މޮސްކޯ، ރަޝިއާ (އޯގަސްޓު 25) - އަފްގާނިސްތާނުގެ ކަންކަމާ ރަޝިއާ އިން ނުބެހޭނެ ކަމަށާއި ކުރީގެ ސޯވިއެޓް ޔޫނިއަނުން އަފްގާނިސްތާން ހިފައިގެން އުޅުނު އިރު ގިނަ ފިލާވަޅުތަކެއް ލިބުނު ކަމަށް ރައީސް ލެޑިމިއަ ޕޫޓިން ވިދާޅުވެއްޖެ އެވެ.
"އަފްގާނިސްތާނުގެ ދާހިލީ ކަންކަމާ އަޅުގަނޑުމެން ނުބެހޭނަން. ހުރިހާ އެންމެން އެކަކު އަނެކަކަށް ހަމަލާދޭ ހަމަނުޖެހުމެއްގެ ތެރެއަށް އަޅުގަނޑުމެންގެ ސިފައިން ވެސް ނުވަންނާނެ،" ވެރިކަން ކުރާ ޔުނައިޓެޑް ރަޝިއާ ޕާޓީގެ ބައްދަލުވުމެއްގައި ޕޫޓިން ވިދާޅުވި އެވެ.
"އަފްގާނިސްތާނުގައި ސޯވިއެޓް ޔޫނިއަން އަށް ވަނީ ތަޖުރިބާތަކެއް ކުރެވިފައި. އަޅުގަނޑުމެންނަށް ދަސްވާން ޖެހޭ ފިލާވަޅުތައް ދަސްވެ ނިމިއްޖެ".
ރަޝިއާ އިން ވަނީ 1979 ގައި އަފްގާނިސްތާނަށް އަރައި، އެ ގައުމުގެ ކޮމިއުނިސްޓް ސަރުކާރަށް އަސްކަރީ އެހީ ފޯރުކޮށްދީފަ އެވެ. އޭރު ކޮމިއުނިސްޓް ސަރުކާރުގެ ސިފައިންނާ ދެކޮޅަށް ހަނގުރާމަ ކުރަމުން ދިޔެއީ މުސްލިމް ގްރޫޕުތަކުންނެވެ.
ދިހަ އަހަރު ވަންދެން އެ ހަނގުރާމަ ކުރިއަށް ދިޔައިރު، ދެ މިލިއަން އަފްގާން ރައްޔިތުން މަރުވެ ހަތް މިލިއަން މީހުންގެ ގެދޮރު ގެއްލުނެވެ. އޭގެ އިތުރުން ރަޝިއާ ސިފައިން 14،000 މީހުން މަރުވި އެވެ.
ރަޝިއާގެ ފޮރިން މިނިސްޓަރު ސާގީ ލެވްރޯވް އަންގާރަ ދުވަހު ވިދާޅުވީ އެމެރިކާ އިން ވަނީ އަފްގާން ރައްޔިތުން ތާލިބާނަށް ވިއްކާލާފައި ކަމަށާއި ތާލިބާނުން ދެކެ ބިރުން އަފްގާން ރެފިއުޖީންގެ ގިނަ ބަޔަކު އޭޝިއާގެ މެދު ތެރޭގައިވާ ގައުމުތަކަށް ވަންނަމުންދާ ކަމަށެވެ.
އޭޝިއާގެ މެދުތެރޭގައި އޮންނަ ގައުމުތަކަކީ ރަޝިއާ ސަރުކާރާ ގާތް ގުޅުމެއް އޮންނަ ގައުމުތަކެވެ. ލެވްރޯވް ވިދާޅުވީ އެމެރިކާ އިން މަސައްކަތް ކުރަނީ އެ ގައުމުތަކުން އަފްގާން ރެފިއުޖީންނަށް "ވަގުތީ ގޮތުން" ފުރުސަތު ދިނުމަށް ވިސްނައިދިނުމަށް ކަމަށެވެ.
އަފްގާނިސްތާނާ އަވައްޓެރި އުޒްބެކިސްތާނަށް 1،500 އަފްގާން ރެފިއުޖީން ވަނީ އެތެރެވެފަ އެވެ. އެ މީހުން ދިރިއުޅެމުން ދަނީ ދެ ގައުމުގެ ބޯޑަރު ސަރަހައްދުގައިވާ ވަގުތީ ޓެންޓުތަކެއްގަ އެވެ. އޭގެ އިތުރުން ވެސް ވަށައިގެންވާ ގައުމުތަކުގެ ބޯޑަރު ހުރަސްކޮށް ދެވޭތީ އާއްމުން ދަނީ މަސައްކަތް ކުރަމުންނެވެ.
