ސްޓެލްކޯ އާއި އެމްޑަބްލިއުއެސްސީން ބަންދުކޮށް، އެ ދެ ކުންފުނީގެ އިމާރާތުގެ ގޯތީގެ ތެރެއަށް ވައްދާފައިވާ މަގުތަކެއް ހުޅުވާލަން ސިޓީ ކައުންސިލުން އަންގާ އެކަމަށް މުހުލަތެއް ދިނުމުންވެސް އެކަން ކޮށްފައި ނުވާތީ ގާނޫނީ ފިޔަވަޅު އަޅަން މާލެ ސިޓީ ކައުންސިލުން ނިންމައިފި އެވެ.
ސިޓީ ކައުންސިލުން ހުޅުވާލަން އަންގާފައި ވަނީ ސްޓެލްކޯއިން ބަންދުކޮށްފައިވާ ތިން މަގަކާއި އެމްޑަބްލިއެެސްސީން ބަންދުކޮށްފައިވާ ދެ މަގެއްގެ ބައެކެވެ. ހުޅުވާލަން އަންގާއި މުއްދަތެއްވެސް ސިޓީ ކައުންސިލުން ދިނެވެ.
އެއީ ސްޓެލްކޯގެ ހެޑް އޮފީހާއި ކުޑަކުދިންގެ ޕާކާ ދެމެދު އޮންނަ ކުޑަ ގޯޅި އާއި ހެޑް އޮފީހާއި ޕާކްގެ ފަހަތަށް އޮންނަ މަގެވެ.
އަދި، ސްޓެލްކޯގެ ހެޑް އޮފީސް ފަހަތަށް އޮތް ކޮއްޓާ ޖެހިގެން އޮންނަ ދޮންއަދަރާދަ ހިނގުމުގެ ބައެއް ވެސް ހުޅުވާލަން ސިޓީ ކައުންސިލުން އެންގި އެވެ. ނަމަވެސް އެއްވެސް މަގެއް ހުޅުވާފައި ނުވާ ކަމަށް ކައުންސިލުން ބުންޏެވެ.
މާލެ ސިޓީ ކައުންސިލްއިން މިއަދު ބޭއްވި ނޫސްވެރިންގެ ބައްދަލުވުމެއްގައި މާލޭގެ މޭޔަރު ޑރ. މުހައްމަދު މުއިއްޒު ވިދާޅުވީ އެ މަގުތައް ސްޓެލްކޯއާ ހަވާލުކުރީ ވަގުތީ ގޮތުން ކަމަށެވެ.
އެފަރާތްތަކަށް އެ މަގުތަކާއި ގޯޅިތައް އެކި ބޭނުންތަކަށް ދާއިމީކޮށް ބަންދުކޮށްފައިވާތީ އެކަން ހުއްޓާލަން އެންގި ނަމަވެސް އެ ގޯޅިތައް ހުޅުވައި ނުދެވޭނެ ކަމަށް އެ ފަރާތުން ޖަވާބު ދީފައިވާ ކަމަށް މުއިއްޒު ވިދާޅުވި އެވެ.
ސްޓެލްކޯއިން އެ މައްސަލާގައި ބުނީ މަގުތައް ހުޅުވައިފިނަމަ މާލޭގައި ކަރަނޓު ދިނުމަށް ހުރަސްތަކެއް އެޅޭނެ ކަމަށެވެ.
"އެ ގޯޅިތައް ދިނީ ޖަނަރޭޓަރު ބަހައްްޓާކަށް ނޫން. އަދި އެ ތަންތަން ދާއިމީ ކޮށް ކަމެއް ކުރާކަށްވެސް ނޫން. އޭރު ހުރި ބައެއް ކަންކަމަށް ވަގުތީގޮތުން ދިން މަގުތަކެއް އެއީ. އެހެން ނަމަވެސް އެ ތަންތަން ދާއިމީކޮށް ހިފައި ބަންދު ކޮށްފައި ހުރި ހުރުން އެއީ އެއްގޮތަކަށްވެސް ބަލައިގަނެވޭނެ ކަމެއް ނޫން،"
"އެހެންވީމާ ގާނޫނީ ގޮތުން އަޅަން ޖެހޭ ހުރިހާ ފިޔަވަޅެއް ކައުންސިލްގެ ފަރާތުން އަޅާނަން އެ ގޯޅިތައް ހުޅުވުމަށްޓަކައި. އޭގެ ތެރޭގައި ކޯޓަށް ދިއުންވެސް ހިމެނޭ ގޮތަށް އެ ގޯޅިތަކާއި މަގުތައް ގާނޫނުގެ ތެރެއިން ކުރެވެން އޮތް ހުރިހާ ކަމެއް ކުރާނަން." މުއިއްޒު ވިދާޅުވި އެވެ.
ސްޓެލްކޯ އާއި އެމްޑަބްލިއުއެސްސީގެ މަސައްކަތްތަކަށް ފަސޭހަ ކުރުމުގެ ގޮތުން ބަންދުކޮށްފައިވާ މަގުތައް ހުޅުވާލަން އަންގާފައިވާއިރު، ސްޓެލްކޯއިން ވަނީ އެ މަގުތައް ބަންދުކުރުމަށްފަހު އެ ސަރަހައްދުގައި މަސައްކަތްތައް ވެސް ކުރަމުންނެވެ.
ދެ ކުންފުންޏަކުން ބަންދުކޮށްފައިވާ މަގުތައް ހުޅުވާލަން ސިޓީ ކައުންސިލުން އަންގާފައިވާއިރު އިންޑަސްޓްރިއަލް ވިލެޖުގައި ސްޓެލްކޯއަށް ދީފައިވާ ބިމެއް ވެސް ސިޓީ ކައުންސިލުން ވަނީ ހުސްކޮށްފަ އެވެ. އެތަން އެންގުމަކާ ނުލައި ހުސްކުރި މައްސަލާގައި ސްޓެލްކޯއިން ފުލުހަށް ވެސް ދިޔަ އެވެ.
ޕްލޭނިން މިނިސްޓްރީން މިހާރު ވަނީ އެ ބިމަކީ ސިޓީ ކައުންސިލްގެ ބިމެއް ނޫން ކަމަށް އެ ކައުންސިލަށް އަންގާފަ އެވެ.
