ޖެނީވާ، ސްވިޓްޒަލޭންޑް (އޯގަސްޓު 24) - އަންހެނުންނާ މެދު ތާލިބާނުން އަމަލު ކުރާ ގޮތަކީ "ރަތް ރޮނގު" ކަމަށް ވިދާޅުވެ، އދ. ގެ އިންސާނީ ހައްގުތަކާ ބެހޭ ވެރިޔާ، އަފްގާނިސްތާނުގެ ހާލަތާ މެދު ކަންބޮޑުވުން ފާޅުކުރައްވައިފި އެވެ.
މިޝޭލް ބެޗެލެޓް އެގޮތަށް ވިދާޅުވީ އަފްގާނިސްތާނުގެ ހާލަތާ ގުޅިގެން ބޭއްވި ކުއްލި ސެޝަނެއް ފެށުމުގެ ކުރިންނެވެ. އަންހެނުންގެ ހައްގުތަކަށް އިހްތިރާމް ކުރާނެ ކަމަށް ތާލިބާނުން ބުނެފައި ވާތީ، އެ ވައުދު ފުއްދުމަށް އޭނާ ގޮވާލެއްވި އެވެ.
"މި ވައުދުތައް ހަގީގަތަކަށް ހެދުމުގެ ޒިންމާ އުފުލަން ޖެހޭނީ ތާލިބާނުން. އިންސާނީ ހައްގުތަކަށް އިސްކަންދީ، ޒިންމާދާރު ވެރިކަމެއް ކުރެވޭނެ ގޮތްތައް ތަންފީޒު ކުރަން ތާލިބާނުންނަށް ގޮވާލަން. އިޖުތިމާއީ ރައްކާތެރިކާއި ގުޅުން ބަދަހިކޮށް، ދިގު ހަމަނުޖެހުމުގެ ޝިކާރައަކަށް ވެފައިވާ އެންމެންނަށް އިންސާފު ލިބެން ވާނެ،" އޭނާ ވިދާޅުވި އެވެ.
"އަސާސީ ރަތް ރޮނގަކަށް ވާނީ އަންހެނުންނާއި އަންހެން ކުދިންނާ މެދު ތާލިބާނުން އަމަލު ކުރާ ގޮތް،" ބެޗެލެޓް ފާހަގަކުރެއްވި އެވެ.
"ވަކިން ހާއްސަކޮށް އަންހެން ކުދިންނަށް ރަނގަޅު ސާނަވީ ތައުލީމުގެ ފުރުސަތުތައް ފަހިކޮށްދޭތޯ ބެލުމަކީ އިންސާނީ ހައްގުތަކާ މެދު ތާލިބާނުން އަމަލު ކުރާ ގޮތް ވަޒަން ކުރުމުގައި މުހިއްމު ކަމެއް".
މިދިޔަ ހަފްތާގެ އާދީއްތަ ދުވަހު ތާލިބާނުން ވެރިކަމަށް އައުމާއެކު އެތައް ހާސް ބަޔަކު ވަނީ ކާބުލް އެއާޕޯޓަށް ޖަމާވެފަ އެވެ. އެމެރިކާ އާއި ގުޅިފައިވާ އެހެން ގައުމުތަކުން މަސައްކަތް ކުރަނީ އޯގަސްޓު 31 ގެ ކުރިން ވީ އެންމެ ގިނަ އަދަދެއްގެ މީހުން އަފްގާނިސްތާނުން ފުރުވާލުމަށެވެ.
މީގެ ކުރިން ތާލިބާނުންގެ ވެރިކަމުގައި އަންހެނުންނާއި އަންހެން ކުދިންގެ ހައްގުތައް ހިފަހައްޓައި، ގިނަ ބަޔަކު އުޅެން ޖެހުނީ ބިރުވެރިކަމެއްގެ ތެރޭގަ އެވެ. މި ފަހަރު ވެރިކަމުގައި ހައްގުތައް ފޯރުކޮށްދޭން ވައުދުވި ނަމަވެސް، އެތައް ހާސް އަފްގާން ރައްޔިތުން ބޭނުންވަނީ ގައުމު ދޫކޮށް ދިޔުމަށެވެ.
