ޕެރިސް، ފްރާންސް (އޯގަސްޓު 22) - އަފްގާނިސްތާނުގައި އަތް ނުލައި ހުރި އެއް ޓްރިލިއަން ޑޮލަރުގެ އަގުހުރި މިނަރަލް ތާލިބާނުނަށް ލިބިއްޖެ އެވެ.
ވިހި އަހަރަށް ފަހު މިދިޔަ އާދީއްތަ ދުވަހު ތާލިބާނުން ވެރިކަމަށް އައުމާއެކު ބޭރުގެ ފަރާތްތަކުން އަފްގާނިސްތާނަށް ފޯރުކޮށްދޭ އެހީ ވަނީ މެދުކަނޑާލާފަ އެވެ. އެހެންވެ، ތާލިބާނަށް ވަނީ ފައިސާގެ ދަތިކަމާ ކުރިމަތިވެފަ އެވެ.
ދާހިލީ ހަނގުރާމަ އާއި އިންފްރާސްޓްރަކްޗާ ބަލިކަށިވުމުގެ ސަބަބުން ގުދުރަތީ ގޮތުން މުއްސަނދި އަފްގާނިސްތާނަށް ވަނީ މުހިއްމު ގިނަ ވަސީލަތްތަކުގެ ބޭނުން ނުހިފި އެވެ. އެގޮތުން އަގުހުރި އެކި ބާވަތްތަކުގެ މިނަރަލުން ލިބެން އޮތް މަންފާ ވެސް މިހާތަނަށް ހޯދިފައެއް ނުވެ އެވެ.
އެމެރިކާގެ ޖިއޮލޮޖިކަލް ސާވޭ (ޔޫއެސްޖީއެސް) އިން މިދިޔަ ޖެނުއަރީ މަހު ނެރުނު ރިޕޯޓެއްގައިވާ ގޮތުން އަފްގާނިސްތާނުގައި ހުރި މިނަރަލްގެ ތެރޭގައި ބޯކްސައިޓް، ކޮޕާ، އަޔަން އޯ އަދި ލިތިއަމް ހިމެނެ އެވެ.
ކަރަންޓު ކޭބަލް އުފައްދަން ބޭނުންވާ ކޮޕާ ޓަނެއްގެ އަގު މި އަހަރު ވަނީ 10،000 ޑޮލަރަށް އުފުލިފަ އެވެ. ކަރަންޓުން ދުއްވާ ކާރުގެ ބެޓެރި އާއި ސޯލާ ޕެނެލް އާއި ވިންޑް ފާމް އުފެއްދުމަށް ލިތިއަމް އަކީ މުހިންމު އެއްޗެކެވެ.
އިންޓަނޭޝަނަލް އެނާޖީ އެޖެންސީން ލަފާކުރާ ގޮތުގައި 2040 ވަނަ އަހަރާ ހަމައަށް ދާއިރު ލިތިއަމް އޮތް ޑިމާންޑު 40 ގުނަ އިތުރުވާނެ އެވެ.
އޭގެ އިތުރުން ތިމާވެއްޓާ ރައްޓެހި، ސާފު ހަކަތައިގެ ދާއިރާގައި މުހިންމު ބައެއް މައުދަން ކަމުގައިވާ ނިއޯޑައިމިއަމް، ޕްރެސޯޑައިމިއަމް އަދި ޑިސްޕްރޯސިއަމް ވެސް ގިނަ އަދަދަކަށް އަފްގާނިސްތާނުގައި އެބަ ހުއްޓެވެ.
އަގުހުރި މައުދަނުގައި އަތް ނުލައި ހުރިއިރު، މައިނުތަކުގެ ތެރެއިން ޖަވާހިރު ފަދަ ތަކެތި ހޯދާ ވިއްކުމުގެ މަސައްކަތް މިހާރު ވެސް އެ މީހުން ކުރެ އެވެ. ނަމަވެސް ގަވާއިދާ ހިލާފަށް އެ ތަކެތި ޕާކިސްތާނަށް ސްމަގްލް ކުރާތީ އެ ސިނާއަތުގެ ހަގީގީ ފައިދާ ގައުމަކަށް ނުކުރެ އެވެ.
ތާލިބާން ވެރިކަމަށް އައުމާއެކު ބޭރުގެ އިންވެސްޓަރުން އަފްގާނިސްތާނަށް ދުރަށް ދާނެ ކަމަށް ބެލެވެ އެވެ. ނަމަވެސް ޗައިނާ އިން ވަނީ ތާލިބާންއެކު ވިޔަފާރި ކުރަން ޝައުގުވެރިކަން ފާޅުކޮށްފަ އެވެ.
އެގޮތުން ތާލިބާން ސަރުކާރާއެކު "ރަހުމަތްތެރިކަމުގެ" ގުޅުމެއް ބާއްވަން ތައްޔާރަށް އޮތް ކަމަށް މިދިޔަ ހަފްތާގައި ޗައިނާ އިން ބުންޏެވެ. މިދިޔަ މަހު ޗައިނާގެ ފޮރިން މިނިސްޓަރު ވަނީ ތާލިބާންގެ ވެރިންނާ ބައްދަލުކުރައްވާފަ އެވެ.
އަފްގާނިސްތާނުގެ މެސް އައިނަކް ކޮޕާ އޯ ސަރަހައްދު 30 އަހަރަށް ކުއްޔަށް ހިފުމުގެ ހުއްދަ 2007 ވަނަ އަހަރު ޗައިނާގެ މެޓަލާޖިކަލް ގްރޫޕް ކޯޕަރޭޝަނެއް ލިބުނެވެ. އެ ތަނުން 11.5 މިލިއަން ޓަނުގެ ކޮޕާ ނެގެން އޮތް ނަމަވެސް ހަމަނުޖެހުމުގެ ސަބަބުން މަސައްކަތް އަދިވެސް ނުފެށެ އެވެ.
ނަމަވެސް އަފްގާނިސްތާނުގެ ހާލަތު ހަމައަކަށް އެޅި، ޗައިނާ ހިމެނޭހެން ބައިނަލްއަގްވާމީ މުޖްތަމައިން ތާލިބާން ސަރުކާރު ބަލައިގަންނަން ނިންމުމާއެކު މަސައްކަތް ފަށާނެ ކަމަށް ގްލޯބަލް ޓައިމްސް ނޫހުން ބުނެފައި ވެ އެވެ.
