ތޫނިސް، ޓިއުނީޝިއާ (އޯގަސްޓު 24) - މީގެ މަހެއްހާ ދުވަސް ކުރިން ބޮޑު ވަޒީރު މަގާމުން ވަކިކޮށް، މަޖިލިސް މެދުކަނޑާލާފައި އޮތް ޓިއުނީޝިއާގައި ވަކި މުއްދަތެއް ނެތް ގޮތަށް މަޖިލިސް މެދުކަނޑާލާފައި ބޭއްވުމަށް ރައީސް ކައިސް ސައީދު އަންގަވައިފި އެވެ.
ހޯމަ ދުވަހުގެ ރޭ ދަންވަރު ރައީސް އޮފީހުން ނެރުނު ބަޔާނެއްގައި ބުނީ މަޖިލިސް މެމްބަރުންނަށް ގާނޫނުން ލިބިދޭ ރައްކާތެރިކަން އުވާލާފައި އޮތް އޮތުން ވެސް ދިގުދަންމާލާފައިވާ ކަމަށާއި ގައުމުގެ ހާލަތާ ގުޅޭ ގޮތުން ރައީސް ވަރަށް އަވަހަށް ރައްޔިތުންނާ މުހާތަބު ކުރައްވާނެ ކަމަށެވެ.
މެދުއިރުމައްޗާއި އުތުރު އެފްރިކާގެ ގައުމުތަކުގައި 2010 ވަނަ އަހަރު ހިނގި "އަރަބް ސްޕްރިންގް" އިންގިލާބުތަކަށް ފަހު ކާމިޔާބުކަމާއެކު ޑިމޮކްރެސީ ހިނގަމުންދާ ހަމައެކަނި ގައުމަކީ ޓިއުނީޝިއާގެ ގޮތުގައި މީގެ ކުރިން އޮތީ ބެލެވިފަ އެވެ.
ނަމަވެސް ޑިމޮކްރަސީ ގެނެވުނާ 10 އަހަރު ފަހުން، އެ ގައުމުގެ 12 މިލިއަން މީހުން ދެކޭ ގޮތުގައި މާ ބޮޑު ތަފާތެއް ފެނިފައެއް ނުވެ އެވެ. އެގޮތުން ދިރިއުޅުމުގެ ފެންވަރަށް ކުރިއެރުމެއް އައިސްފައި ނުވާ ކަމަށާއި ސިޔާސީ ތަޅާފޮޅުމުގެ ސަބަބުން ހިތްހަމަނުޖެހޭ ކަމަށް ރައްޔިތުން ބުނެ އެވެ.
އޭގެ އިތުރުން އެންމެ ފަހުން އުވާލި ސަރުކާރުން ވަނީ ގިނަ ކަންކަމުގައި ފެއިލްވެފައި ކަމަށާއި އޭގެ ތެރޭގައި ކޮވިޑް ކޮންޓްރޯލް ކުރުމުން ހިމެނޭ ކަމަށް ރައްޔިތުން ދެކެ އެވެ. އާބާދީގެ ނިސްބަތުން ބަލާއިރު، ދުނިޔޭގައި ކޮވިޑް ޖެހިގެން އެންމެ ގިނަ މީހުން މަރުވެފައިވާ އެއް ގައުމަކީ ޓިއުނީޝިއާ އެވެ.
ސަރުކާރާ މެދު އާއްމުން ހިތްހަމަނުޖެހުން ފާޅުކުރުމުން ބޮޑު ވަޒީރު ހިޝޭމް މެޝީޝީ މަގާމުން ވަކިކޮށް މަޖިލިސް އުވާލުމާއެކު އެއީ ބަގާވާތެއްގެ ގޮތުގައި ޓިއުނީޝިއާގެ އެންމެ ބޮޑު ޕާޓީ އަދި އެކްޓިވިސްޓުން ދަނީ ސިފަކުރަމުންނެވެ.
ޓިއުނީޝިއާގެ ސިޔާސީ ހަރަކާތްތައް ހުއްޓުވުމުގެ އިތުރުން ވާދަވެރިންނާއި، ފަނޑިޔާރުންނާއި ވިޔަފާރިވެރިން ހައްޔަރުކޮށް، ގައުމުން ފުރުން ވަނީ މަނާކޮށްފަ އެވެ. އާ ސަރުކާރެއް އައްޔަނު ކުރައްވައި، ގައުމުގެ ކުރިމަގެއް މަގުޗާޓެއް ނެރުއްވާނެ ކަމަށް ރައީސް ވިދާޅުވިތާ އެއް މަސް ފާއިތުވި އިރުވެސް އެކަން ކުރައްވާފައެއް ނުވެ އެވެ.
ރައީސް ސައީދަކީ ޓިއުނީޝިއާގެ އާއްމު ރައްޔިތުންގެ މެދުގައި ވަރަށް މަގްބޫލް ބޭފުޅެއް ނަމަވެސް ހުދުމުހުތާރު ވެރިކަމެއް ކުރައްވަން މަސައްކަތް ކުރައްވާ ކަމަށް ތުހުމަތުކޮށް ބޭރުގެ ފަރާތްތަކުން އަންނަނީ ފާޑުކިޔަމުންނެވެ.
