ކޮލޮމްބޯ، ސްރީ ލަންކާ (އޯގަސްޓު 24) - ސްރީ ލަންކާގެ ޕްރައިވެޓް ހޮސްޕިޓަލެއްގައި ކޮވިޑަށް ފަރުވާދެމުން ދަނިކޮށް ކުރީގެ ފޮރިން މިނިސްޓަރު މަންގަލަ ސަމަރަވީރަ އަވަހާރަވެއްޖެ އެވެ.
އުމުރުން 65 އަހަރުގެ ސަމަރަވީރަ އަށް ކޮވިޑް ޖެހިވަޑައިގެންނެވީ އޯގަސްޓު މަހުގެ ކުރީކޮޅު އެވެ. ބަލީގެ ސަބަބުން ހާލު ދެރަވެ، އެމަނިކުފާނު އެޑްމިޓު ކުރެއްވީ ލަންކާ ހޮސްޕިޓަލުގެ އައިސީޔޫ ގަ އެވެ.
ސަމަރަވީރަ ވަނީ 2005 އިން 2007 އަށް އަދި 2015 އިން 2017 އަށް ލަންކާގެ ފޮރިން މިނިސްޓަރުކަން ކުރައްވާފަ އެވެ. އެމަނިކުފާނަކީ ލިބަރަލް ޑިމޮކްރެޓިކް ވިސްނުން ގެންގުޅުއްވި ބޭފުޅެކެވެ.
ނަވާރަ ސަތޭކަ ނުވަދިހަ ހަތަރު ވަނަ އަހަރުން ފެށިގެން ލަންކާ ކެބިނެޓުގެ ގިނަ މަގާމުތަކެއް ފުރުއްވާފައިވާ ސަމަރަވީރަ ވަނީ ފިނޭންސް މިނިސްޓަރުކަން ވެސް ކުރައްވާފަ އެވެ.
އެމަނިކުފާނު ސިޔާސީ ދާއިރާއާ ދުރަށް ޖެހިވަޑައިގެންނެވީ 2020 ވަނަ އަހަރު އެވެ. ސަމަރަވީރަ އަވަހާރަވެފައި ވާއިރު، ލަންކާގެ ކުރީގެ މަޖިލިސް ރައީސް ޑަބްލިއުޖޭއެމް ލޮކުބަންޑާރަ ވެސް ވަނީ އެ ބަލީގައި އަވަހާރަވެފަ އެވެ.
މި ވަގުތު ކޮވިޑުގެ ހާލަތު ވަރަށް ގޯސްކޮށް އޮތް ލަންކާ ވަނީ ލޮކްޑައުންކޮށްފަ އެވެ. މިދިޔަ ބުރާސްފަތި ދުވަހު 3،800 މީހުން ބަލިވެ، 186 މީހުން މަރުވި އެވެ. ރިކޯޑް މިންވަރަށް އަދަދުތައް މަތިވެފައި ވާއިރު، ކޮވިޑް ބަލި މީހުންގެ އައިސީޔޫ އެނދުތައް ވަނީ އެއްކޮށް ފުރިފަ އެވެ.
ރަސްމީ ތަފާސްހިސާބު ދައްކާ ގޮތުން މިހާތަނަށް ލަންކާ އިން 373،165 މީހުން ކޮވިޑަށް ޕޮޒިޓިވްވެ، 6،790 މީހުން މަރުވެފައި ވެ އެވެ. ނަމަވެސް ހަގީގީ އަދަދު އެއަށްވުރެ ދެ ގުނަ އިތުރުވާނެ ކަމަށް ބެލެވެ އެވެ.
