ޕެރިސް (އޮގަސްޓް 23) - ފްރެންޗް ލީގުގައި ރޭ ކުޅުނު މެޗުގެ ތެރެއިން ނީސްގެ ސަޕޯޓަރުންނާއި މާސޭގެ ކުޅުންތެރިން ކުރިމަތިލުމަކަށް ގޮސް މާރާމާރީ ހިންގުމާ އެކު މެޗު ހުއްޓާލައިފި އެވެ.
ނީސް ދަނޑުގައި ކުޅުނު ރޭގެ މެޗު ފެށިގެން އެ ޓިމުގެ ސަޕޯޓަރުން ދިޔައީ އެކި ވަގުތުތަކުގައި މާސޭ ކުޅުންތެރިންނާ ދިމާލަށް ފުޅި އާއި އެހެނިހެން އެއްޗެހި އުކަމުންނެވެ. މައްސަލަ ގޯސްވީ ދެ ވަަނަ ހާފްގައި މާސޭގެ ޑިމިޓްރީ ޕަޔޭ ކޯނަރެއް ނަގަން ދިޔަ ވަގުތު ސަޕޯޓަރަކު އެއްލި ފުޅިއެއް އޭނާ ގައިގައި ޖެހުމުން އޭގެ ރައްދެއްގެ ގޮތުން ޕަޔޭ ވެސް ނީސް ސަޕޯޓަރުންނާ ދިމާލަށް ފުޅި އުކަން ފެށުމުންނެވެ.
އޭގެ ފަހުން ނީސްގެ ސަޕޯޓަރުންނާއި މާސޭގެ ކުޅުންތެރިންގެ ކުރިމަތިލުމެއް ހިނގިއިރު، މާސޭ ކުޅުންތެރިންނަށް އެކި ވަރުގެ އަނިޔާ ލިބުނެވެ. މެޗު ހުއްޓާލިއިރު، ޑެންމާކްގެ ފޯވާޑް ކެޝްޕާ ޑޯލްބާގްގެ ގޯލާ އެކު ނީސް އޮތީ 1-0 އިން ލީޑުގަ އެވެ.
އަލުން މެޗު ފަށަން ވެގެން ތަކުރާރުކޮށް ރެފްރީ އެންގުމުން ވެސް ރައްކާތެރިކަން ކަށަވަރު ނޫން ކަމަށް ބުނެ، މާސޭ ކުޅުންތެރިން މެޗު ކުޅެން ދެކޮޅު ހެދި އެވެ. އެންމެ ފަހުން ރެފްރީ ނިންމީ މެޗުން ނީސް މޮޅުވީ ކަމަށެވެ.
މާސޭގެ ރައީސް ޕަބްލޯ ލޮންގޯރިއާ ވިދާޅުވީ މެޗު ފެށިގެން ކެނޑިނޭޅި މާސޭ ކުޅުންތެރިންނަށް ހަމަލާ ދެމުންދިޔަ ކަމަށާއި އެންމެ ފަހުން މައްސަލަ ގޯސްވެ މެޗު ހުއްޓާލަން ޖެހުމުން މާސޭ ކުޅުންތެރިން އެދުނީ ރައްކާތެރިކަން ކަށަވަރު ކޮށްދިނުމަށެވެ. އެކަމަކު، މެޗު ހުއްޓާލައި ރެފްރީ ގޮތެއް ނިންމިއިރު، ގެއްލުން ލިބުނީ މާސޭ އަށް ކަމަށް ލޮންގޯރިއާ ވިދާޅުވި އެވެ.
މި ސީޒަނުގައި މާސޭ އިން މޮންޓެޕިއޭއާ ދެކޮޅަށް ކުޅުނު މެޗު ވެސް ސަޕޯޓަރުން ދަނޑަށް ފުޅި އުކައިގެން މެދުކަނޑާލަން ޖެހުނެވެ. ދިހަ ވަރަކަށް މިނިޓަށް މެދުކަނޑާލުމަށް ފަހު މެޗު ފުރިހަމަކުރިއިރު، މާސޭ މޮޅުވީ 3-2 އިންނެވެ.
ލޮންގޯރިއާ ވިދާޅުވީ މިއީ މި ފަހަރު މާސޭ ކުޅުންތެރިންނާ ދިމާލަށް ފުޅި އުކި ދެ ވަނަ މެޗު ކަމަށާއި މިކަން ހުއްޓުވަން ފްރާންސް ފުޓްބޯޅަ ފެޑެރޭޝަނުން އަވަސް ފިޔަވަޅުތަކެއް އަޅަން ޖެހޭ ކަމަށެވެ.
