ކިގާލީ، ރްވާންޑާ (އޯގަސްޓު 25) - އަފްގާނިސްތާނުގެ ހަމައެކަނި އަންހެން ބޯޑިން ސްކޫލު ރްވާންޑާ އަށް ބަދަލުކުރަން ނިންމައިފި އެވެ.
މިދިޔަ ހަފްތާގައި ވެރިކަމަށް އައި ތާލިބާނުން ވަނީ އަންހެނުންގެ ހައްގުތައް ނުހިފަހައްޓާނެ ކަމަށް ވައުދުވެފަ އެވެ. ނަމަވެސް ބިރުން ތިބި ގިނަ ބަޔަކު އަންނަނީ ގައުމު ދޫކޮށް ދެވޭތޯ މަސައްކަތް ކުރަމުންނެވެ.
މީގެ ކުރިން ތާލިބާނުން 1990 ގެ އަހަރުތަކުގައި ވެރިކަން ކުރިއިރު ވަނީ އަންހެން ކުދިންގެ ސްކޫލުތައް ބަންދުކޮށް، އަންހެނުން ވަޒީފާ އަށް ދިޔުން މަނާކޮށްފަ އެވެ.
އަފްގާނިސްތާނުގައި އަމިއްލަ ފަރާތަކުން ހިންގާ އަންހެން ކުދިންނަށް ހާއްސަ ހަމައެކަނި ބޯޑިން ސްކޫލު، ސްކޫލު އޮފް ލީޑާޝިޕް އަފްގާނިސްތާ (އެސްއޯއެލްއޭ) ގެ ފައުންޑަރު ޝަބާނާ ބަސިޖް ރާސިކް ވިދާޅުވީ 250 ދަރިވަރުންނާއި، ފެކަލްޓީ ސްޓާފުންނާއި އެ އެންމެންގެ އާއިލާތައް ރްވާންޑާ އަށް ބަދަލުވާން ނިންމާފައިވާ ކަމަށެވެ.
ދަރިވަރުންގެ ކިޔެވުން ދެން ކުރިއަށް ދާނީ ރްވާންޑާގައި ކަމަށް އޭނާ ވިދާޅުވި އެވެ. ޓްވިޓާ މެދުވެރިކޮށް އޭނާ ވިދާޅުވީ އެންމެން މިހާރު ދަތުރު ކުރަމުން ދަނީ ގަތަރުގައި މަޑު ކުރުމަށް ފަހު ރްވާންޑާ އަށް ފުރުމަށް ކަމަށެވެ.
"ގައުމުގެ ހާލަތު ރަނގަޅުވުމުން އަނބުރާ އަފްގާނިސްތާނަށް އާދެވޭނެ ކަމަށް އަޅުގަނޑުމެން އުއްމީދު ކުރަން،" އޭނާ ވިދާޅުވި އެވެ.
ރްވާންޑާގެ ސަރުކާރުން ބުނީ އެ ގައުމުގައި ސްކޫލު ހިންގަން ހުއްދަ ދީފައިވާ ކަމަށާއި އަފްގާން ރައްޔިތުންނަށް މަރުހަބާ ކިޔާ ކަމަށެވެ.
އދ. ގެ އިންސާނީ ހައްގުތަކާ ބެހޭ ޗީފް މިޝޭލް ބެޗެލެޓް އަންގާރަ ދުވަހު ވިދާޅުވީ ތާލިބާނުންނަށް އޮތް "ރަތް ރޮނގަކީ" އަންހެނުންނާ މެދު އަމަލު ކުރާ ގޮތް ކަމަށެވެ.
ރްވާންޑާގެ އިތުރުން، އެމެރިކާގެ އެދުމުގެ މަތިން ޔުގެންޑާ އިން ވެސް ވަނީ އަފްގާން ރައްޔިތުން އެ ގައުމުގައި ތިބުމުގެ ފުރުސަތު ދޭން ނިންމާފަ އެވެ. ބެލެވޭ ގޮތުގައި އަފްގާނިސްތާނުގައި 2،000 އެއްހާ މީހުން ޔުގެންޑާ އަށް ދާނެ އެވެ.
