ހުޅުމާލޭގައި ގާއިމްކޮށްފައި ހުރި ބިޔަ ކަރަންޓު ޖަނަރޭޓަރު މާލެއާ ގުޅާލިފަހުން ވެސް އިންޖީނުގޭ ސަރަހައްދުގައި ހުރި ކުދި ޖަނަރޭޓަރުތައް ޖައްސާ ކަމަށާއި ބޭނުންވަނީ ދާއިމީ ހައްލެއްގެ ގޮތުން ސްޓެލްކޯ ހިމެނޭ ސަރަހައްދުން ބަދަލުވާން ކަމަށް އެ ހިސާބުގައި ދިރިއުޅޭ ރައްޔިތުން މިއަދު ބުނެފި އެވެ.
ރައްޔިތުންގެ މަޖިލީހުގެ ސްޓޭޓް އޯންޑް އެންޓާޕްރައިސާސް ކޮމެޓީގެ ފަރާތުން އެ ސަރަހައްދުގައި ދިރިއުޅޭ ރައްޔިތުންނާ މަޖިލީހުގައި ބައްދަލު ކުރުމުން އެ ސަރަހައްދުގައި ދިރިއުޅޭ ރައްޔިތުން ބުނީ ޖަނަރޭޓަރުތަކުގެ އަޑާއި ދުމާއި ވަހާއި ވައިބްރޭޝަންގެ ސަބަބުން ސިއްހީ، ނަފްސާނީ، އަދި ޖިސްމާނީ އެތައް ގެއްލުންތަކެއްވަމުންދާ ކަމަށެވެ.
"ބައެއް ފަހަރު އަޅުގަނޑަށް އެބަ ނިދާފަ އޮވެފަ އެބަ ހޭލެވޭ ތެޅިގަނެގެން. ބައެއް ފަހަރު ހީވޭ މީހާއަށް ވާ ގޮތެކޭ. އެކަމަކު ރަނގަޅަށް ބަލާއިރު ޖަނަރޭޓަރުތައް. ބައެއްފަހަރު ސޯފާގައި އިންނައިރު ހީވާނެ ދޯންޏެއްގައި އިނދެވޭހެން،" އެ ސަރަހައްދުގައި ދިރިއުޅޭ ހަސަން އިޔާޒް ބުންޏެވެ.
ސްޓެލްކޯ ސަރަހައްދުގައި ދިރިއުޅޭ މީހުން ބުނީ ސްޓެލްކޯގެ އިންޓަކަނެކްޝަން ޕްރޮޖެކްޓު ނިމި، ހުޅުމާލޭގެ ބޮޑު ޖަނަރޭޓަރު މާލެއާ ގުޅި ފަހުން ވެސް ކުދިން ޖަނަރޭޓަރުތައް ބޭނުން ކުރަމުންދާ ކަމަށެވެ.
"މިއަދު ހެނދުނު އެތަނުން އެއް ޕަވާހައުސްގެ ދެ ޖަނަރޭޓަރު ހިންގާފަ ހުރި. މި ދޭތެރެއިން އެ ކޮށީގައި ހުރި ހުރިހާ ޖަނަރޭޓަރުތައް ނިއްވާލާފައި ހުރީ އެކަމަކު މިއަދު ހެނދުނު އަޅުގަނޑު ބަލާލިއިރު އެތަނުން ދެ ޖަނަރޭޓަރެއް ހިންގާފަ ހުރީ،" އެ ހިސާބުގައި ދިރިއުޅޭ މީހަކު ބުންޏެވެ.
ނަމަވެސް، ސްޓެލްކޯއިން ބަހައްޓާފައި ހުރި ވަގުތީ ޖަނަރޭޓަރުތަކާއި ހުރިހާ ކުދި ޖަނަރޭޓަރުތަކެއް މިހާރު ނިއްވާލާފައިވާ ކަމަށް އެ ކުންފުނިން ބުނެ އެވެ. އަދި މިހާރު ބޭނުން ކުރަމުންދަނީ ބޮޑު ދެ ޖަނަރޭޓަރު އެކަނި ކަމަށް ވެސް ސްޓެލްކޯއިން ބުނެ އެވެ.
