މާލެ ސަރަހައްދުގެ ކަރަންޓު ބިލު މިދިޔަ މަހު އާދަޔާ ހިލާފަށް ބޮޑުވި ކަމަށް ބުނާ މައްސަލަ ބަލައި މިމަހު ނިންމާލެވޭނެ ކަމަށް، ޔުޓިލިޓީ ރެގިއުލޭޓަރީ އޮތޯރިޓީން މިއަދު ބުނެފި އެވެ.
މިދިޔަ މަހުގެ ކަރަންޓު ބިލު އޭގެ ކުރީ މަސްތަކާ އަޅާބަލާއިރު ވަރަށް ބޮޑަށް އިތުރު ވެފައިވާ ކަމަށް ބުނެ ގިނަ ބަޔަކު ވަނީ ކަންބޮޑުވުން ފާޅުކޮށްފަ އެވެ. އެއާއެކު ޔުޓިލިޓީ ރެގިއުލޭޓަރީ އޮތޯރިޓީން މިދިޔަ މަހު ފަހުކޮޅު އެކަން ބަލަން ފެށި އެވެ.
ޔުޓިލިޓީ ރެގިއުލޭޓަރީ އޮތޯރިޓީގެ ޗީފް އެގްޒެކެޓިވް ޔަޒީދު އަހުމަދު "އަދަދު" އަށް ވިދާޅުވީ ކަރަންޓު ބިލު ބޮޑުވި ސަބަބު ބަލަން ގިނަ ވަގުތު ނަގަނީ ގިނަ ޑޭޓާތަކެއް އެނަލައިޒް ކުރާތީ ކަމަށެވެ.
"ވަރަށް ބޮޑު ޑޭޓާ ތަކެއްގެ އެނަލިސިސް ހަދަމުން ދާތީ ލަސްވަނީ. އަޅުގަނޑުމެން މި ބަލަނީ މި މަސް ނިމުމުގެ ކުރިން ނިންމާލެވޭނެ ކަމަށް،" ޔަޒީދު ވިދާޅުވި އެވެ.
މި ފަހުން އެންމެ ބޮޑު ބިލެއް ޖުލައި މަހުގެ ތެރޭގައި ފޮނުވާފައިވާ ކަމަށް ގިނަ ބަޔަކު ބުންޏަސް ސްޓެލްކޯ އިން ބުނެފައި ވަނީ ބިލް ބޮޑުވާން ޖެހޭ ސަބަބެއް ނެތް ކަަމަށެވެ.
އެ ކުންފުނިން ބުނި ގޮތުގައި މިދިޔަ މަހުގެ ބިލް ބޮޑުކަމަށް ހީވީ, ކޮވިޑާ ގުޅިގެން ޖޫން މަހުގެ ތެރޭގައި ސަބްސިޑީއެއް ދިނުމަށް ފަހު, އެ ސަބްސިޑީ ކަނޑާލައި މި ދިޔަ މަހުގެ ބިލު ފޮނުވުމުންނެވެ.
ސްޓެލްކޯ އިން ބުނެފައި ވަނީ ކޮންމެ މަހަކު ރީޑިން ނަގާއިރު ބިލު ބޮޑު ކަމަށް ފާހަގަ ކުރެވޭ ގެތަކުގެ ރީޑިން ދެވަނަ ފަހަރަށް ނަގައި މީޓަރު ވެސް ޓެސްޓް ކުރާ ކަމަށެވެ. ކުރިއާ ހިލާފަށް ގެތަކުގެ ބިލު ބޮޑުވިކަން ފާހަގަ ނުކުރެވޭ ކަމަށް ސްޓެލްކޯ އިން ވަނީ ބުނެފަ އެވެ.
ބޮޑެތި ކަރަންޓް ބިލުތަކާ ގުޅިފައިވަނީ އޭސީ ކަމަށް ވެސް ސްޓެލްކޯއިން ބުނެ އެވެ. އޭސީގެ މައްސަލައެއް އުޅޭނަމަ ނުވަތަ ގިނަ ވަގުތު އޭސީ ބޭނުން ކުރާނަމަ ބިލު ބޮޑުވާ ކަމަށް ސްޓެލްކޯއިން ބުނެ އެވެ.
މިފަދަ މައްސަލަތައް ކުރިން ބަލަނީ އެނާޖީ އޮތޯރިޓީންނެވެ. މި ސަރުކާރުގައި އެތަން އުވާލައި ފަހުން އުފެއްދި ޔުޓިލިޓީ އޮތޯރިޓީގެ ޒިންމާގެ ތެރޭގައި، އާންމު ބޭނުންތަކުގެ ހިދުމަތްތަކަކީ ރާއްޖޭގައި ދިރިއުޅޭ އެންމެނަށް އެކަށީގެންވާ ހެޔޮ އަގެއްގައި، ހަރުދަނާ، އިތުބާރުހުރި އަދި ދެމެހެއްޓެނިވި ގޮތެއްގެމަތިން، ފޯރުކޮށްދެވޭ ހިދުމަތްތަކަކަށް ހެދުން ހިމެނެ އެވެ.
