ބެއިރޫތު، ލުބްނާން (އޯގަސްޓު 22) - ލުބްނާނަށް ދިމާވެފައިވާ ތެލުގެ ދަތިކަމަށް ވަގުތީ ހައްލެއް ގެނައުމުގެ ގޮތުން ފިޔުލް ސަބްސިޑީ ފޯރުކޮށްދޭން ނިންމާފައިވާ ކަމަށް ބޮޑު ވަޒީރާއި ރައީސްގެ އޮފީހުން ބުނެފި އެވެ.
ބޮޑު މާލީ ކާރިސާއެއް ކުރިމަތިވެފައިވާ ލުބްނާނަށް ތެޔޮ އިމްޕޯޓް ކުރަމުން ދިޔައީ މަރުކަޒީ ބޭންކުން ކަނޑައެޅި ހާއްސަ އެކްސްޗޭންޖް ރޭޓެއްގެ ދަށުންނެވެ. ނަމަވެސް މި މަހު ކުރީކޮޅު ބޭންކުން ބުނީ ތެލުގެ އިމްޕޯޓަށް ހާއްސަ އެކްސްޖޭންޖް ރޭޓެއް އިތުރަށް ދެވެން ނެތް ކަމަށެވެ.
އެއާއެކު ތެޔޮ އިމްޕޯޓު ކުރާ އަގު ބޮޑު ވާނެ ކަމަށް ލަފާކުރެވޭތީ ޑިސްޓްރިބިއުޓަރުން ވަނީ ސަޕްލައި ނުގެނެސް ހިފަހައްޓާފަ އެވެ. އޭގެ ސަބަބުން ޕެޓްރޯލް ސްޓޭޝަންތަކުގެ ބޭރުގައި ދިގު ކިޔޫތައް ހަދަން ފެށި އެވެ.
ރައީސް އޮފީހުން ބުނީ ފިޔުލް ސަބްސިޑީ އަށް ހާއްސަ ވަގުތީ އެކައުންޓެއް ގާއިމް ކުރަން އެދުމުން ބޭންކް އޮފް ލުބްނާނުން ހުއްދަ ދީފައިވާ ކަމަށެވެ. އެ އެކައުންޓުގެ ދަށުން ސެޕްޓެމްބަރު މަހުގެ ނިޔަލަށް ތެޔޮ އިމްޕޯޓް ކުރަން ސަބްސިޑީގެ ގޮތުގައި ޖުމްލަ 225 މިލިއަން ޑޮލަރު ދޫކުރާނެ އެވެ.
އެގޮތަށް ނިންމީ ރައީސް އާއި މަރުކަޒީ ބޭންކުގެ ވެރިޔާ އަދި ވަގުތީ ބޮޑު ވަޒީރާއި ފިނޭންސާއި ހަކަތައާ ބެހޭ މިނިސްޓަރުން ބޭއްވި މަޝްވަރާ އަށް ފަހު އެވެ.
މި ވަގުތު ލުބްނާން ފައިސާގެ އަގު އުޅެނީ ޑޮލަރަކަށް 1،507 ގަ އެވެ. ނަމަވެސް ކަޅު ބާޒާރުގައި ފައިސާގެ އަގު ވަނީ 90 ޕަސެންޓު ވެއްޓިފަ އެވެ.
މި އަހަރުގެ ހޫނު މޫސުން ފެށުމާއެކު ލުބްނާންގެ ހަ މިލިއަން މީހުންނަށް ތެލުގެ ދަތިކަން ދިމާވާން ފެށި އެވެ. ވާލްޑް ބޭންކުން ބުނެފައި ވަނީ ލުބްނާނަށް ކުރިމަތިވެފައިވާ ހާލަތަކީ 19 ވަނަ ގަރުނުގެ ފަހުން ދުނިޔޭގެ ގައުމަކަށް އައި އެންމެ ބޮޑު އިގްތިސޯދީ ކާރިސާ ކަމަށެވެ.
ޖެނެރޭޓަރުތަކަށް ބޭނުންވާ ޑީސެލް ތެޔޮ ނުލިބުމުގެ ސަބަބުން ވިޔަފާރިތަކާއި ހޮސްޕިޓަލްތަކާއި ގައުމުގެ އެންމެ ބޮޑު ޓެލެކޮމް އޮޕަރޭޓަރުގެ ހިދުމަތް ވެސް ވަނީ ލިމިޓުކުރަން މަޖުބޫރުވެފަ އެވެ. ލުބްނާންގައި މިހާރު ދުވާލަކު 22 ގަޑިއިރު ކަރަންޓު ނުލިބެ އެވެ.
