މެންޗެސްޓާ (އޮގަސްޓް 24) - އިނގިރޭސި ޕްރިމިއާ ލީގުގައި މި ފަހަރު އަމަލު ކުރަމުން އަންނަ ފިޒިކަލް ޗެލެންޖް ގަވާއިދުގެ ސަަބަބުން ފުޓްބޯޅަ ބަދަލުވަނީ ރަގްބީ އަށް ކަމަށް މެންޗެސްޓާ ޔުނައިޓެޑްގެ ކޯޗު އޮލެ ގުނަ ސޯލްޝެއާ ބުނެފި އެވެ.
ޕްރިމިއާ ލީގުގައި އާދިއްތަ ދުވަހު ސައުތެމްޓަނާ ދެކޮޅަށް ޔުނައިޓެޑް 1-1 އިން އެއްވަރުވި މެޗުގައި ސައުތެމްޓަނުން ގޯލު ޖެހިއިރު، އެ ޓީމުގެ ޖެކް ސްޓީވެންސް ޔުނައިޓެޑްގެ ބްރޫނޯ ފެނާންޑޭސް އަށް ފައުލުކުރިކަމަށް ޔުނައިޓެޑް ކުޅުންތެރިން ވަރަށް ބޮޑަށް އެޕީލްކުރި އެެވެ. އެކަމަކު ރެފްރީ ކްރެއިގް ޕޯސަން ވަނީ ފައުލެއް ނޫން ކަމަށް ދައްކައިފަ އެވެ.
ފެނާންޑޭސް އަށް ކުރީ ފައުލެއް ނޫން ކަމަށް ނިންމީ މި ފަހަރު ޕްރިމިއާ ލީގުގައި އަމަލުކުރަމުން އަންނަ އެއް ގަވާއިދުގެ ތެރެއިން ކަމަށް ޓޯކްސްޕޯޓްސްގެ ޝޯގައި ވާހަކަ ދައްކަމުން ކުރީގެ ރެފްރީއެއް ވަނީ ބުނެފަ އެވެ. އެ ގޮތުން މި ފަހަރު ލީގުގައި ބޯޅަ ހޯދަން ކުރާ ފިޒިކަލް ޗެލެންޖެއްގައި ބޯޅަ އަށް އެޓޭކްކުރާ ކުޅުންތެރިޔާ އަށް ފައިދާވާ ގޮތަށް ރެފްރީ އަށް ގޮތް ނިންމިދާނެ އެވެ. އެއީ އެ ކުޅުންތެރިޔާ ބޯޅަ ހޯދީ އިދިކޮޅު ކުޅުންތެރިޔާ އަށް ފައުލެއް ނުވާވަރަށް 50-50 ޗެލެންޖަކުން ކަމަށް ބެލުމަށް ފަހު އެވެ.
ސައުތެމްޓަންގެ ސްޓީވެންސް (ކ) ޔުނައިޓެޑްގެ ބްރޫނޯ އަތުން ބޯޅަ ހޯދަނީ.
ޔުނައިޓެޑްގެ ކޯޗު ސޯލްޝެއާ ވަނީ މި ގަވާއިދާ މެދު ވަރަށް ބޮޑަށް ހިތްހަމަނުޖެހުން ފާޅުކޮށްފަ އެވެ.
"އެއީ (ބްރޫނޯ އަށް ސްޓީވެންސް ކުރީ) ޔަގީނުން ވެސް ފައުލެއް. އަހަރެން ކަންބޮޑުވަނީ އަހަރެމެންނާ ދެކޮޅަށް އެކަން ވީމައެއް ނޫން. މިހާރު ފެންނަ މަންޒަރުތަކުން އެބަހީވޭ ފުޓްބޯޅަ އަކީ ކޮންޓެކްޓް ސްޕޯޓެއްވީމަ ވަރަށް ބޮޑަށް މީގެ އަށް ފިޒިކަލް ބައި ވަންނަހެން،" ސޯލްޝެއާ ބުންޏެވެ.
"މިދިޔަ ސީޒަނުގައި ހޭންޑްބޯލް ކަންތައްތައް ހުރީ ބާސްކެޓްބޯޅަ ހެން. މި ފަހަރު ފިޒިކަލް ކަންތައްތައް މިދަނީ ރަގްބީއަށް ވާ ގޮތަށް. މީގެ އުސޫލެއް އޮންނަން ޖެހޭ،"
ޕްރިމިއާ ލީގުގައި މި ހަފްތާގައި ލިވަޕޫލްގެ ކޯޗު ޔާގެން ކްލޮޕް ވެސް ވަނީ ބާންލީގެ ކުޅުންތެރިން ލިވަޕޫލަށް ކުރި ފިޒިކަލް ޗެލެންޖްތަކަކީ ރެސްލިން އިން ފެންނަ ކަހަލަ ކަންތައްތަކެއް ކަމަށް ބުނެފަ އެވެ. ކްލޮޕް ބުނީ އޭނާގެ ނަޒަރުގައި ފިޒިކަލް ޗެލެންޖްތަކަށް ވެސް ގަވާއިދެއްގެ ދަށުން ބަދަލު ގެނެސްގެން އަމަލުކުރަންވީ ކަމަށާއި އެކަން ކުރަންވީ ދެ ފަރާތަށް ހަމަހަމަވާ ފަދަ އުސޫލެއް އޮންނަން ޖެހޭ ގޮތަކަށް ކަމަށެވެ.
މެންޗެސްޓާ ޔުނައިޓެޑްގެ ކުރީގެ ކެޕްޓަން ރޯއީ ކީން ސްކައިސްޕޯޓްސް ޝޯގައި ވާހަކަ ދައްކަމުން ބުނެފައިވާ ގޮތުގައި ޕްރިމިއާ ލީގުގައި ފިޒިކަލް ފުޓްބޯޅަ ޒަމާނުއްސުރެ ކުޅެމުން އަންނަ ކަމަށާއި މައްސަލަ އަކަށްވަނީ ފަހަކަށް އައިސް މަކަރު ހަދައިގެން ކުޅުންތެރިން ކުރާ ކަންތައްތަކަށް ފަސޭހައިން ފައުލުދޭތީ ކަމަށެވެ.
