އަބޫ ދާބީ، ޔޫއޭއީ (އޯގަސްޓް 19) - ބޭނުންވެވަޑައިގަންނަވަނީ ގައުމަށް އެނބުރި ގޮސް އަލުން ވެރިކަމަށް އަންނަން ކަމަށް އަފްގާނިސްތާނުގެ ކުރީގެ ރައީސް އަޝްރަފް ގަނީ ވިދާޅުވެއްޖެ އެވެ.
މިދިޔަ އާދީއްތަ ދުވަހު ތާލިބާނުން ވެރިރަށް ކާބުލް އަށް ވަންނަން ތައްޔާރުވުމުން ގަނީ ވަނީ ގައުމު ދޫކޮށް ވަޑައިގެންފަ އެވެ. ޔޫއޭއީގައި ހުންނަވާ ގަނީ ވަނީ ފޭސްބުކް ޕޭޖް މެދުވެރިކޮށް ވީޑިއޯ މެސެޖެއް ނެރުއްވާފަ އެވެ.
އެ ވީޑިއޯގައި ގަނީ ތަކުރާރުކޮށް ވިދާޅުވީ ގައުމު ދޫކޮށް ވަޑައިގެންނެވީ ބޮޑު ލޭއޮހޮރުމަކަށް ޖާގަ ދޭން ބޭނުން ނުވާތީ ކަމަށެވެ. ޔޫއޭއީގައި ހުންނެވުމަށް ނުވިސްނަވާ ކަމަށާއި ގައުމަށް އެނބުރި ދިޔުމާ ގުޅޭ މަޝްވަރާތައް ކުރިއަށްދާ ކަމަށް ގަނީ ވިދާޅުވި އެވެ.
"އަފްގާން ރައްޔިތުންގެ ވެރިކަން ހިމާޔަތް ކުރުމަށް" ކުރެވެން ހުރި ހުރިހާ ކަމެއް ކުރަމުންދާ ކަމަށް ވެސް އޭނާ ވިދާޅުވި އެވެ. ނަމަވެސް އެކަމާ ގުޅޭ ތަފްސީލް ހާމައެއް ނުކުރައްވަ އެވެ.
"ލޭއޮހޮރުވުމާއި ހަމަނުޖެހުމަށް ޖާގަނުދިނުމަށް މި ވަގުތު އަޅުގަނޑު މި ހުރީ ޔޫއޭއީ ގައި،" ވީޑިއޯގައި ގަނީ ވިދާޅުވި އެވެ. ޔޫއޭއީ އިން ވަނީ ގަނީ އެ ގައުމުގައި ހުންނެވިކަން ކަށަވަރުކޮށްދީފަ އެވެ.
އެ ވީޑިއޯގައި ގަނީ ވަނީ ބުދަ ދުވަހު އަފްގާނިސްތާނުގައި ކުރިއަށް ދިޔަ މަޝްވަރާތަކަށް ތާއީދު އޮތްކަން ހާމަކުރައްވާފަ އެވެ. ތާލިބާނުންނާ އެކު މަޝްވަރާގައި ބައިވެރިވީ ކުރީގެ ރައީސް ހާމިދު ކަރްޒާއީ އާއި ފެއިލްވި ސުލްހައިގެ މަޝްވަރާގައި އިސްކޮށް އުޅުއްވި އަބްދުﷲ އަބްދުﷲ އެވެ.
"މި މަޝްވަރާތައް ކާމިޔާބު ވާން އަޅުގަނޑު އެދެން،" ބުދަ ދުވަހު ބޭއްވި ބައްދަލުވުންތަކާ ގުޅޭ ގޮތުން ގަނީ ވިދާޅުވި އެވެ.
އާދީއްތަ ދުވަހު ގަނީ ގައުމު ދޫކޮށް ވަޑައިގެންނެވިކަން އިއުލާނު ކުރެއްވީ ސިޔާސީ ގޮތުން ވާދަވެރި އަބްދުﷲ އެވެ. އޭރު އަބްދުﷲ ވިދާޅުވީ ގައުމު ދޫކޮށް ވަޑައިގެންވުމުން ގަނީއާ މެދު ރައްޔިތުން ދެކޭނީ ގޯސްކޮށް ކަމަށެވެ.
ނަމަވެސް ގަނީ ތަކުރާރުކޮށް ވިދާޅުވީ ގައުމު ދޫކޮށް ވަޑައިގެންނެވީ އަމިއްލަ ފުރާނަ އަށް ނުރައްކާވެދާނެ ކަމުގެ ބިރަކަށް ނޫން ކަމަށާއި ބޮޑު ލޭއޮހޮރުވުމެއް އުފެދުމުގެ ފުރުސަތު ނުދޭންވެގެން ކަމަށެވެ.
"ރައްޔިތުން ވިއްކާލާފައި ރައީސް ފިއްލެވީ އަމިއްލަ ފުރާނަ ސަލާމަތްކޮށް، އަމިއްލަ ފައިދާ އަށް ކަމަށް ދައްކާ ވާހަކަ އަޑު ނޭހުން އޭދުން. އެއީ އެއްވެސް ހަގީގަތެއް ހުރި ވާހަކައެއް ނޫން. އެ ވާހަކަތަކަށް އަޅުގަނޑު ދެކޮޅު ހަދަން"،" އޭނާ ވިދާޅުވި އެވެ.
"އަޅުގަނޑު އަފްގާނިސްތާނުން އަރުވާލިއިރު ފައިވާން ބާލައި ބޫޓަށް އަރާލާނެ ވަގުތެއް ވެސް ނުލިބުނު."
ގަނީ ތުހުމަތު ކުރެއްވި ގޮތުގައި ކާބުލް އަށް ނުވަނުމަށް ތާލިބާނުން އެއްބަސްވި ނަމަވެސް، އެ މީހުން އަމަލު ކުރީ އެ އެއްބަސްވުމާ ހިލާފަށެވެ.
"އަޅުގަނޑު އެ ތަނުގައި މަޑު ކުރި ނަމަ، އަނެއްކާ ވެސް އަފްގާން ރައްޔިތުންގެ ލޯ ކުރިމަތީގައި، އިންތިހާބުކޮށްފައި ހުރި ރައީސަކު ދަން ޖައްސާ އަވަހާރަކޮށްލީސް،"
ތާލިބާނުން އެންމެ ފުރަތަމަ 1996 ގައި ވެރިކަމަށް އައިއިރު، އެ މީހުން ވަނީ ކުރީގެ ކޮމިއުނިސްޓް ރައީސް މުހައްމަދު ނަޖީބުﷲ އދ. ގެ އޮފީހުގެ ތެރެއިން ގަދަކަމުން ނެރެ، އާއްމުންގެ ތެރޭގައި އަނިޔާކޮށް، މަގުމަތީގައި ދަން ޖައްސާ އަވަހާރަކޮށްލާފަ އެވެ.
