ނިއު ދިއްލީ، އިންޑިއާ (އޯގަސްޓު 23) - ނިއު ދިއްލީ އަށް ދިމާވެފައިވާ ވައި ތަގައްޔަރުވުމުގެ މައްސަލަ ހައްލު ކުރަން ބޮޑެތި ފަންކާތަކަކާ އެކު ފުރަތަމަ "ސްމޮގް ޓަވަރު" ހުޅުވައިފި އެވެ.
ވިހި މިލިއަން މީހުން ދިރިއުޅޭ ދިއްލީގެ ވައިގެ ތެރޭގައި އިންސާނުންނަށް ނުރައްކާވާ ޕާޓިކަލްތައް ހުރީ، އާއްމުކޮށް ހުންނަން ޖެހޭ މިންވަރަށް ވުރެ 20 ގުނަ އިތުރަށެވެ.
ހޯމަ ދުވަހު ހުޅުވި 25 މީޓަރު އުސް ޓަވަރުގައި ހަރުކޮށްފައިވާ ބިޔަ 40 ފަންކާގެ އެހީގައި ކޮންމެ ސިކުންތަކު 1،000 ކިއުބިކް މީޓަރުގެ ވައި ފިލްޓަރުވެގެން ބޭރު ކުރާނެ އެވެ. އެއީ އެއް އަކަ ކިލޯމީޓަރު ސަރަހައްދުގައި ހިމެނޭ ނުރައްކާތެރި ޕާޓިކަލްތައް މަދު ކުރެވޭނެ މިންވަރުގެ ސާފު ވަޔެވެ.
ޓަވަރު ހުޅުވުމުގެ ރަސްމިއްޔާތުގައި ދިއްލީގެ ޗީފް މިނިސްޓަރު އަރްވިންދް ކެޖްރިވާލް ވިދާޅުވީ މިއީ ވައި ތަގައްޔަރުވުމާ ދެކޮޅަށް ދިއްލީން ކުރާ މަސައްކަތުގައި މުހިއްމު ދުވަހެއް ކަމަށެވެ.
ޓަވަރާ މެދު ވިސްނަނީ "އެކްސްޕެރިމެންޓެއް"ގެ ގޮތުގައި ކަމަށާއި ނަތީޖާއަށް ބެލުމަށް ފަހު ފައިދާވާ ނަމަ ދިއްލީގައި އިތުރު ޓަވަރުތައް ޖަހާނެ ކަމަށް އޭނާ ވިދާޅުވި އެވެ.
އެ ޓަވަރު ހަދަން ދެ މިލިއަން ޑޮލަރު ހޭދަވި އެވެ. ބައެއް ފަރާތްތަކުން ބުނެފައިވާ ގޮތުގައި މުޅި ދިއްލީގެ ވައި ސާފުކުރެވޭ ވަރަށް ޓަވަރު ހަދާ ނަމަ ބޮޑު ހަރަދެއް ދާނެ އެވެ. އޭގެ ބަދަލުގައި ވައި ތަގައްޔަރުވާ ސަބަބުތައް ދެނެގަނެ، އެކަންކަން ހައްލުކުރަން ފައިސާ ހޭދަކުރުން މާ ރަނގަޅު ވާނެ ކަމަށް ބުނެފައިވެ އެވެ.
ވައި ތަގައްޔަރުވާ ސަބަބުތަކުގެ ތެރޭގައި އުޅަނދުން އަރާ ދުމާއި، އެކި ސިނާއަތްތަކުގެ މަސައްކަތުގައި ބޭރު ކުރާ ދުމާއި، ކޮންސްޓްރަކްޝަން މަސައްކަތާއި، ތެލާއި ކުނި އެންދުމުން އަރާ ދުން އަދި ފިނި މޫސުމުގައި ކައިރި ސަރަހައްދުތަކުގެ ދަނޑުތައް އެންދުން ހިމެނެ އެވެ.
ދުނިޔޭގެ ސިއްހަތު ޖަމިއްޔާ (ޑަބްލިއުއެޗްއޯ) އިން ބުނެފައިވާ ގޮތުގައި ދުނިޔޭގައި އެންމެ ބޮޑަށް ވައި ތަގައްޔަރުވެފައިވާ 15 ސިޓީގެ ތެރެއިން 14 ސިޓީ އޮތީ އިންޑިއާގަ އެވެ.
މިދިޔަ އަހަރު ހެދި ދިރާސާއަކުން ދެއްކި ގޮތުގައި ވައި ތަގައްޔަރުވުމުން ދިމާވާ މައްސަލަތަކުގައި އިންޑިއާގައި 2019 ވަނަ އަހަރު 1.67 މިލިއަން މީހުން މަރުވި އެވެ. އޭގެ ތެރެއިން 17،500 މީހުން މަރުވީ ދިއްލީންނެވެ.
ޗައިނާ އިން ވެސް ވަނީ 2018 ވަނަ އަހަރު ބޮޑު ޓަވަރެއް ހަދާފަ އެވެ. ޒިއާން ސިޓީގެ ވައި ތަގައްޔަރުވުމުގެ މައްސަލަ ހައްލު ކުރެވޭތޯ 60 މީޓަރު އުސް ޓަވަރެއް ހެދި ނަމަވެސް، އެ މަސައްކަތް އިތުރަށް ފުޅާކޮށްފައެއް ނުވެ އެވެ.
