ކޮލޮމްބޯ، ސްރީ ލަންކާ (އޯގަސްޓު 20) - ކޮވިޑް ކޭސްތަކާއި މަރުތައް އިތުރުވެ، ސިއްހީ ތަޖުރިބާކާރުންގެ ޕްރެޝަރާ ހެދި ހުކުރު ދުވަހުން ފެށިގެން ލަންކާ ލޮކްޑައުންކޮށްފި އެވެ.
މީގެ ކުރިން ލޮކްޑައުން ކުރަން ގޮވާލުމުން ރައީސް ގޮތަބަޔާ ރާޖަޕަކްސަ ވަނީ އެކަން ކުރަން ދެކޮޅު ހައްދަވާފަ އެވެ. ނަމަވެސް ހޮސްޕިޓަލްތައް ފުރި، މަރުވާ މީހުންގެ ހަށިތައް އަންދަން ބުރަވަމުން ދާތީ ނިންމެވީ ހުކުރު ދުވަހުން ފެށިގެން 10 ދުވަހަށް ލޮކްޑައުން ކުރުމަށެވެ.
ލޮކްޑައުން ކުރި ކަން އިއުލާނު ކުރެއްވީ ހެލްތު މިނިސްޓަރު ޓްވިޓާގައި ކުރެއްވި ޕޯސްޓެއްގަ އެވެ. އެއާއެކު ގިނަ ބަޔަކު ވަނީ ތަކެތި ގަތުމަށް ފިހާރަތަކަށް އެއްވެފަ އެވެ.
އޭގެ އިތުރުން ޕެޓްރޯލް ސްޓޭޝަނުތަކުގައި ވެސް ދިގު ކިޔުތައް އޮތެވެ. އެއާއެކު ސަރުކާރުން ވަނީ ކަންބޮޑުވުމުގައި ތަކެތި ގަނެ، ސްޓޮކް ހުސްކޮށްނުލުމަށް ގޮވާލާފަ އެވެ.
މިދިޔަ ބުރާސްފަތި ދުވަހު 3،800 މީހުން ބަލިވެ، 186 މީހުން މަރުވި އެވެ. ރިކޯޑް މިންވަރަށް އަދަދުތައް މަތިވެފައި ވާއިރު، ކޮވިޑް ބަލި މީހުންގެ އައިސީޔޫ އެނދުތައް ވަނީ އެއްކޮށް ފުރިފަ އެވެ.
ރަސްމީ ތަފާސްހިސާބު ދައްކާ ގޮތުން މިހާތަނަށް ލަންކާ އިން 373،165 މީހުން ކޮވިޑަށް ޕޮޒިޓިވްވެ، 6،790 މީހުން މަރުވެފައި ވެ އެވެ. ނަމަވެސް ހަގީގީ އަދަދު އެއަށްވުރެ ދެ ގުނަ އިތުރުވާނެ ކަމަށް ބެލެވެ އެވެ.
