ޝަރީއަތް ކުރިއަށް ދަނިކޮށް ހުން އައިސްފައިވާ ކަމަށް ބުނެ ދޮގު ހަދައި, މޭޒުމަތީ ބޯ އެޅި މީހަކު ޖޫރިމަނާކޮށްފި އެވެ.
ޖޫރިމަނާ ކޮށްފައިވަނީ ޏ. ފުވައްމުލަކު ޒާވިއާ، އަބްދުﷲ ނަޒީފެވެ. އޭނާއަކީ 2011 ވަނަ އަހަރު ވިލިމާލޭގައި ހިންގި މާރާމާރީއެއްގައި ނ. މާޅެންދޫ ވައިޓްހައުސް، އަހުމަަދު މިރުޒާ އިބްރާހިމް މަރާލި މައްސަލާގައި މަރުގެ ހުކުމް އިއްވާފައިވާ މީހެކެވެ.
ކުރިމިނަލް ކޯޓުން ނަޒީފްގެ މައްޗަށް އިއްވާފައިވާ މަރުގެ ހުކުމަށް ހައިކޯޓުން ތާއިދުކުރުމުން ނަޒީފް ވަނީ މައްސަލަ ސުޕްރީމް ކޯޓުގައި އިސްތިއުނާފުކޮށްފަ އެވެ. އެހެންވެ، މިއަދު ވަނީ މައްސަލާގައި ސުޕްރީމް ކޯޓުގައި އަޑުއެހުމެއް ބާއްވާފަ އެވެ.
އަޑުއެހުން ކުރިއަށް ގެންގޮސްފައިވަނީ އޮންލައިންކޮށް ގުޅާލައިގެންނެވެ. ނަޒީފް، ޝަރީއަތުގައި ބައިވެރިވީ މާފުށީ ޖަލުންނެވެ. އަޑުއެހުން ފެށުމާއެކު، ނަޒީފް ވަނީ އޭނާގެ ބަލި ހާލަތު ހުރި ގޮތުން އަޑުއެހުން ކުރިއަށް ނުގެންދަން އެދިފަ އެވެ. ނަމަވެސް، ނަޒީފްގެ އަތުގައި ޑޮކްޓަރެއްގެ ލިޔުން ނެތުމުން ޝަރީއަތުން ނިންމީ އަޑުއެހުން ކުރިއަށް ގެންދާށެވެ.
ނަމަވެސް، އަޑުއެހުން ފެށިތަނާ ނަޒީފް މޭޒުމަތީ ބޯ އެޅި އެވެ. އެކަމާ ގުޅިގެން އެއީ މާނަ ކަމެއް ކަމާއި އެކަން ނުކުރުމަށް ފަނޑިޔާރުން އިންޒާރު ކުރެއްވި އެވެ. އެ އިންޒާރަށްފަހު ވެސް ނަޒީފް ދެވަނަ ފަހަރަށް މޭޒުމަތީ ބޯ އަޅައިގެން އޮތެވެ.
އެކަން އިތުރަށް ތަކުރާރުކޮށްފިނަމަ ފިޔަވަޅު އަޅާނެ ކަމުގެ އިންޒާރު ފަނޑިޔާރުން ދެއްވި އެވެ. ނަމަވެސް، ނަޒީފް ބުނަމުން ދިޔައީ އޭނާ ހުން އައިސްފައިވާ ކަމާއި އަޑުއެހުމުގައި އިންނަން އޭނާއަށް އުނދަގޫ ކަމަށެވެ.
އެ ވާހަކަ ނަޒީފް ތަކުރާރު ކުރަމުންދާތީ، ފަނޑިޔާރުން ކަރެކްޝަނަލް ސާވިސްއަށް އެންގީ އޭނާގެ ހުން ބެލުމަށެވެ. އަދި ޖަލުގައި އޭނާއަށް ދީފައިވާ ފަރުވާގެ ތަފްސީލް ދިނުމަށެވެ.
ކަރެކްޝަނަލް ސާވިސްއިން އެ މައުލޫމާތުތައް ކޯޓާ ހިއްސާކުރުމުން، ފަނޑިޔާރުން ނިންމެވީ ނަޒީފް ޝަރީއަތަށް ދޮގު ހަދާފައިވާ ކަމަށެވެ. އެހެންވެ، ޝަރީއަތުގެ ނިޒާމާ ހިލާފު އަމަލެއް ކަމަށް ފަނޑިޔާރުން ނިންމެވި އެވެ. އެކަމުގެ އަދަބެއްގެ ގޮތުން ކޯޓުތަކާ ބެހޭ ގާނޫނުގެ ދަށުން 2،000 ރުފިޔާއިން ނަޒީފް ޖޫރިމަނާ ކުރި އެވެ.
ނަޒީފްގެ މައްސަލާގެ ބެންޗުގައި ތިއްބަވަނީ ފަނޑިޔާރު އައިޝާ ޝުޖޫން އާއި ފަނޑިޔާރު ޑރ. އަޒްމިރަލްދާ ޒާހިރާއި ފަނޑިޔާރު ހުސްނުއްސުއޫދާއި ފަނޑިޔާރު މަހާޒް އަލީ ޒާހިރު އަދި ފަނޑިޔާރު އަލީ ރަޝީދެވެ.
