ޕެރިސް، ފްރާންސް (އޯގަސްޓު 21) - ހަނގުރާމަ އާއި މާ ބޮޑަށް ހޫނުވުމުގެ ސަބަބުން ކުރިމަތިވެފައިވާ އެކި ކަހަލަ މައްސަލަތަކުގެ ސަބަބުން އަފްގާނިސްތާނުގެ ކޮންމެ ތިން މީހަކުން އެކަކަށް ބަނޑުހައި ހޫނުކަމާ ކުރިމަތިވެފައިވާ ކަމަށް އދ. ގެ ވޯލްޑް ފުޑް ޕްރޮގްރާމް (ޑަބްލިއުއެފްޕީ) އިން ބުނެފި އެވެ.
ސާދަ މިލިއަން އަފްގާން ރައްޔިތުންނަށް ބަނޑުހައި ހޫނުކަމާ ކުރިމަތިވެފައިވާ ކަމަށް ލަފާކޮށްފައިވާ މި ދަނޑިވަޅުގައި ތާލިބާނުން ވަނީ 20 އަހަރަށް ފަހު އެ ގައުމުގެ ވެރިކަމަށް އައިސްފަ އެވެ.
ޑަބްލިއުއެފްޕީގެ ކަންޓްރީ ޑިރެކްޓަރު މޭރީ އެލެން މެކްގްރޯޓީ ވިދާޅުވީ 2021 ވަނަ އަހަރަކީ ވަކިން ހާއްސަކޮށް އަފްގާން ރައްޔިތުންނަށް އުނދަގޫ އަހަރެއް ކަމަށެވެ. އެގޮތުން ތިން އަހަރުގެ ތެރޭގައި ދެ ވަނަ ފަހަރަށް އާދަޔާ ހިލާފަށް ހޫނުވެ، ދަނޑުތަކަށް ގެއްލުންވެފައިވާ ކަން އޭނާ ފާހަގަކުރެއްވި އެވެ.
"މި އޮތީ ނުރައްކާތެރި ހާލަތެއް. އެންމެ ފަހުގެ ހިސާބުތަކުން ދައްކަނީ 14 މިލިއަން މީހުން އުޅެނީ ބަނޑުހައި ހޫނުކަމުގައި ކަމަށް،" އޭގެ ތެރެއިން ދެ މިލިއަން ކުޑަކުދިންނަށް މެލްނިއުޓްރިޝަންގެ ނުރައްކާ އެބަ އޮތް ކަން ފާހަގަކުރައްވާ މެކްގްރޯޓީ ވިދާޅުވި އެވެ.
ތިރީސް އަހަރު ތެރޭގައި ކުރިމަތިވި އެންމެ ހޫނުގަދަ ދުވަސްތަކާ ހެދި ގޮވާމުގެ އުފެއްދުން ވަނީ 40 ޕަސެންޓު ކުޑަވެފަ އެވެ. އޭގެ އަސަރު ގެރި، ބަކަރި އާއި ކުކުޅު ގެންގުޅޭ މީހުންނަށް ވެސް ދަނީ ކުރަމުންނެވެ.
މެކްގްރޯޓީ ވިދާޅުވީ ތާލިބާނުންގެ ކިބައިން ސަލާމަތް ވާން ބޭނުންވާ ގިނަ ދަނޑުވެރިން މަސައްކަތް ހުއްޓާލުމަށް ފަހު ރައްކާތެރި ހިސާބުތަކަށް ބަދަލުވަމުންދާ ކަމަށެވެ. ހަނގުރާމައިގައި ގިނަ ދަނޑުތަކަށް ގެއްލުންވެފައި ވާއިރު، ބްރިޖާއި މަގު ފަދަ ތަންތަނަށް ވެސް ވަނީ ގެއްލުންވެފަ އެވެ.
"ހަމަނުޖެހުމާއި މޫސުމީ ބަދަލުގެ އަސަރު އެއްވުމުން ކާތަކެތީގެ އަގު ދަނީ މަތިވަމުން،" މި ވަގުތު ވެސް އަފްގާނިސްތާނުގައި ހުންނެވި މެކްގްރޯޓީ ފޯނު މެދުވެރިކޮށް އޭއެފްޕީ އަށް ވިދާޅުވި އެވެ.
އޭނާ ވިދާޅުވީ ތާލިބާނުން ވެރިކަމަށް އައި ނަމަވެސް ޑަބްލިއުއެފްޕީން އަފްގާނިސްތާން ދޫކޮށް ނުދާނެ ކަމަށެވެ. އަދި އަފްގާން ރައްޔިތުންނަށް އިންސާނީ އެހީ ފޯރުކޮށްދެމުން ދާނެ ކަމަށް ވިދާޅުވި އެވެ.
އަފްގާނިސްތާނުގައި ޑަބްލިއުއެފްޕީގެ 480 މުވައްޒަފުން މަސައްކަތް ކުރާއިރު، އޭގެ ތެރެއިން 440 މީހުންނަކީ އަފްގާން ރައްޔިތުންނެވެ.
