ އެންމެންނަށް ދެވޭނެ ކަމުގެ ޔަގީންކަމެއް ނެތެވެ.
އެއާއެކު، ފުރަން ބޭނުންވެފައި ތިބި މީހުން ކުރާ މަސައްކަތް ވެސް ދަނީ އިތުރުވަމުންނެވެ. އެއާޕޯޓުގެ އެތެރެ ފުރިފައި ވާއިރު، އެތެރެއަށް ވަދެވޭނެ ގޮތެއް ވޭތޯ އެތައް ހާސް ބަޔަކު ދަނީ މަސައްކަތް ކުރަމުންނެވެ. އޭގެ އިތުރުން ގިނަ އާއިލާތަކުން މި ވަގުތު ވެސް މަސައްކަތް ކުރަމުން ދަނީ ތާލިބާނުންގެ ޗެކްޕޮއިންޓުތައް ހުރަސްކޮށް އެއާޕޯޓަށް ދަތުރު ކުރެވޭތޯ ބަލަމުންނެވެ.
މިހާތަނަށް އެއާޕޯޓުގައި ފިތި ބާރުވެގެން އަށް މީހުން ވަނީ މަރުވެފަ އެވެ. ކޮން ބައެއް ކަން ކަށަވަރު ނުރާ ހަނގުރާމަވެރިންތަކެއް މީގެ ކުރިން ވެސް އެއާޕޯޓުގައި ބަޑި ޖަހާފައި ވެ އެވެ. އެ ފަހަރު އެމެރިކާ އާއި ޖަރުމަނު ސިފައިންގެ އެހީގައި ހަނގުރާމަވެރިން ފޮނުވާލި އިރު، އަފްގާން ސެކިއުރިޓީ ގާޑަކު މަރުވި އެވެ.
ތާލިބާނުންގެ ބައެއް ވަކިވަކި ހަނގުރާމަވެރިން، ލީޑަރުންގެ އެންގުމާ ހިލާފަށް ބަދަލު ހިފުމުގެ އަމަލުތައް ހިންގަމުންދާ ކަމަށް ތާލިބާނުން ވަނީ އެއްބަސްވެފަ އެވެ. އޭގެ އިތުރުން އިސްލާމިކް ސްޓޭޓް (އައިއެސް) ޖަމާއަތުން ވެސް އަފްގާނިސްތާނުގައި ހަރަކާތްތެރިވެ އެވެ.
