ޝަރުއީ ކޯޓުތަކުގެ މުވައްޒަފުންގެ ރެކްރިއޭޝަން ހަރަކާތް ހިންގުން ސުޕްރީމް ކޯޓުން ހަނިކުރި އާންމު ސިޓީ އުވާލައިފި އެވެ.
ކޯޓުތަކުގައި ރެކްރިއޭޝަން ހަރަކާތްތައް ހިންގުމާ ގުޅޭ އާއްމު ސިޓީއެއް ސުޕްރީމް ކޯޓުން ނެރުނީ 2015 ވަނަ އަހަރު އެވެ.
އެ ސިޓީގައިވާ ގޮތުން ކޯޓުތަކުގައި ރެކްރިއޭޝަން ނުވަތަ މުވައްޒަފުންގެ މެދުގައި އެކުވެރިކަން އާލާކޮށް އިޖްތިމާއީ ހަރަކާތް ހިންގޭނީ ޑިޕާޓްމަންޓް އޮފް ޖުޑީޝަލް އެޑްމިނިސްޓްރޭޝަނަށް އަންގައިގެންނެވެ. އަދި، އެ ޑިޕާޓްމަންޓުން ވިލަރެސް ނުކޮށް އެފަދަ އެއްވެސް ހަރަކާތެއް ނުބޭއްވޭނެ އެވެ.
އެ ސިޓީން ދެން މަނާކުރީ އެއްވެސް ކޯޓެއްގައި، އެއްވެސް ނަމެއްގައި، ކްލަބެއް ނުވަތަ އެހެންވެސް ޖަމާއަތެއް ހެދުމެވެ. މި އާންމު ސިޓީއަކީ އޭރު ކޯޓު މުވައްޒަފުންގެ ކަންބޮޑުވުންތައް އޮތް ސިޓީއެކެވެ.
ސުޕްރީމް ކޯޓުން މިއަދު ބުނި ގޮތުގައި އެ ސިޓީ އުވާލަން ފަނޑިޔާރުންގެ މަޖިލީހުން ވަނީ ނިންމަވައިފަ އެވެ.
މަތީ ކޯޓުން މިހެން ނިންމިއިރު، ދާދިފަހުން އާންމުކުރި ކުރިމިނަލް ކޯޓުގެ ގަވައިދުގައި ކުރިމިނަލް ކޯޓުގެ މުވައްޒަފުންގެ ޖަމިއްޔާއެއް އުފެއްދުމަށް ހިމަނާފައިވެ އެވެ.
ސުޕްރީމް ކޯޓުގެ ފަނޑިޔާރުންގެ ނިންމުމާ އެކު، ކުރިމިނަލް ކޯޓަށް އެ ޖަމިއްޔާ ހެދުމުގެ ފުރުސަތު ލިބިގެން ދާނެ އެވެ.
