ޕޯޓް މޯޒްބީ، ޕަޕުއާ ނިއު ގިނީ (އޯގަސްޓު 24) - ކޮވިޑާ ގުޅިގެން އަޅާފައިވާ ފިޔަވަޅުތަކާ ހިލާފަށް އަމަލު ކުރުމަށް ފަހު އިންޑިއާގެ ޑިޕްލޮމެޓުން އެކަން އޮޅުވާލި ކަމަށް ބުނެ، އިންޑިއާއިން ޕަޕުއާ ނިއު ގިނީއަށް ފްލައިޓު ދަތުރު ކުރުން މުއްދަތެއް ނެތް ގޮތަށް މަނާކޮށްފި އެވެ.
ކޮވިޑުގެ ކަންކަމަށް ޕަޕުއާ ނިއު ގިނީ އިން ކަނޑައަޅާފައިވާ އެންމެ އިސް އޮފިޝަލް ވިދާޅުވީ ހުއްދަ ނެތި ގިނަ އަދަދެއްގެ އިންޑިއާ މީހުން އެ ގައުމަށް އެތެރެ ވާން އިންޑިއާ ހައި ކޮމިޝަނުން އެހީވެފައިވާ ކަމަށާއި އެއީ ގަސްތުގައި "އޮޅުވާލުމުގެ" އަމަލެއް ކަމަށެވެ. އެތެރެވި ބައެއް މީހުންނަކީ ކޮވިޑަށް ޕޮޒިޓިވް މީހުން ކަމަށް އޮފިޝަލް ވިދާޅުވި އެވެ.
އޮފިޝަލުން ބުނެފައި ވަނީ އިންޑިއާ އިން ފުރައިގެން އިންޑޮނީޝިއާގައި މަޑު ކުރުމަށް ފަހު 111 މީހުންނާ އެކު ޗާޓަރު ފްލައިޓެއް ޕަޕުއާ ނިއު ގިނީ އަށް ޖެއްސީ އަންގާރަ ދުވަހު ހެނދުނު ކަމަށެވެ. އެ ފްލައިޓުގައި ދަތުރުކުރި 30 މީހުންނަކީ ހުއްދަ ނެތި އައި މީހުންނެވެ.
އެ ފްލައިޓު ޕަޕުއާ ނިއު ގިނީ އަށް ދަތުރު ކުރުމުގެ ހުއްދަ ދިނީ ވެސް ގިނަ ދުވަސްތަކެއް ވަންދެން ދެ ގައުމުގެ މެދުގައި މަޝްވަރާ ކުރުމަށް ފަހު އެވެ.
ކޮވިޑު ފެތުރުމުގެ ބިރު އޮތުމުން އިންޑިއާ އިން ފްލައިޓެއް އައުމުގެ ހުއްދަ ދިނުމާ މެދު ޕަޕުއާ ނިއު ގިނީގެ ސަރުކާރުން ވަރަށް ބޮޑަށް ވިސްނި އެވެ. އެންމެ ފަހުން ހުއްދަ ދިނީ 81 މީހުންނާ އެކު ފްލައިޓެއް އެ ގައުމަށް އެތެރެވުމަށެވެ.
ޕަޕުއާ ނިއު ގިނީގެ ޕޮލިސް ކޮމިޝަނަރު ޑޭވިޑް މޭނިންގް ވިދާޅުވީ "ޕޯޓް މޯޒްބީގައި ހުންނަ އިންޑިއާގެ ހައި ކޮމިޝަނުން މި އޮޅުވާލުމުގެ ގަސްތުގައި ބައިވެރިވި" ކަމަށާއި ހުއްދަ ދިން ވަރަށް ވުރެ އިތުރަށް މީހުން ގެނެވުނީ އެހެންވެ ކަމަށެވެ.
"ޕަޕުއާ ނިއު ގިނީގެ ރައްޔިތުންނާއި ސަރުކާރަށް އިހްތިރާމް ކުޑަ އަމަލެއްގެ ގޮތުގައި މިފަދަ ކަމެއް ކުރުމުން، އޭގެ ނަތީޖާއެއްގެ ގޮތުން ވަކި މުއްދަތެއް ނެތް ގޮތަށް އިންޑިއާ އިން މި ގައުމަށް ދަތުރު ކުރުން ވާނީ މަނާކޮށްފައި،" އޭނާ ވިދާޅުވި އެވެ.
އެކަމާ ގުޅޭ ގޮތުން އިންޑިއާ ސަރުކާރުން އަދި ވަކި އެއްޗެއް ނުބުނެ އެވެ.
އިންޑިއާގެ ފްލައިޓުތަކުގެ އިތުރުން އެއާލައިން އޮޕަރޭޓް ކުރާ ކަޕާޖެޓް އަދި ގަރުޑާ އިންޑޮނީޝިއާގެ ފްލައިޓުތައް ވެސް ވަނީ މަނާކޮށްފަ އެވެ.
އަންގާރަ ދުވަހު ހެނދުނު އިންޑިއާ އިން ދިޔަ ފްލައިޓުގައި ތިބީ ޕަޕުއާ ނިއު ގިނީ، އިންޑިއާ އަދި އިންޑޮނީޝިއާގެ ރައްޔިތުންނެވެ. އޭގެ ތެރެއިން ހަތަރު މީހަކު ވަނީ ކޮވިޑަށް ޕޮޒިޓިވްވެފަ އެވެ.
އިންޑިއާ އިން އެންމެ ފުރަތަމަ ފެނުނު ޑެލްޓާ ވޭރިއެންޓު ފެތުރިދާނެތީ ޕަޕުއާ ނިއު ގިނީ އިން ވަނީ ދަތުރު ކުރުމާ ގުޅޭ ހަރުކަށި ފިޔަވަޅުތަކެއް އަޅާފަ އެވެ.
ބަލިމަޑުކަން ކުރިމަތިވުމުގެ ކުރިން ވެސް ޕަޕުއާ ނިއު ގިނީގެ ސިއްހީ ނިޒާމަށް އޮތީ ބޮޑެތި މައްސަލަތަކާ ދިމާވެފަ އެވެ. އެގޮތުން ބަޖެޓު ނެތުމާއި ޑޮކްޓަރުން ނެތުމުގެ މައްސަލަ ފާހަގަކުރެވެ އެވެ. އެހެންކަމުން ހަލުވިކަމާއެކު ކޮވިޑް ފެތުރެން ފަށައިފި ނަމަ ސިއްހީ ނިޒާމް ހުއްޓޭނެ ކަމަށް އެ ގައުމުގެ ސަރުކާރުން ގަބޫލުކުރެ އެވެ.
ޕަޕުއާ ނިއު ގިނީ އިން މިހާތަނަށް ފެނިފައި ވަނީ ކޮވިޑުގެ 18،000 ކޭސް އެވެ. މިހާރު ވެސް ބައެއް ހޮސްޕިޓަލްތައް ފުރިފައި ވާތީ ވަގުތީ ފެސިލިޓީތައް ގާއިމްކޮށްފައި ވަނީ ބޭރު ގައުމުތަކުގެ އެހީގަ އެވެ.
