ލަންޑަން، އިނގިރޭސިވިލާތް (އޯގަސްޓު 19) - ކޮވިޑާ ދެކޮޅަށް ބޭނުން ކުރާ އެސްޓްރަޒެނެކާ ވެކްސިނަށް ވުރެ ފައިޒާ ވެކްސިންގެ "އިފެކްޓިވްނަސް" ނުވަތަ ބާރު އަވަހަށް ކެނޑޭ ކަމަށް ބުރާސްފަތި ދުވަހު ޝާއިއުކުރި ދިރާސާއަކުން ދައްކައިފި އެވެ.
"ފައިޒާ ވެކްސިންގެ ދެ ޑޯޒް ޖެހުމުން ކޮވިޑް ބައްޔާ ދެކޮޅަށް ވަގުތުން ވަގުތަށް ލިބޭ ރައްކާތެރިކަން އެސްޓްރަޒެނެކާ އަށް ވުރެ ބޮޑު ނަމަވެސް އޭގެ ބާރު އެސްޓްރަޒެނެކާ އަށް ވުރެ އަވަހަށް ކެނޑޭ،" އޮކްސްފޯޑް ޔުނިވާސިޓީގެ ޓީމަކުން ބުންޏެވެ.
އެ ދިރާސާގެ ހޯދުންތައް ބިނާވެފައި ވަނީ އިނގިރޭސިވިލާތުގެ އޮފީސް ފޯ ނޭޝަނަލް ސްޓެޓިސްޓިކްސް އިން ހެދި ސާވޭއެއްގެ މައްޗަށެވެ. އެ ސާވޭގައި މިދިޔަ އަހަރުގެ ޑިސެމްބަރު މަހުން ފެށިގެން މި ހިނގާ އޯގަސްޓު މަހާ ހަމައަށް އެކި ގޭބިސީތަކުގެ މީހުންގެ ޕީސީއާރް ޓެސްޓު ހެދި އެވެ.
އޮކްސްފޯޑް ޔުނިވާސިޓީގެ ނަފީލްޑް ޑިޕާޓްމަންޓް އޮފް މެޑިސިން އިން ބުނީ ސާވޭގެ ހޯދުންތަކުން އެނގުނު ގޮތުގައި ފައިޒާ އާއި އެސްޓްރަޒެނެކާގެ ދެ ޑޯޒް ހަމަކުރުމަށް ފަހު ލިބޭ "އިމުއިނިޓީ" ނުވަތަ ރައްކާތެރިކަން ތަފާތު ކަމަށެވެ.
އެގޮތުން ދެ ޑޯޒް ހަމަކުރާތާ ކުޑަ މުއްދަތެއްގެ ތެރޭގައި ފައިޒާ އިން ލިބޭ ރައްކާތެރިކަން ބޮޑެވެ. ނަމަވެސް ހަށިގަނޑުގައި "ވައިރަލް ލޯޑު" ނުވަތަ ވައިރަސް ހުންނަ މިންވަރު އިތުރުވެ، ބަލީގެ އަލާމާތްތައް ފެންނަ ނަމަ ފައިޒާ ވެކްސިނުން ލިބޭ ރައްކާތެރިކަން އަވަހަށް ކުޑަ ވާން ފަށަ އެވެ.
މި ދިރާސާ ޝާއިއުކޮށްފައި ވާއިރު، ބައެއް ގައުމުތަކުން މިހާރު އަންނަނީ ފައިޒާގެ ބޫސްޓާ ޝޮޓު ދެމުންނެވެ. އެގޮތުން އިޒްރޭލުގެ 58 ޕަސެންޓު މީހުންނަށް ދެ ޑޯޒް ދިނުމަށް ފަހު ބޫސްޓާ ޝޮޓު ދޭން ވަނީ ފަށާފަ އެވެ. އެމެރިކާ އިން ވެސް ތައްޔާރު ވަނީ އެކަން ފެށުމަށެވެ.
އޮކްސްފޯޑްގެ ދިރާސާއިން ދެއްކި އިތުރު ކަމަކީ ކުރިން ބަލި ޖެހިފައިވާ ނަމަ ވެކްސިނުން ލިބޭ ރައްކާތެރިކަން ބޮޑުވާ ކަމެވެ.
ދިރާސާގައި ބައިވެރިވީ އުމުރުން 18 އަހަރުން މަތީގެ 300،000 އަށް ވުރެ ގިނަ މީހުންނެވެ.
