ސްޓެލްކޯ އިންޖީނުގޭ ސަރަހައްދުގައި ދިރިއުޅޭ ރައްޔިތުންގެ ގެތަކަށް، ރައްޔިތުންގެ މަޖިލީހުގެ ސްޓޭޓް އޯންޑް އެންޓާޕްރައިސަސް (އެސްއޯއީ) ކޮމެޓީގެ ފަރާތުން ޒިޔާރަތް ކުރުމަށް މިއަދު ނިންމައިފި އެވެ.
މަޖިލީހުގެ ކޮމެޓީން އެގޮތަށް ނިންމީ ސްޓެލްކޯގެ ޖަނަރޭޓަރުތަކާއި ދުން ހޮޅިތަކުގެ ސަބަބުން އެ ހިސާބުގައި ދިރިއުޅޭ ރައްޔިތުންނަށް ތަފާތު ގެއްލުންވަމުންދާ ކަމަށް ބުނެ ގަލޮޅު ދެކުނު ދާއިރާގެ މެމްބަރު މީކާއިލް އަހުމަދު ނަސީމް ހުށަހެޅުއްވި ގަރާރުގެ މަސައްކަތް ކުރުމުގެ ތެރޭގަ އެވެ.
އެސްއޯއީ ކޮމިޓީގެ މިއަދުގެ ބައްދަލުވުމުގައި އޮތީ މުގައްރިރާއި ނައިބު މުގައްރިރު ހޮވުމެވެ. އަދި މަސައްކަތް ކުރިއަށްގެންދާ ގޮތް ވެސް ކޮމެޓީން މިއަދު ވަނީ ރާވައިފަ އެވެ.
އެގޮތުން ސްޓެލްކޯ، މާލޭ ޔުޓިލިޓީ ކުންފުނި، މާލޭ ސިޓީ ކައުންސިލް އާއި ތިމާވެއްޓާ ބެހޭ މިނިސްޓްރީ ހިމެނޭ ގޮތަށް ޖުމްލަ ހަތް މުއައްސަސާއަކާ ބައްދަލު ކުރުމަށް ކޮމެޓީން ވަނީ ނިންމައިފަ އެވެ.
ކޮމިޓީގެ މުގައްރިރު، ފޭދޫ ދާއިރާގެ މެމްބަރު މުހައްމަދު ނިހާދު ވިދާޅުވީ ވިދާޅުވީ ސްޓެލްކޯ ސަރަހައްދުގައި ދިރިއުޅޭ ރައްޔިތުންނާ ބައްދަލު ކުރާނީ އެންމެނާ އެއްކޮށް އެއް ދުވަހެއްގައި ކަމަށެވެ. އަދި އަންނަ އާދީއްތަ ދުވަހަށް އެ ބައްދަލުވުން ބާއްވަން ވަނީ ނިންމައިފަ އެވެ.
ގަވާއިދުގައި ބުނެފައިވާ ގޮތުން ކަރަންޓު ދޭ އިންޖީނުގެ ބަހައްޓަންޖެހޭނީ މީހުން ދިރިއުޅޭ ސަރަހައްދާ އެންމެ މަދުވެގެން 200 ފޫޓު ދުރުގަ އެވެ. ނަމަވެސް ސްޓެލްކޯގެ ބައެއް އިންޖީނުތައް ހުރީ މީހުން ދިރިއުޅޭ ގެތަކާ އެއަށްވުރެ މާ ކައިރީގަ އެވެ.
ސްޓެލްކޯ އިންޖީނުގެތަކާއި ދުންހޮޅިތަކުގެ ސަބަބުން އެ ސަރަހައްދުގެ ހުންނަ ގ. ފެހިހިރި އާއި ގ. ރަސްރޯނުގައި ދިރިއުޅޭ ރައްޔިތުންގެ އަސާސީ ހައްގުތައް ގެއްލިފައިވާ ކަމަށް ހިއުމަން ރައިޓްސް ކޮމިޝަން އޮފް ދަ މޯލްޑިވްސް އިން ވެސް ވަނީ ބުނެފަ އެވެ.
އެ މައްސަލައިގައި ސްޓެލްކޯއިން ބުނެފައި ވަނީ މީހުން ދިރިއުޅޭ ސަރަހައްދާ ކައިރީގައި ޖަނަރޭޓަރުތައް ބަހައްޓަންޖެހުނީ މާލެއަށް ބޭނުންވާ ކަރަންޓު އުފެއްދުމަށް މަޖުބޫރުވެގެން ކަމަށެވެ.
އެކަމަކު ސްޓެލްކޯއިން ބަހައްޓާފައި ހުރި ވަގުތީ ޖަނަރޭޓަރުތަކާއި ހުރިހާ ކުދި ޖަނަރޭޓަރުތަކެއް މިހާރު ނިއްވާލާފައިވާ ކަމަށް އެ ކުންފުނިން ބުނެ އެވެ. އެގޮތުން ހުޅުމާލޭގެ ބިޔަ އިންޖީނުގެ މާލެ އަދި ހުޅުލެއާ ގުޅާލިފަހުން މިހާރު ބޭނުން ކުރަމުންދަނީ ބޮޑު ދެ ޖަނަރޭޓަރު އެކަނި ކަމަށް ވެސް ސްޓެލްކޯއިން ބުނެ އެވެ.