އޭގެ އިތުރުން އެ ސަރަހައްދުގައި ދިރިއުޅޭ މީހުން ބުނެފައި ވަނީ ބޭނުން ވަނީ ދާއިމީ ހައްލެއް ކަމަށެވެ. މާލެއަށް ކަރަންޓު ބޭނުންވާ މިންވަރު އަހަރަކަށްވުރެ އަހަރެއް އިތުރުވަމުންދާއިރު އެ ޑިމާންޑަށް ސްޓެލްކޯ ކޭޓާ ކުރަންޖެހޭނެ ކަމަށް ވެސް އެމީހުން ބުންޏެވެ. އެހެންކަމުން ދާއިމީ ހައްލަކަށް ވާނީ ސްޓެލްކޯގެ އެ "އިންޑަސްޓްރިއަލް ސަރަހައްދުން" އެމީހުން ބަދަލު ކުރުން ކަމަށް އެ ހިސާބުގައި ދިރިއުޅޭ ގެތަކުގެ މީހުން ބުންޏެވެ.
"އެމީހުން ނުވިސްނާނެ ދޯ އަޅުގަނޑުމެން އެ ސަރަހައްދުގައި އުޅޭ ވިއްސަކަށް މީހުންނަކަށް. އެމީހުން ވިސްނަވާނީ މުޅި މާލެއަށް ކަަރަންޓު ދެވޭތޯ. އެއީ ޖަނަރޭޓަރުތައް އެބަ ހިންގަންޖެހޭ އެ ސަރަހައްދުގަ. ކަރަންޓު ވެސް ދޭންޖެހޭ އެބަ. އެހެންވީމަ އެތަން އިންޑަސްޓްރިއަލް ޒޯނެއްގެ ގޮތުގައި ބާއްވާފައި އަޅުގަނޑުމެން މޫވްކޮށްލަދޭށޭ،" އެކަކު ބުންޏެވެ.
އެ ސަރަހައްދުގެ މީހުންނަށް ލިބެމުންދާ އަނިޔާއަށް ހުރިހާ ސަރުކާރަކުން ވެސް ޒިންމާވާންޖެހޭ ކަމަށް އެ ގެތަކުގެ ރައްޔިތުން ދެކެ އެވެ.
"މިއީ ވަރަށް ބޮޑު އަނިޔާއެއް. ހުރިހާ ސަރުކާރަކުން ވެސް މި އައީ މިކަމަށް އިހުމާލުވަމުން. ޕްލޭނެކޭ ބުނަނަނީ އެކަމަކު ދުވަހަކު ވެސް ޕްލޭނަކަށް އެއްވެސް ކަމެއް ނުދޭ. އެއް ސަރުކާރު ބަދަލުވެ އަނެއް ސަރުކާރުން އަންނައިރު އެ ޕްލޭނެއް ނޯންނާނެ. ދެން އަނެއްކާ ވެސް އަނެއް ބަޔަކު ބޭނުންވާ ގޮތަށް ޕްލޭނެއް ހަދަންވީ. މިހާރު އެ ކަމުގައި ދެން އަޅުގަނޑުމެން އިތުރަށް ގެންގުޅެން ނުހަދާށޭ،" ސްޓެލްކޯ ސަރަހައްދު ގެއަކަށް ނިސްބަތްވާ އާބިދާ މިލްނާ ބުންޏެވެ.
ސްޓެލްކޯ ޖަނަރޭޓަރުތަކުގެ މައްސަލައިގައި ކަމާ ގުޅޭ ބައެއް އިދާރާތަކާ ވެސް އެސްއޯއީ ކޮމެޓީން މިއަދު ބައްދަލު ކުރާނެ އެވެ.
